Abdías 1 - Mam Huehuetenango New Ortography

Kb'el kycastiw aj Edom

1Atzun tqanil lu tzaj tma'n Qman Dios te Abdías kyi'j aj Edom, chi kyja':

Ma qb'i jun tqanil tu'n Qman, ma txi sama'n jun sanjel q'malte kyuj qe nasyon kyja': Chux qeye, qo'qe q'ojlel kyi'j aj Edom, chi sanjel.

Chi Qman in tma'n kyja' kye aj Edom:

2Che okel nq'o'ne te ch'in kyoklene kyxol txqantl nasyon ex che elel ik'une kyu'n.

3Tu'nx ju kynimb'il kyib'e ma che kub' sb'u'ne. Najl qeye tuj tpa'xil pik ex kyjax kyjaye kywi witz, ex tu'ntzunju in kyma'ne: ¿Alkye jun jaku kub' qi'j tu'n?

4Maske che jax laq'e'ye wen ik tza'n jun t'iw, ex maske kub' kyq'o'ne kyq'u'ye kyxol qe che'w, maxtzun ma chixin che tzajel nxo'ne, chi Qman.

5Noqwit eleq' qeju che ul elq'alte kyi'je te qonik'an, mlaylo txi kyi'n tkyaqilju at kyeye; noqwit xilil twitz uva qeju che ul kyi'je, jakulo kyaj kyq'o'n junjun rasim twitz uva. Ex atzun qe aj q'oj kyi'je jumajx ma che naje kyu'n.

6Aqeye tiyjil Esaú, kxel q'i'n tkyaqilju at kyeye. Kxel elq'a'n tkyaqil kyq'inumab'le.

7Kykyaqil qe xjal mojl kyyole kyuk'il che kb'el sb'u'ne kyu'n; che elex lajo'ne twitz kytx'otx'e kyu'n. Ex ajunpe qe kyamiwoye kjawil kyi'n kyib' kyi'je, ex qe kyamiwoye q'uql kyk'u'je kyi'j kb'el kyq'o'n k'ob'il tuj kyb'eye. Minti' kynab'l qe aj Edom.

8Chi Qman in tma'n: Ok tkub' kycastiw qe aj Edom wu'ne, che najel kykyaqil qe xjal at kynab'l, aqeju ate' kyxol, ex k'elel wi'ne kyojtzqib'l xjal, aqeju ate' tuj tiwitz tx'otx' kye tiyjil Esaú.

9Qe xinaq aj Temán, aqeju kyuw kyk'u'j tuj q'oj, che tzajel lu'lun tu'n kyxob'il, ex qeju ate' tuj tiwitz tx'otx' kye tiyjil Esaú, mi jun kyjel anq'in.

Aju il kyb'incha aj Edom

10Kb'el kych'ixwiye ex jumajx che najele tu'nju el kyelq'a'ne aju at kye tiyjil Jacob, aju kyermaniye, ex kub' kyb'yo'ne.

11Tej tetz kyi'n aj q'oj aju q'inumab'l at tuj tnam, tej kyokx pa'n qe tlamel tnam Jerusalén kyu'n qe soldad tzajni qe tuj juntl tnam, atzun kyeye noq xi kyke'yine. Tej tjaw kyi'n swert ti'j tu'n tel kyi'n aju at kye aj Jerusalén ex tej t-xi kyi'n kyq'inumab'l, ax ikxtzun kyb'inchaye ik tza'n kyb'incha qe aj q'oj.

12Miwt e jaw tzalaje tej ttzaj mya b'a'n kyib'aj kyermaniye aqeju aj Judá; miwt e jaw tzalaje tej tkyile tej kynaj, ex miwt e xmayine kyi'j tej ttzaj nim b'is kyi'j.

13Miwt e okxe tuj tnam etzan wu'ne tej ttzaj yajb'il kyi'j ex miwt e tzalaje kyi'j tej ttzaj xitb'il kyib'aj ex tej ttzaj ju mya b'a'n kyib'aj, ex miwt xi kyelq'a'ne kyq'inumab'l tej ttzaj xitb'il kyib'aj.

14Miwt e kub' we'ye kyuj tcrusil b'e tu'n tkub' kyb'yo'ne qe xjal in che etz tzoqpaj, ex miwt xi kyq'o'ne qe xjal in che el oq tuj kyq'ab' aj q'oj tej ttzaj xitb'il kyib'aj.

15Ma tzul laq'e' tq'ijlalil tu'n tul Qman tu'n kyok kykyaqil nasyon tuj xjel tu'n. Aqeye aj Edom, aju ma kyb'inchaye kyi'j txqantl, axtzun kb'antel kyi'je, ok kyk'ma'ye aju chojb'il kyeye ti'j kyb'inchb'ene mya b'a'n.

16Aqeye aj Israel, tu'nju puro k'a aju tku'x tuj copa, aju xi kyk'a'ne twi' ju witz xjan etzan wu'ne, axtzun k'a aju tku'x tuj copa kxel q'ot kye txqantl nasyon, aju kukx kxel kyk'a'n ex che najel te jumajx.

Che jawil nimsa'n qe aj Israel

17Ex at junjun che kletel twi witz Sión ex k'okel ju witz lu te jun lugar xjan. Aqe tiyjil Jacob ktzyetel juntl maj kyu'n aju tx'otx' etzan kyu'n nej.

18Qe tiyjil Jacob ik che okel ik tza'n q'aq', ex qe tiyjil José ik che okel ik tza'n tqan q'aq', ex atzun qe tiyjil Esaú ik che okel ik tza'n tqan triw jurat in b'aj tz'e'y. Jumajx che b'ajel tz'e'y tu'n q'aq' lu, mi jun tiyjil Esaú kyjel klet. Aqine Dios in chin q'mante jlu.

19Qe aj Israel ate' tuj tx'otx' Néguev ktzyetel aju tiwitz tx'otx' kyu'n, aju kytx'otx' tiyjil Esaú, ex qeju najl tuj chq'ajlaj t-xe witz ktzyetel kytx'otx' aj Filisteo kyu'n. Ax ikx ktzyetel kytx'otx' aj Efraín kyu'n, tuk'ix kytx'otx' aj Samaria ex atzun qe aj Benjamín ktzyetel kytx'otx' aj Galaad kyu'n.

20Atzun txqantl aj Israel, aqeju otoq che pon q'in kyuj txqantl nasyon, ktzyetel kytx'otx' aj Canaán kyu'n tu'n tpon b'aj max tuj tnam Sarepta, ex qe aj Jerusalén, aqeju otoq che pon q'in tuj tnam Sefarad, che tzyetel qe tnam ate' tuj tx'otx' Néguev kyu'n.

21Qe xjal otoq che kamb'an ok che jawix twi witz Sión tu'n tkub' kyq'o'n kysentens qe xjal najl tuj tiwitz tx'otx' kye tiyjil Esaú ex a Qman kkawil tib'aj tkyaqil.