Deuteronomio 3 - Mam Huehuetenango New Ortography

Kub' ti'j Og aju rey te Basán, kyu'n qe aj Israel Números 21.31-35

1Xi qlajo'ntl qb'e, o jax tuj b'e in xi' tuj Basán, ex ate Og aju rey te Basán etz q'ojlel qi'j, kyuk'ix kykyaqil t-soldad, ex e jo'k tzoqpaj qi'j tuj tnam Edrei.

2Atzunte Qman tzaj tma'n weye kyja': Mi'n xob'a twitz, porke ma txi nq'o'ne tuj tq'ab'a kyuk'ix qe t-soldad ex tkyaqil ttx'otx'. B'inchama ti'j ik tza'nx o tb'inchaya ti'j Sehón aju rey kye aj Amorreo, aju najltoq tuj tnam Hesbón.

3Kyja'tzun tzaj tq'o'n Qman Dios aju rey Og tuj qq'ab', ex kykyaqil qe t-soldad. Kub' qb'yo'n kykyaqil ex mi jun kyaj anq'in qu'n.

4Ax ikx e tzyet kykyaqil tnam qu'n; mi jun o tzoqpaj. Tzyet 60 tnam qu'n tuj tkyaqil tx'otx' Argob, aqeju ate'toq tjaq' tkawb'il Og tuj tx'otx' Basán.

5Kykyaqil tnam lu ma' twa'l muro tok kyi'j; at kylamel ex tok k'uxb'il tzyulte kye; minti' e ok te tajlal qe tnam minti' muro kyi'j.

6Kykyaqil qe jlu b'i'x e naj qu'n, ik tza'nx otoq qb'incha ti'j Sehón aju rey te tnam Hesbón, ex kub' qb'yo'n qe xinaq, qe xu'j ex qe k'wa'l;

7o'kx qe alumaj ex kykyaqil ti'xti wi'yilxix at kye aj q'oj qi'j, e kyaj qklo'n tu'n tajb'en te qe.

8Kyja'tzun, tuj tq'ijlalil lu o jo'k te kyajwil qe tx'otx' tzyu'ntoq kyu'n kab'e rey aj Amorreo, aqeju najltoq tuj tumlal tjawitz q'ij te nima Jordán, tzajnix qe' ttzi tq'ab' xaq Arnón ex ponin b'aj max twi witz Hermón.

9(Aju witz lu, Sirión tb'i kyu'n aj Sidón, ex Senir tb'i kyu'n aj Amorreo.)

10E tzyet qu'n kykyaqil tnam kykub'sa'n tuj chq'ajlaj tuj tiwitz tx'otx', tuk'ix tkyaqil tx'otx' Galaad ex Basán, aju ponin b'aj max kyuj tnam Salca ex Edrei, aqeju ate'toq tjaq' tkawb'il Og tuj Basán.

11(O'kx te rey Og otoq kyaj anq'in kyxol kyiyjil xjal ma' kywa'l. Aju twatb'il puro k'uxb'il te kyaje var tnuqb'il ex var tuk' mey twitz. Ax ta' watb'il ja'lo tuj tnam Rabá tuj kytx'otx' aj Amón.)

Qe tiyjil Rubén, qe te Gad, tuk'ix mij te Manasés ax e kyaj ten tumlal tjawitz q'ij te nima Jordán Números 32.1-42

12Tejtzun ttzyet tx'otx' lu qu'n, xi nq'o'ne kye tiyjil Rubén ex kye tiyjil Gad aju tx'otx' xi'ynix tuj tnam Aroer, aju tkub' ttzi tq'ab' xaq Arnón ex ponin b'aj max tuj tmijil tx'otx' Galaad, kyuk'ix kykyaqil tnam ate' tuj.

13Atzun juntl piẍ tx'otx' Galaad, ex tkyaqil tx'otx' Basán aju tkyajsa'ntoq tjaq' tkawb'il rey Og, tuk'ix tkyaqil tx'otx' Argob aju toktoq tb'i kytx'otx' aj Refait, xi nq'o'ne kye mij tiyjil Manasés.

14(Ate Jair tiyjil Manasés ok te tajwil tx'otx' Argob, aju ponin b'aj max tuj tmojonil tx'otx' Gesur ex Maaca, ex tex tb'i ok tq'o'n ti'j tx'otx' Basán, atzun jlu: Havot-jair, ex axtzun tb'i toksa'n ja'lo.)

15Aju tx'otx' Galaad xi nq'o'ne te Maquir;

16atzun kye tiyjil Rubén ex kye tiyjil Gad xi nq'o'ne aju tx'otx' tkub'sa'n t-xol Galaad tuk'il tq'ab' xaq Arnón, ex atzun nne'x tmojonil tuj tmijil tq'ab' xaq, ex ponin b'aj max ttzi tq'ab' xaq Jaboc, aju tmojonil kytx'otx' aj Amón.

17Atzun ponin tmojonil kytx'otx' ttzi nima Jordán, tzajnix qe' ttzi lagun Cineret ex ponin b'aj max ttzi mar at tuj chq'ajlaj Arabá, ex nnik' ttzi'yile mar t-xe'yile witz Pisga tuj tumlal tjawitz q'ij.

18Xitzun nma'ne kyeye kyja': Ate Qman Dios ktzajel q'onte tx'otx' lu kyeye tu'n tok te kyetzb'ile. Kykyaqil qeju o b'ant kyq'ojin, kyi'nx kymakb'il in che ajb'en tuj q'oj, ex e kykub' nej kywitz qe kyerman ax aj Israel;

19o'kx qe xu'j kyuk'ix qe k'wa'l ex qe wakẍ che kyjel ten kyuj qe tnam o txi nq'o'ne kyeye, porke b'a'n wu'ne nimxix kywakẍe at.

20Okxi ttzaj tq'o'n Qman kye kyermaniye jun lugar jatum tu'n kyojlan, ik tza'n o tzaj tq'o'n kyeye, ikxtzun kye tu'n kyetzan ti'j tx'otx' aju ktzajel tq'o'n Qman kye jlajxi nima Jordán, maxitzun k'ajel meltz'aj teyle junjun kyeye tuj kyetzb'ile o txi nq'o'ne.

21Ax ikx xi nma'ne te Josué kyja': O tila tkyaqilju o tb'incha Qman Dios kyi'j kab'e rey; ikxtzun kb'antel tu'n Qman kyi'j kykyaqil qe kawb'il ate' jatum k'ik'el b'eta.

22Mi'n xob'a kywitz, porke ate Qman Dios ktel kyuk'ile tuj q'oj.

Minti' xi tq'o'n Qman amb'il te Moisés tu'n tokx tuj tx'otx' Canaán

23Tujx tq'ijlalil lu in kub'sane twitz Qman ex xi nma'ne te kyja':

24Nman, tu'na tzaj xe't tu'n ttzaj tyek'una tajwalila ex tipumala weye, aqine tmajena. Minti' juntl Dios at tuj kya'j mi twitz tx'otx' jaku b'ant tu'n ik tza'n qe teya taq'unb'en ex qe techal ma'xix kyxilen in che b'ant tu'na.

25In chin kub'sane twitza tu'n ttzaj tq'o'na amb'il weye tu'n wik'xe jlajxi nima Jordán, ex wajb'ile tu'n twile aju tb'anil tx'otx' at ma chixin, ex aju tiwitz tx'otx' tb'anilxix, ax ikx aju witz Líbano, nchiye te.

26Ex otoq jaw q'ojl Qman wi'je noq tu'n kyeye kylaj, ex minti' tzaj tb'i'n nyole, o'kx tzaj tma'n weye kyja': Mi'n kukx tyolina. Mi'n tzaj tma'na txqantl tyola weye ti'j jlu.

27Tjaxa twi witz Pisga ex ke'yinxa tx'otx' te jawni, te kub'ni, te elni ex te okni, ex tu'n tik'xa tuj nima Jordán, mi'n txi nq'o'ne amb'il teya.

28O'kx q'manxa te Josué alkye tu'n tb'ant tu'n, kyuwsanxa tk'u'j ex q'onxa tipun, porke ate Josué kb'el nej kywitz qe xjal, ex tu'n ktzyetel tx'otx' aju kxel tke'yina, tu'n tok te kyetzb'il.

29Axtzun o qo kyaj ten tuj chq'ajlaj tkub'sa'n tumlal twitz lugar Bet-peor.