Job 19 - Mam Huehuetenango New Ortography

Juntl tyol Job kye tamiw

1-2Tmatzun Job:

¿Jtojtzun txi kykoline tu'n kyyajlane wi'je ex tu'n nk'ixb'isanjtze tu'n kyyole?

3Ela' majxi chin ok kyik'le'ne; ¿minti'pe in tzaj kych'ixwiye tu'nju in kyb'incha'ne wi'je ikju?

4Ex maske at wile, pero o'kx weye kb'el ncastiwoye tu'n tlaj.

5Atzun kyeye nno'k kyq'on kyib'e mas b'a'n nwitze, ex nno'k kyma'ne tib'aj nwitze aju yajb'il weye.

6Tz'elx kynik'e ti'j, ate Dios ma tzaj q'onte yajb'il wi'je, ex tu'n Dios ma chin okx q'o'ne tuj k'ob'il.

7Maske in chin jaw sch'ine: At jun nno'k tzoqpaj wi'je, nchiye, pero mi a'l in tzaj tzaq'wente weye; in chin qanine onb'il ex mi a'l in xi b'inchante wi'je.

8Ma b'aj maqo'n nb'eye tu'n Dios tu'n mi'n wexe; ex kyuj qe tq'ab' nb'eye puro qlolj ma tz'ok tu'n.

9Ma tz'el ti'n tkyaqil nq'inumab'le, ex ma tz'el ti'n woklene.

10B'i'x ma chin naje tu'n, ik tza'n jun ja in kub' xitj. Ik ma chin oke tu'n, ik tza'n jun tze' in jatz lakut tlok'; minti' jatum tu'n tok qe' nk'u'je.

11Ma tzaj nim tq'oj wi'je ex ma chin ok q'o'ne tu'n ik tza'n jun aj q'oj.

12Ma che tzaj tlajo'n kykyaqil t-soldad wi'je; ma che kub' ten ti'jele njaye ex ma b'ant kyten tu'n kyok tzoqpaj wi'je.

13Tu'n Dios ma che el tlaq'b'a'n qe wermaniye ex qe wamiwoye wi'je, ex ma chin ok kyq'o'n ik tza'n minti' ojtzqi'n qine kyu'n.

14Qe xjal at nxilene kyuk'il ma chin kyaj koline kyu'n, ex qe wamiwoye ma tzik' nna'njtze kyu'n.

15Qeju najl tuj njaye kyuk'ix qe nmajene xu'j, mer ik tza'n minti' ojtzqi'n nwitze kyu'n, mer minti'tl nne'l kynik' wi'je.

16Qa ma tzaj ntxko'ne jun nmajene xinaq, minti'tl in chin tzaj ttzaq'we'n maske ma chin kub'sane twitz.

17In chin el ik'une tu'n nxu'jile tu'n tlaj nim t-xew nxewe tuj ntzi'ye; ex minti' in che ul laq'e' qe wermaniye ntxlaje tu'n tlaj nyab'ile.

18Ax ikx qe tal q'a in chin el ik'une kyu'n; ex matoq in chin jaw we'ye, lu qe in che xmayin wi'je.

19Qe xjal merxix wamiwoye ma chin el ik'une kyu'n; ex qeju k'ujla'nxix wu'ne ma jaw kyi'n kyib' wi'je.

20Ma chin ok tzqije wen, minti' nchib'jale, o'kx nb'aqile at ex pen ma chin kyaj anq'ine.

21Tzaj tz'e'y kyk'u'je wi'je, aqeye wamiw, porke tu'n Dios ma chin k'ixb'isanjtze.

22¿Tiqu'n in che yajlane wi'je ik tza'n in tb'incha'n Dios? ¿B'ajxpetzun jatz kyganiye tu'n kyyajlane wi'je; baqa noq jun majxi jlu?

23Noqwit at jun kub' tz'ib'ante nyole ex tu'n tkyaj tz'ib'et tuj jun libro.

24Noqwit at jun kub' tz'ib'ante twitz plom ex qa twitz ab'j tu'n jun tal k'uxb'il tz'u'p twi', tu'n tkyaj ten te jumajx.

25B'a'n wu'ne aju kolol wi'je itz'te, ex kkolil wi'je tzalu twitz tx'otx'.

26Ex maske ma naj nchib'jale, pero akuwe qin chin ke'yil twitz Dios.

27Aku qine chin ke'yilte kyu'n qe tb'aq' nwitze, ex mya junxitl. Nimxix waje tu'n tok nke'yine.

28Ex qa ma kymaye: ¿Alkye tumel tu'n tkub' ti'j tnab'l qu'n? Tu'nx til Job ma tzaj ju yajb'il ti'j, qa che chiye.

29Tu'ntzun jlu che xob'e twitz spad, porke aju spad lu atzun in ajb'en tu'n Dios tu'n tkub' tcastiw xjal mya b'a'n. Tz'elx kynik'e ti'j qa at jun jwes tu'n t-xi b'inchante wi'je.