Deuteronomio 31 - Mam Huehuetenango New Ortography

Kyaj ten Josué te t-xel Moisés Números 27.12-23

1O yolin Moisés juntl maj kyuk'il kykyaqil aj Israel ex xi tma'n kye kyja':

2Ma chin japune twi' 120 ab'q'i, ex mlay chin kub' nejtle kywitze. Ax ikx o tzaj tma'n Qman weye kyja': Mlay tz'ikxa jlajxi nima Jordán, chi Qman.

3Axte Qman Dios kb'el nej kywitze, ex kywitzxe che najel qe nasyon lu tu'n, tu'ntzun kyoke tajwil kytx'otx'. Ate Josué k'okel te nejenel tu'n tkub' nej kywitze ik tza'nx o tma Qman.

4Ok tb'incha' Qman kyi'j qe nasyon lu ik tza'nx o tb'incha ti'j Sehón ex Og, aqeju rey kye aj Amorreo; e naj qe jlu tu'n, kyuk'ix kytanmi.

5Che tzajel tq'o'n Qman qe nasyon lu tuj kyq'ab'e. Kyb'inchame kyi'j ik tza'nx o txi nma'ne kyeye.

6Tenx kyipune ex kyuwx kyk'u'je, mi'n che xob'e ex mi'n tzaj b'aj kyk'u'je ok kypon we'ye kywitz, ex ktel Qman Dios kyuk'ile; mlay che kyaj q'o'ne ex mlay che kyaj koline tu'n.

7Tzajtzun txko'n Josué tu'n Moisés, ex kywitz kykyaqil aj Israel xi tma'n te kyja': Tenx tipuna ex kyuwx tk'u'ja, porke aya kb'el nej kywitz xjal lu tu'n kypon tuj tx'otx' aju tzaj ttziyan Qman kye kyxe'chel tu'n ttzaj tq'o'n kye. Aya kb'el sipante kyetzb'il.

8Axte Qman kb'el nej twitza ex ktel tuk'ila; mlay kyaj q'o'na tu'n, ex mlay kyaj kolina tu'n. Tu'ntzun jlu, mi'n xob'a ex mi'n b'aj tk'u'ja.

Tu'n tjaw sch'it libro te ley tuj ab'q'i te najsb'il k'as

9Kub' ttz'ib'an Moisés aju ley lu ex xi tq'o'n kye pal aj Leví, aqeju tok kyoklen tu'n t-xi kyi'n aju kax k'ub'l tley Dios, ax ikx xi tq'o'n kye kykyaqil tij xjal kyxol aj Israel,

10ex xi tma'n kye kyja': Tuj wuqchaq ab'q'i, ok tjapun ab'q'i te najsb'il k'as, tuj ninq'ij ok kyjaw b'inchet qe ja t-xaq tze'yin kywi',

11ok tok kychmon kyib' kykyaqil aj Israel twitz Qman Dios tuj lugar kjawil t-sk'o'n, kjawiltzun kysch'i'ne libro te ley lu kywitz.

12Kykyaqil xjal il ti'j tu'n kyok chmet, tza'nx qe xinaq ikx qe xu'j, qe k'wa'l ex qe stranjer xjal ax najl kyxole, tu'ntzun kyb'inte ok tjaw sch'it libro te ley, tu'n tb'ant kyniman te Qman Dios, ex tu'n tjapun kyu'n tkyaqilju in tma'n ley,

13tu'ntzun kyb'inte qe k'wa'l aqeju na'nxtoq kyb'inte, ex tu'n tb'ant kyniman te Qman Dios tuj tkyaqil q'ij ok kyten twitz tx'otx', aju ktzajel q'o'n kyeye kyik'xlenxiye tuj nima Jordán.

Xi tma'ntl Qman te Moisés alkye tu'n tb'ant tu'n

14Tzaj tma'n Qman te Moisés kyja': B'intza, in laq'e' ttzaj tq'ijlalil tu'n tkyima. Tu'ntzun jlu txkontza Josué, ex kykab'ile kyxi'ye tuj ja te mojb'ab'l tib'il tu'ntzun t-xi nma'ne te alkye tu'n tb'ant tu'n.

Xi'tzun Moisés tuk'ix Josué, ex e okx tuj ja te mojb'ab'l tib'il.

15Tujtzun ja lu kub' tyek'un tib' Qman kywitz tuj txqan muj kub' ten ttzi ja.

16Tmatzun Qman te Moisés kyja': Ch'ix tpon tq'ijlalil tu'n tkyima. Qe xjal lu k'elel kypa'n kyib' wi'je, ok che okel ten k'ulul kywitz kydios xjal tuj tx'otx' jatum che pol; atzun weye chin kyjel koline kyu'n ex mlay japun kyu'n aju yol kyaj b'ant ti'j wu'ne kyuk'il.

17Oktzun tel kypa'n kyib' wi'je ktzajel nimxix nq'oje kyi'j, che kyjel nkoline, k'elel wewan wib'e kywitz ex che najel kykyaqil, ktzajel nim mya b'a'n kyib'aj ex nim yajb'il kye tzul. Maxitzun ok kyma': ¿Myapelo tu'nju mi a'l Dios quk'il o tzaj tkyaqil mya b'a'n lu qib'aj?

18Ok tb'ant tkyaqil jlu kyu'n, ax tok k'elel npa'n wib'e kyi'j tu'n tlaj tkyaqil mya b'a'n otoq kyb'incha, ex tu'n tlaj otoq che k'ulun kywitz junxitl dios.

19Ja'lotzun, kytz'ib'an kub'e aju b'itz lu ex kyxnaq'tzanxe kye aj Israel, tu'ntzun t-xi kyb'itzan ex tu'n tok b'itz lu te jun testiw wu'ne kyi'j,

20ex kyokxlenxi nq'o'ne tuj tx'otx' aju xi ntziyane kye kyxe'chele, aju tx'otx' q'inunxix ex tb'anilxix, atzun che nojel wen ex che gordyixel, ex oktzun kynoj wen che okel lpe' kyi'j junxitl dios ex che k'ulul kywitz, atzun weye chin elel ik'une kyu'n, ex mlay japun kyu'n aju yol ma kyaj b'ant ti'j wu'ne kyuk'il.

21Oktzun ttzaj nim mya b'a'n ex yajb'il kyib'aj, atzunju b'itz lu k'okel te testiw kyi'j, porke ktzajel kyna'n ex kxel kyb'itzan qe kyiyjil che ul itz'j te tib'ajxi. Tej na'nxtoq kyokx nq'o'ne tuj tx'otx' o txi ntziyane kye, ya b'a'ntl wu'ne alkye kyximb'etz, chi Dios.

22Tujx q'ij lu kub' ttz'ib'an Moisés aju b'itz lu, ex xi t-xnaq'tza'n kye aj Israel tu'n tb'ant kyu'n.

23Xitzun tma'n Qman te Josué aju tky'ajal Nun, chi kyja': Tenx tipuna ex kyuwx tk'u'ja, porke aya k'okex q'inte kye aj Israel tuj tx'otx' o txi ntziyane kyeye, ex aqine chin tel tuk'ila.

24Tej tb'aj ttz'ib'an Moisés tkyaqil ley lu tuj jun libro,

25xi tma'n kye aj Leví aqeju at kyoklen tu'n t-xi kyi'n kax k'ub'l tley Dios, ex chi kyja':

26Kyi'nxe aju libro lu jatum tz'ib'an ley, ex kyq'onkuye ttxlaj kax k'ub'l tley Dios tu'ntzun ax tu'n tten te jun testiw kyi'je.

27B'a'n wu'ne, aqeye jun k'loj xjal mib'an che niman ex kyuw kywi'ye. Qatzun minti' ma txi kynimane Qman akux itz'x qine kyxole, pyortzunlo kyu'ne ok nkyime.

28Kyi'ntze kykyaqil qe tij xjal ex qe nejenel kyxol kykyaqil k'loj kyiyjile, tu'ntzun t-xi nma'ne tkyaqil yol lu kye, ex che okel nq'o'ne kya'j ex tx'otx' te testiw kyi'j.

29B'a'n wu'ne, nkyimlenxiye che elel txalpuje ex kyjel kykoline b'e otoq txi nma'ne kyeye. Ax ikx b'a'n wu'ne, tzul mya b'a'n kyib'aje tu'n tlaj mya b'a'n otoq kyb'inchaye twitz Qman, ex tzul tq'oj kyi'je tu'n tlaj kyb'inchb'ene mya b'a'n, chi Moisés.

Aju tb'itz Moisés

30Xitzun tma'n Moisés aju b'itz lu kye kykyaqil aj Israel otoq b'aj kychmon kyib', tzajx qe' tu'n t-xe tnejel tejxi tpon b'aj: