1Kyb'itzanxe jun ak'aj b'itz te Qman; che b'itzane te Qman kykyaqile najlqeye twitz tx'otx';
2che b'itzane ex kynimsa'n jawe tb'i; tkyaqil q'ij kyq'onxe tqanil kolb'il tu'n.
3Che yoline ti'j tajwalil ex ti'j tb'inchb'en ma' t-xilen kye kykyaqil xjal ex kye kykyaqil nasyon,
4porke ma' t-xilen Qman ex b'a'n tu'n tjaw nimset tb'i; mas tu'n qxob' twitz kywitz qe txqantl kydios xjal.
5Qe kydios txqantl tnam minti' kyajb'en, atzunte Qman o b'ant kya'j tu'n.
6Txolin ti'j tu'n tajwalil ex tu'n t-spik'umal. At nim tipumal tuj tja ex puro tb'anil.
7Kykyaqile aqeye xjal najl twitz tx'otx' kynimsa'n jawe tb'i Qman, kynimsa'n jawe tb'i tu'nju at tipumal ex tajwalil.
8Kyq'onxe nimb'il te Qman tu'nju ma' t-xilen, kyi'ntze oyaj ex kyokxe tuj tja.
9Che k'ulune twitz Qman tu'nju tb'anilxix ex xjante. Kykyaqile aqeye xjal najl twitz tx'otx' che lu'lune tu'n kyxob'ile twitz.
10Kymanxe kye txqantl nasyon kyja': Ate Qman in kawin. Tu'n kub' tq'o'n t-simyentil tx'otx' tu'n mi tyukch; parej in kawin Dios kyib'aj kykyaqil tnam.
11E ttzalaj kya'j tuk'ix tx'otx'; e tjulin mar tuk'ix tkyaqilju at tuj.
12B'a'n tu'n kytzalaj qe kojb'il tuk'ix tkyaqilju at kywitz, ex e kyjaw sch'in qe tze' tuj k'ul tu'n tzalajb'il
13twitz Qman aju tzul. Ax tok, tzul tu'n tkawin twitz tx'otx'; aju tkawb'il kyib'aj qe tnam twitz tx'otx' tz'aqlxix te ex axix tok.
Who We AreWhat We EelieveWhat We Do
2025 by iamachristian.org,Inc All rights reserved.
