Jueces 5 - Mam Huehuetenango New Ortography

Aju kyb'itz Débora ex Barac

1Tuj q'ij lu, ate Débora tuk'ix Barac aju tky'ajal Abinoam xi kyb'itzan jun b'itz kyja':

2Kynimsa'nktze tb'i Qman kykyaqile, ex kyxol aj Israel at qe xjal in xi kyq'on kyib' tu'n kyok te nejenel, ex qe tnam xjal kyu'nx in xi kyq'on kyib' tu'n kyxi' tuj q'oj.

3Kyb'intze nyole aqeye rey. Chin kyb'intze aqeye kawil. Chin b'itzale te Qman. Chin b'itzale te Kydios aj Israel.

4Nman, tej tku'tza twi witz Seir, tej tik'a tuj tx'otx' Edom, b'i'x tzaj lu'lun tx'otx', ex nim jb'al tzaj twitz kya'j; tzaj tchitun muj nim jb'al.

5E tzaj lu'lun qe witz twitz Qman, ex tzaj lu'lun witz Sinaí twitz Qman aju Kydios aj Israel.

6Tuj tq'ijlalil Samgar aju tky'ajal Anat, ex tuj tq'ijlalil xu'j Jael, qe b'etin xjal kyaj kykolin qe ninb'e ex tuj ẍokin b'e xob'ajilxix e b'et.

7Qe aldey kyxol aj Israel e kyaj kolin te jumajx. Ex maxitzun in jaw we'ye, aqine Débora, tu'n woke te txub'aj kye aj Israel.

8At junjun jaw kysk'o'n juntl kydios, ex tu'ntzun jlu e ul aj q'oj q'ojlel ttzi tlamel tnam, ex kyxol 40 mil xinaq aj Israel misikyer jun maqb'il te kolb'il ex mi jun lans te q'ojb'il q'i'n kyu'n.

9At nk'u'je kyi'j qe nejenel ate' kyxol aj Israel, ex kyi'j qeju kyu'nx in xi kyq'on kyib' tu'n kyxi' tuj q'oj. Kynimsa'nktze tb'i Qman kykyaqile.

10Aqeye in che b'ete kyib'aj qe ttxu bur saq kyi'j; aqeye in che kub' qe'ye tib'aj jun xb'alun tb'anilxix ex pim; ax ikx kyeye, aqeye b'etin xjal, che ximane ti'j jlu:

11Ma jatum ta' kyk'ab'l wakẍ a', matzun in che q'ajt qe xjal xo'l plech, in nimsanjtz tb'i Qman tu'nju ma kamb'an kyi'j aj q'oj; ex ma kamb'an Qman kyuj qe aldey kye aj Israel. Tu'n jlu b'a'n tu'n kypon qe xjal etzan tu'n Dios ttzi tlamel kytanmi.

12Q'imel twatla Débora, q'imel twatla ex b'itzanxa jun tb'itza. Atzun teya Barac tky'ajal Abinoam, we'ktza, ex q'inxa qe xjal ma che tzyet tu'na tuj q'oj.

13E ku'tztzun aj Israel otoq che kyaj ten, tu'n kyq'ojin kyi'j qe xjal ma' kyoklen; e ku'tz qe xjal etzan tu'n Dios, ex kyuw kyk'u'j tu'n kyq'ojin kyi'j xjal at nimxix kyipun.

14At junjun xinaq kyxol tiyjil Efraín e tzaj tuj tx'otx' jatum otoq che ten aj Amalec nej, ex kyi'jx qe jlu e je'x lpe' qe soldad aj Benjamín. Kyxol tiyjil Maquir e ku'x qe nejenel, atzun kyxol tiyjil Zabulón e ku'x qe kawil.

15Kyuk'ix qe nejenel kyxol tiyjil Isacar e je'x tuk'il Débora, ex e je'x lpe' ti'j Barac tu'n kyku'pun tuj chq'ajlaj. Kyxol ela' k'loj tiyjil Rubén noq e kub' ten ximal ti'j tu'n kyxi'.

16¿Tiqu'ntzun ma che kyaj ten kyxol kype'n ẍne'l, in che b'in kyi'j qe pastor in che txokon kyi'j kyẍne'l? Kyxol ela' k'loj tiyjil Rubén noq e kub' ten ximal ti'j.

17Qe aj Galaad max e kyaj ten jlajxi nima Jordán, ex qe tiyjil Dan ax e kyaj ten jatum ate' qe barc, atzun qe tiyjil Aser max e kyaj ten tuj kytanmi ma ttzi mar, ex minti' e yukch tuj kylugar.

18Atzun qe tiyjil Zabulón ex qe tiyjil Neftalí xi kyq'on kyib' tu'n kykyim tej kyq'ojin twi witz tuj kojb'il.

19E ultzun qe rey tu'n kyq'ojin, e ultzun qe kyrey aj Canaán tuj Taanac aju tkub' ttzi tq'ab' xaq tuj chq'ajlaj Meguido, ex e q'ojin, ex minti' o kykamb'a saq pwaq ex mi q'inumab'l.

20Max twitz kya'j ex max jatum in che b'et qe che'w twitz kya'j, e ok ten qe che'w q'ojlel ti'j Sísara;

21kykyaqil aj q'oj e b'aj naj tu'n tq'ab' xaq Cisón, ojtxi tq'ab' xaq aju tq'ab' xaq Cisón. Aya wanmi q'onku b'eya tuk'il nim tipumala.

22Nb'ok'in t-xi' kyqan chej nim kyipun ok in che qelan wen.

23Ex chi t-anjel Qman tma: E tkub' tz'aq jun nintz castiw tib'aj aldey Meroz ex kyib'aj qe xjal najlqe tuj, tu'nju minti' e tzaj onil te Qman tu'n tq'ojin kyi'j qe xjal kyuw kyk'u'j tuj q'oj.

24Atzunte Jael aju t-xu'jil Heber aju aj Quenita, ky'iwla'nxwit kyxol txqantl xu'j, ky'iwla'nxwit xu'j lu kyxol qe txqantl xu'j najlqe kyuj ja xb'alun.

25A' xi tqanin Sísara te tk'a; atzunte Jael lech xi tq'o'n te. Tzotz twitz lech xi tq'o'n tuj jun vas tb'anilxix.

26Tzaj ti'n jun stak tu'n tnayaj ex tzaj ti'n jun pajb'il tu'n tb'anq'ab'; aq'pontzun tpajo'n stak t-xe t-ẍkyin Sísara, o xoptz'aj twi' ex b'i'x elpun stak tuj juntl plaj twi'.

27T-xe tqanx Jael xi t-ẍokon tib' Sísara; tej t-xi t-ẍokon tib' tu'n ta'w twi' kub' tz'aq twitz tx'otx', ex axtzun jatum kub' tz'aq axtzun kyim.

28In b'isuntoq ttxu Sísara ti'j, etz tke'yin ttzi ventan ex tma: ¿Tiqu'n ntz'ininx tzul tcarwaj wale? ¿Ex tiqu'n na'nx kyq'ajt kyrued carwaj in che ajb'en tuj q'oj? Chi ttxu Sísara.

29Qe xu'j aj nab'l ate' tuk'il in kyma'ntoq, ax ikx te ttxu Sísara in ximantoq ti'j kyja':

30Ax tok malo in kub' kysipan qe ti'xti aju ma kykamb'a kyi'j qe xjal tuj q'oj, junlo q'apoj ex qa kab'e ma tz'ok te junjun soldad, ex telo Sísara ma tz'ok ju xb'alun aju at nim tilb'ilal tok ti'j; qe xb'alun ela' tilb'ilal tok kywitz, aju junxilchaq tilb'ilal kywitz junjun pak', junlo xb'alun ex qa kab'e ma tz'ok te junjun nejenel, aqeju ma tz'el kyi'n kykyaqil ti'xti kye aj q'oj, chilo ttxu Sísara.

31Kyja'wt che tenb'a kykyaqil qe aj q'oj ti'ja Nman; atzun qeju in che k'ujlan teya, ikwit che ok ik tza'n tqan q'ij ok in jawil qoptz'aj, chi Débora tuj tb'itz.

Te tib'ajxi jlu, minti' q'oj ok tuj tx'otx' lu tuj 40 ab'q'i.