1Nman Dios, na'ntza David ex na'ntza aju yajb'il te;
2na'ntza ju tyol axix tok xi ttziyan teya, aya Tdios Jacob nim tipumala.
3Mlay chin okxe tuj njaye ex mlay chin kub' koẍe'ye ojlal;
4mlayx kub' nmaltz'u'ne nwitze ex mlay chin ik' tane jun rat,
5qa na'nxtoq tb'ant jun tnajb'il Qman wu'ne, aju Tdios Jacob at nim tipumal, chi David tma.
6Tuj Efrata o qb'iye tqanil ti'j kax k'ub'l tley Dios, ex o knet qu'ne tuj kojb'il te tnam Jaar.
7Qo'qe tuj lugar jatum ta' tnajb'il Dios ex qo ẍmeje'k twitz tq'uqb'il.
8We'ktza Nman tuk'ix tkaxa at nim tipumal ex tzaja tuj lugar jatum tu'n tkub' tena te jumajx.
9Qe pal in che ajb'en teya, kukxwit che b'et tuj tumel, ex kukxwit che sch'in tu'n tzalajb'il qe okslal ti'ja.
10Noq tu'n tlaj ju yol xi ttziyana te David aju tmajena, mi'n tz'el tik'una ju rey sk'o'maj tu'na.
11Xi ttziyan Qman jun yol axix tok te David ex mlay ch'expet tu'n, ex tma kyja': Ax jun tk'wa'la k'okel nq'o'ne te rey te t-xela.
12Qa ma japun kyu'n qe tk'wa'la aju yol kyaj b'ant ti'j wu'ne tuk'ila, ex qa ma che japun qe nmandamyente kyu'n, aqeju kxel nxnaq'tza'ne kye, ikx qe kyk'wa'l che okel te rey te t-xela te jumajx.
13Aju witz Sión ax Qman jaw sk'onte. Jaw t-sk'o'n tu'n tajb'en te tnajb'il.
14Chi Qman tma: Atzun witz lu jatum waje tu'n ntene te jumajx; chin tele tzalu porke iktzun wajb'ile.
15Che b'el nky'iwla'ne qe xjal tu'n tchmet nim kywa ex knojel kyk'u'j qe meb'a xjal wu'ne.
16Che b'el nky'iwla'ne qe pal tuj tkyaqilju kyajb'eb'l, ex che b'itzal qe okslal tu'n tzalajb'il.
17Tzul itz'j jun kolol wu'ne kyxol qe tiyjil David aju sk'o'maj wu'ne, ex kukx ktel jun tk'wa'l te rey ik tza'n jun kandil minti' in yupj.
18Qe aj q'oj ti'j David kb'el nim kych'ixwi wu'ne, atzun te David kxel nq'o'ne tajwalil.
Who We AreWhat We EelieveWhat We Do
2025 by iamachristian.org,Inc All rights reserved.
