1 Crónicas 24 - Mam Huehuetenango New Ortography

1Ax ikx qe tiyjil Aarón e b'aj pa'n tuj k'lojin. Qe tky'ajal Aarón atzun qe jlu: Nadab, Abiú, Eleazar ex Itamar.

2Ex nej e kyim Nadab ex Abiú twitz kyman, ex minti' jun kyky'ajal tzaj; tu'ntzun jlu ate Eleazar ex Itamar e kyaj ten te pal.

3E kub' tpa'n David qe tiyjil Aarón tuj k'lojin tu'ntzun kyaq'nan ti'j aq'untl at tuj kykwent; tuk'ix Sadoc aju tiyjil Eleazar ex Ahimelec aju tiyjil Itamar e onin tuk'il tu'n tb'ant jlu.

4El kynik' ti'j, aqeju xinaq tiyjil Eleazar mas nim kyajlal kywitz qe tiyjil Itamar, kyja'tzun e b'je'l kypa'n ex e kyaj ten qaqlaj nejenel kyxol tiyjil Eleazar, ex wajxaq nejenel kyxol tiyjil Itamar.

5Jaw swert kyi'j tu'n kyb'aj pa'n tuj k'lojin, tza'nx kyxol qe tiyjil Eleazar ax ikx kyxol qe tiyjil Itamar, tu'nju at qe at kyoklen tuj tja Dios, ex at qe at kyoklen tu'n kyajb'en te Dios.

6Ate Semaías aju aj tz'ib'al ex tky'ajal Natanael, aju tiyjil Leví, kub' tz'ib'ante kyb'i twitz rey, kywitz qe nejenel, twitz pal Sadoc, twitz Ahimelec aju tky'ajal Abiatar, kywitz qe nejenel te junjun k'loj pal, ex kywitz aj Leví. Jaw swert kyi'j jtoj tu'n tajb'en junjun k'loj. Nej jaw swert ti'j jun k'loj tiyjil Eleazar ex te tib'ajxi jaw swert ti'j jun k'loj tiyjil Itamar, ex iklex e tenb'a tejxi kyex b'aj kykyaqil k'loj.

7-18Tej tjaw kyi'n swert kyi'j, e kyajtzun ten qe k'loj tuj ttxolil, xi qe' tuj tnejel ex pon b'aj tuj 24 k'loj, ex aqeju nejenel kye, atzun qe jlu: Joiarib, Jedaías, Harim, Seorim, Malquías, Mijamín, Cos, Abías, Jesúa, Secanías, Eliasib, Jaquim, Hupa, Jesebeab, Bilga, Imer, Hezir, Afses, Petaías, Hezequiel, Jaquín, Gamul, Delaía, ex Maazías.

19Kyja'tzun tten e b'aj pa'n qe tuj k'lojin tu'n kyajb'en tuj tja Qman, ik tza'nx otoq kyaj tma'n Qman aju Kydios aj Israel te Aarón aju qtzan kyxe'chel.

20Qe txqantl k'loj tiyjil Leví ex qe nejenel kye atzun qe jlu: Subael aju tiyjil Amram, ex Jehedías aju tiyjil Subael;

21Isías aju nejenel kyi'j tiyjil Rehabías;

22Selomot aju tiyjil Izhar; Jahat aju tiyjil Selomot.

23Qe tky'ajal Hebrón atzun qe jlu: Jerías tb'i tnejel, Amarías tb'i tkab'in, Jahziel tb'i toxin, Jecamán tb'i tkyajin.

24Ax ikx Micaía aju tky'ajal Uziel; Samir aju tky'ajal Micaía;

25Isías aju terman Micaía ex Zacarías aju tky'ajal Isías.

26-27Aqeju tiyjil Merari atzun qe jlu: Jaazías tb'i tky'ajal; atzun qe tky'ajal Jaazías atzun qe jlu: Mahli, Musi, Soham, Zacur ex Ibri.

28-29Qe tky'ajal Mahli atzun qe jlu: Eleazar ex Cis. Ate Eleazar minti' tky'ajal tzaj; aju tky'ajal Cis atzun Jerameel.

30Qe tky'ajal Musi atzun qe jlu: Mahli, Edar ex Jerimot.

Atzun qe tiyjil Leví jlu, ik tza'nx junjun k'loj kyiyjil.

31Ax ikx kye e b'aj pa'n qe tuj swert, ik tza'nx otoq che tenb'a qe kyerman aqeju tiyjil Aarón. A jlu o b'ant twitz rey David, twitz Sadoc, twitz Ahimelec, kywitz qe nejenel te junjun k'loj pal, ex kywitz qe nejenel te junjun k'loj aj Leví. Kykyaqil xi q'o'n kyoklen, tza'nx qe tzikb'aj ax ikx qe tz'inb'aj.