1 Corinto 14 - Mam Huehuetenango New Ortography

Aju tu'n qyolin ti'j junxilchaq yol

1Kyq'o'nke tilil tu'n tten kyk'ujlalile, ex kyq'o'nke tilil tu'n tten kyoklene aju in tzaj tq'o'n Xewb'aj Xjan, ex aju mas il ti'j, tu'n t-xi kychik'b'a'ne aju in tzaj tma'n Dios kyeye.

2Porke aju xjal in yolin tuj junxilchaq yol, mya kyuk'il xjal in yolin, noq o'kx in yolin tuk'il Dios, ex mi jun xjal nne'l tnik' ti'j tyol. Aju yol in tzaj q'ma'n te tu'n Xewb'aj Xjan mlay tz'el kynik' xjal ti'j alkye tnab'l.

3Ex aju in chik'b'ante tyol Dios, in yolin kyuk'il xjal tu'ntzun kych'iy tuj kyokslab'l, ex tu'n t-xi q'ot kynab'l, ex tu'n tq'uqb'anjtz kyk'u'j.

4Aju in yolin tuj junxitl yol, o'kx te in ch'iy tuj tokslab'l; atzunju in chik'b'ante tyol Dios, in che ch'iy kykyaqil okslal tu'n tuj kyokslab'l.

5Kyja'tzun wajb'ile tu'n kyyoline kykyaqile tuj junxilchaq yol, pero mas wajb'ile tu'n t-xi kychik'b'a'ne tyol Dios; porke aju in chik'b'ante tyol Dios mas ma' toklen twitzju in yolin tuj junxilchaq yol, ax b'a'n tu'n tyolin tuj junxilchaq yol, ex qa ma tz'el pjet ju yol tu'n, tu'ntzun kych'iy kykyaqil okslal tuj kyokslab'l.

6Ja'lotzun erman, qa ma chin pone kyuk'ile in chin yoline tuj junxilchaq yol, ¿ti tajb'en kyeye qa minti' ma txi nma'ne aju yol tzaj tma'n Dios weye, ex qa jun yol te ojtzqib'l, ex qa jun yol te chik'b'ab'l ti'j tyol Dios, ex qa jun yol te xnaq'tzb'il?

7Kykyaqil qe ti'xti in che q'ajt mya itz' qe, ik tza'n xux ex qa jun kitar, qa minti' in kyq'o'n t-sonil kywi' clarxix, ¿tza'ntzun tten tu'n tel qnik' ti'j alkye b'itz in tq'ajtza'n xux ex qa alkye b'itz in tq'ajtza'n kitar?

8Ax ikx ok tok q'ajtza'n chun, qa junxitl tb'inx twi', ¿alkye kb'antel tten tu'n t-xi' tuj q'oj?

9Ikxtzun kyeye, qa minti' ma txi kyma'ne jun yol chik'lxix, ¿tza'ntzun tten k'elel kynik' xjal ti'j ju in kyma'ne? Mer ik tza'n minti' jun xjal in b'in ti'j kyyole.

10Ela' txkaj kyyol xjal at twitz tx'otx', ex minti' jun yol minti'wt tnab'l.

11Ex qa minti' ma tz'el nnik'e ti'j ti t-xilen ju yol, chin okele ik tza'n stranjer xjal tuj twitz ju in yolin, ex aju in yolin k'okel ik tza'n stranjer xjal tuj nwitze.

12Ikxtzun kyeye, tu'nju kyajb'ile tu'n tten ela' kyoklene tu'n Xewb'aj Xjan, kyq'o'nke tilil tu'n tten ela' kyoklene tu'ntzun kych'iy kykyaqil okslal tuj kyokslab'l.

13Kyja'tzun, aju in yolin tuj junxilchaq yol, qaninx tuj na'j Dios tu'n tel pjet ju yol tu'n.

14Ex qa ma chin na'ne Dios tuj junxitl yol minti' nne'l nik'b'aj ti'j, aju wanmiye in na'n Dios, ex aju nnab'le minti' ch'in in tkamb'a'n.

15¿Titzun ok nb'incha'ye? Chin na'le Dios tuj wanmiye, ex ikx chin na'le Dios tuj nnab'le; chin b'itzale tuj wanmiye, ex ikx chin b'itzale tuj nnab'le.

16Ex qa ma txi tq'o'na chjonte te Dios tuj tanmiya ex in yolina tuj jun yol minti' nne'l nik'b'aj ti'j, ex qa at jun xjal in b'in mya xnaq'tzamni, ¿tza'n tten tu'n t-xi tq'o'n chjonte te Dios junx tuk'ila? Porke minti' nne'l tnik' ti'j ju in tma'na.

17Porke teya, ax tok b'a'n in tb'incha'na in xi tq'o'na chjonte te Dios; ex atzun juntl mlayx ch'iy.

18In xi nq'o'ne chjonte te Dios tu'nju b'a'n chin yoline tuj junxilchaq yol mas ik tza'n kyeye.

19Ex kyxol okslal mas wajb'ile tu'n t-xi nma'ne jwe' yol aju nne'l nik'b'aj ti'j tu'ntzun t-xi nq'o'ne xnaq'tzb'il kye txqantl, ex mya tu'n t-xi nma'ne laj mil yol tuj junxitl yol aju minti' nne'l nik'b'aj ti'j.

20Erman, aju kynab'le mi'n tz'ok ik tza'n tnab'l jun k'wa'l, noq o'kx ik tza'n tnab'l jun tij xjal; ex mi'n che ximane ti'j ju mya b'a'n, ik tza'n qe tal k'wa'l minti' in che ximan ti'j ju mya b'a'n.

21At jun yol tz'ib'an tuj Tu'jil in tma'n: Kxel q'met nyole kye xjal lu tuj kyyol junxitl xjal ex tuj kyyol stranjer xjal; maske ikju, pero mlay txi kyb'i'n nyole, chi Qman, chi tuj Tu'jil.

22Kyja'tzun, aju oklenj tu'n qyolin tuj junxilchaq yol in tzaj q'o'n te jun techal kye xjal mya okslal, ex mya te kye okslal. Atzunju qoklen tu'n t-xi qchik'b'a'n aju in tzaj tma'n Dios qe in tzaj q'o'n te jun techal kye okslal, mya te kye qeju mya okslal qe.

23Qatzun ma tz'ok kychmon kyib' qe okslal tuj jun lugar, ex qa ma che yolin kykyaqil tuj junxilchaq yol, ex qa ma che okx qe xjal minti' ch'in nne'l kynik' ti'j ex qa mya okslal qe, ¿mlaypelo kyma qa tuj kywitze ma tzaj?

24Ex qa kykyaqile in xi kychik'b'a'ne aju in tzaj tma'n Dios kyeye, ex qa ma tz'okx jun xjal mya okslal ex minti' ch'in b'a'n tu'n, kb'eltzun ti'j tnab'l kyu'ne kykyaqile, ex kb'el ten ximal ti'j qa aj il ok tb'inte kyyole.

25Aju ewan tuj tanmi k'elel tuj q'ancha'l; kyja'tzun kb'el ẍmeje' tu'n tk'ulun twitz Dios, ok tma' qa ax tok at Dios kyxole.

Kyb'inchame tkyaqil tuj tumel ex tuj ttxolil

26¿Titzun k'okel erman? Ok tok kychmon kyib'e, teyle junjun ktzajel tma'n jun salmo, ex qa jun xnaq'tzb'il, ex qa junxitl yol, ex qa jun yol alkye ktzajel tyek'un Dios te, ex qa tu'n tel pjet junxitl yol. Kyb'inchame tkyaqil tu'ntzun kych'iy qe txqantl okslal.

27Qa at ma yolin tuj junxitl yol, b'a'n tu'n kyyolin kab'e ex qa ox, ex junjun tu'n tyolin, ax ikx il ti'j tu'n tten jun pjulte kyyol.

28Ex qa minti' jun pjulte yol, b'a'n tu'n mi'n tyolin kyxol okslal, b'a'n tu'n tyolin texte ex te Dios.

29Ax ikx qe pakb'al, b'a'n tu'n kyyolin kab'e ex qa ox, atzun qe txqantl tu'n kyximan ti'j.

30Ex qa at juntl q'uql, qa at jun yol ma tzaj tma'n Dios te, b'a'n tu'n twe' tyolin aju in yolin, tu'ntzun tyolin juntl.

31Porke b'a'n tu'n t-xi kychik'b'a'ne kykyaqile aju in tzaj tma'n Dios kyeye, junjun tu'n tyolin, tu'ntzun tel kynik' kykyaqil ti'j ex tu'n t-xi q'ot kynab'l kykyaqil.

32Ex aqeju in che pakb'an, tuj kykwent-x ta' tu'n kyyolin ex qa tu'n twe' kyyolin.

33Porke ate Dios tkyaqil in b'ant tu'n tuj ttxolil ex tu'n tten qmojb'ab'l qib' qxolx.

Ik tza'n in b'ant kyxol okslal kyuj kykyaqil iglesi,

34ax ikx kyxole, b'a'n tu'n mi'n kyq'ajt qe xu'j ok tok kychmon kyib'e tuj k'ulb'il, porke mya q'o'n amb'il kye tu'n kyyolin, o'kx tu'n kykub' txule' ik tza'n in tma'n tuj tley Dios.

35Ex qa kyaj tu'n tel kynik' ti'j ti t-xilen jun yol, kyqaninx kye kychmil max kyja; porke jun ch'ixb'il tu'n tyolin jun xu'j kyxole ok tok kychmon kyib'e.

36¿Baqa kyxole ma tz'etz tyol Dios? ¿Ex baqa o'kx kyuk'ile ma pon tyol Dios?

37Qa at jun okslal tuj tnab'l qa pakb'al ex qa at toklen tu'n Xewb'aj Xjan, tz'elx tnik' ti'j aju ma txi ntz'ib'ane kyeye, te Qajaw tmandamyent.

38Ex qa at jun minti' nne'l tnik' ti'j jlu, ikxlo te mlay k'met ju tyol.

39Kyja'tzun erman, tz'ok tililx kyu'ne tu'n tten kyoklene tu'n t-xi kychik'b'a'ne aju in tzaj tma'n Dios kyeye, ex mi'n txi kymayo'ne qe erman tu'n kyyolin tuj junxitl yol.

40Ex kyb'inchame tkyaqil tuj tumel ex tuj ttxolil.