Ezequiel 22 - Mam Huehuetenango New Ortography

Aqeju mya b'a'n kyb'incha aj Jerusalén

1Tzaj yolin Qman wuk'ile ex tma kyja':

2Aya xjal, q'onkuya t-sentens tnam nojni tu'n b'yol xjal. Q'manxa tkyaqil kyb'inchb'en mya b'a'n ex ik'b'ilxix,

3ex kxel tma'na kye kyja': Atzun jlu in tma'n Qman: Aqeye aj Jerusalén in kub' kyb'yo'ne kyxjalile ex in kub' kyb'incha'ne qe tilb'ilal te kydiose, tu'n jlu in b'aj kytz'ilsan kyib'e, ch'ix tul kanun or tu'n kynaje.

4Tu'nju tkub'len kyb'yo'ne xjal ma che oke at kyile, ex kyu'n qe tilb'ilal in kub' kyb'incha'ne ma b'aj kytz'ilsan kyib'e; tu'nju mya b'a'n in b'ant kyu'ne ma tzul laq'e' or tu'n kynaje ex ma pon b'aj kyq'ijlalile. Kyja'tzun kxel nq'o'ne amb'il tu'n kyok yaso'ne kyu'n txqantl tnam ex tu'n kyok xmayine kyu'n kykyaqil nasyon.

5Qe nasyon niqayin ate' ex qeju najchaq ate' ok che xmayil kyi'je tu'nju mya b'a'n yolb'il kyeye ex mya tuj tumel kyb'inchb'ene.

6Qe kawil kyxol aj Israel, tu'nju at kyoklen, in kub' kyb'yo'n nimku xjal.

7Qe xjal najlqe tuj tnam Jerusalén nne'l kyik'un kyman ex kytxu', in kyb'incha'n mya b'a'n kyi'j qe stranjer xjal, in b'aj kyyajla'n qe xjal minti' kyman ex kytxu' ex qe meb'a xu'j.

8Mya xo'n kyu'n qe lugar xjansa'maj wu'ne ax ikx qe q'ij te ojlab'l.

9Tu'n si'mj yol in che kyim xjal kyu'n; in che wa'n ti'j jun nintz wa'n in kub' ik'san kywi' qe witz te nimsab'l kye tilb'ilal, ex in kyb'incha'n aju puro plojxix.

10At junjun in che yaẍin tuk'il t-xu'jil kyman, ex qa kyuk'il qe xu'j tuj tq'ijlalil ok in k'u'l ẍwo'j kyi'j.

11At junjun in kyb'incha'n aj pajil tuk'il t-xu'jil kyuk'il, ex junjuntl in che kub' tan tuk'il kylib', a jlu ch'ixb'ajilxix, ex junjuntl in che yaẍin tuk'il tme'jel kyman.

12At junjun aj Jerusalén in kyk'mo'n pwaq tu'n tkub' kyb'yo'n qe xjal, ex at junjun in xi kyq'o'n kypwaq te ch'ex ex nim ta'l nne'l kyi'n, in b'aj kyyajla'n qe kyuk'il tu'n kyok te q'inun, ex nnik' nna'njtze kyu'n. Aqine Dios in chin q'mante jlu.

13Nim in chin q'ojine kyi'je tu'n tlaj in b'aj kyyajla'ne qe xjal ex tu'n tlaj ju in kub' kyb'yo'ne qe xjal.

14¿K'ik'expe kyu'ne ex ktelpe tipun kyq'ab'e ok tpon tq'ijlalil tu'n tkub' kycastiwoye wu'ne? Aqine Dios in chin q'mante jlu ex kjapunel wu'ne:

15Che xel nsputune kyuj kykyaqil nasyon ex kyuj kykyaqil tnam, ex kb'ajel ntx'jo'ne tkyaqilju kytz'ilile.

16Ktzajel kych'ixwiye kyxol qe nasyon, ex k'elel kynik'e ti'j, aqine Dios.

17Tzaj yolin Qman wuk'ile ex tma kyja':

18Ik kyten aj Israel te weye ik tza'n tz'is in jaw tib'aj q'an k'uxb'il, estaño, k'uxb'il, plom ex qa saq pwaq, ok tokx q'o'n tuj q'aq'.

19Kyja'tzun aqine Dios in xi nma'ne jlu: Tu'nju kykyaqile ma che oke ik tza'n tz'is minti' tajb'en, kyja'tzun che okel nchmo'ne tuj tnam Jerusalén,

20ik tza'n saq pwaq, q'an k'uxb'il, k'uxb'il, plom ex estaño junx in che okx q'o'n tuj q'aq' ex in jaw xupit q'aq' kyi'j tu'n kykub' ulj, kyja'tzun weye ktzajel nim nq'oje, che okel nchmo'ne tuj tnam ex che b'el ulje wu'ne.

21Ax tok ktzajel nim nq'oje ex kjawil nxupine q'aq' kyi'je, ex che okel nchmo'ne tuj tnam tu'ntzun kykub' ulje tu'n q'aq'.

22Ik tza'n in kub' ulj saq pwaq tuj q'aq', kyja'xtzun che b'el ulje tuj tnam, ex kyja'tzun k'elel kynik'e ti'j, aqine Dios ma tzaj nim nq'oje kyi'je.

23Tzaj yolin Qman wuk'ile ex tma kyja':

24Aya xjal, q'manxa kye aj Israel kyja': Aju kytanmiye tkub' jun castiw tib'aj, minti' in tzaj jb'al ex minti' a' tuj,

25qe kawil ate' kyxole ik kyten ik tza'n b'alun in che tzanun ex in b'aj kytzaqan kykanb'; tuj kytanmi in kub' kyb'yo'n qe xjal, nne'l kyelq'a'n kyq'inumab'l xjal ex in che kyaj ten nimku xu'j meb'a kyu'n tu'nju otoq kub' kyb'yo'n kychmil.

26Qe pal ate' tuj tnam lu in b'aj kych'expu'n qe nleye ex in b'aj kytz'ilsa'n qe ti'xti xjansa'maj wu'ne; tuj kywitz junx ta' ju xjan tuk'il ju tz'il, ex minti' in kyq'o'n xnaq'tzb'il kye xjal tu'n tel kynik' ti'j alkye saq ex alkye tz'il. Minti' in xi kyniman aju q'ij te ojlab'l ex minti' ma chinx kyniman.

27Qe nejenel tuj tnam lu ik kyten ik tza'n qe xo'j in b'aj kytzaqan kykanb', b'anin kyten tu'n kykub' kyb'yo'n qe xjal tu'ntzun kyok te q'inun.

28Qeju nno'k kyq'on kyib' te nsanjele in kub' kyewan aju il in b'ant kyu'n xjal; ik tten jlu ik tza'n nno'k q'o'n tk'a' jun tkajonil ja; in kyma'n qa at in tzaj yek'un kye ik tza'n tuj witzik' ex in kyma'n tqanil ju tzul ex minti' in japun. Ex in kykyuwsa'n qa aqine in chinx q'mante ju yol kye, ex minti' we in chin yolin kyuk'il.

29Qe xjal ate' tuj tnam in b'aj kyyajla'n qe kyuk'il ex in che elq'an; nne'l kyi'n qe ti'xti at kye meb'a xjal ex kye qeju minti' at kye; in kub' kyyajla'n qe stranjer xjal ex minti' in xi kyb'incha'n kyi'j.

30O chin jyone ti'j jun xjal kyxol aj Jerusalén tu'n tjaw tb'incha'n aju muro jatum otoq kub' xitj, ex tu'n tkub' ten nwitze tuj tpa'xil, tu'ntzun mi'n tnaj tnam wu'ne, ex minti' o knet jun wu'ne.

31Kyja'tzun ma kub' kycastiw wu'ne ex ma che naj wu'ne tu'n nq'oje mer ik tza'n q'aq', tu'n tlaj kyb'inchb'en mya b'a'n. Aqine Dios in chin q'mante jlu.