Proverbios 20 - Mam Huehuetenango New Ortography

1Aju k'ab'j vin, tx'u'j nno'k kywi' xjal tu'n; ex aju q'e'n, b'i'x nne'l kynab'l xjal tu'n; tu'ntzun jlu minti' in kyb'incha'n jun ti'xti tuj tumel.

2Ok in tzaj ttx'u'jil jun rey, junx ta' ik tza'n in tzanun jun b'alun; ex alkye jun ma tz'ok ik'lente te rey, mya yaj jaku kub' b'yo'n tu'n.

3At nimb'il te jun xjal nne'l tpa'n tib' ti'j q'oj, pero aju xjal minti' tnab'l ex mib'an b'in, mas in jyon q'oj.

4Ok tpon tyemp te ch'okb'il tx'otx' aju xjal ky'aj minti' nno'k ten ch'okil, oktzun tpon tq'ijlalil tu'n tjaw chmet twitz awal k'okel ten jyolte, ex mlay knet twitz awal tu'n.

5Aju t-ximb'etz jun xjal tuj ewaj in b'ant, ik tten ik tza'n jun a' ma' t-xe', ex aju xjal at tnab'l jurat nne'l tnik' ti'j.

6At nimku xjal in kyma'n qa puro b'a'n qe, pero mlay knet jun in japun tkyaqil tu'n.

7Aju xjal ma b'et tuj tumelxix ex b'a'n tmod, at tzalajb'il kye qe tk'wa'l che kyjel ten tu'n.

8Ok tokx qe' jun rey tuj tq'uqb'il tu'n tkawin, jurat nne'l tnik' ti'j alkye b'a'n ex alkye mya b'a'n.

9Mi jun xjal jaku q'mante: Ma b'aj nsaqsa'ne tuj wanmiye, tx'jo'ntl qine ex minti'tl wile.

10Aju mark mya cabal ex aju malb'il mya cabal, ik'un qe tu'n Qman.

11Kyu'n qe tb'inchb'en jun ku'xun nne'l nik'b'aj ti'j qa b'a'n tmod ex qa tuj tumel in b'et.

12Tu'n t-ẍkyin xjal in tb'i'n ex tu'n tb'aq' twitz in til; tu'n Qman o che b'ant qe jlu.

13Mi'n noq tana, tu'ntzun mi'n toka te meb'a. Ke'yin jaw twitza ex kyja'tzun ktel nim twaya.

14Aju xjal laq'ol in tma'n te k'ayil: Mya b'a'n k'aẍjel lu, pero t-xilenxi tlaq'on, in jaw tzalaj ti'j.

15Aju xjal in yolin tuk'il nab'l, mas ma' toklen tyol twitz q'an pwaq ex kywitz nimku tal ab'j tb'anilxix.

16Q'i'n ela t-xb'alun xjal in kyaj we' ti'j tk'as juntl minti' ojtzqi'n tu'n, ex axtzun tzyu'n kyaja te jun prent.

17B'a'n nne'la tuj twitz xjal tu'n twa'n noq tu'n nik'aj yol, pero te tib'ajxi jlu, ik nno'k te te ik tza'n ttxa' ab'j tuj ttzi'.

18Kyu'n qe consej b'a'n, b'a'n in che ela qeju in kub' qximan; ex na'nxtoq kyxi' xjal tuj q'oj, b'a'n tu'n kykub' ten ximal ti'j nej alkye tu'n tb'ant kyu'n.

19Aju xjal ẍtaq'il yol mlay kub' tewan jun ti'xti tuj ewaj, kyja'tzun mi'n tz'ok tmojb'an tib'a tuk'ilju xjal tkyaqil in b'aj tyolin.

20Aju xjal nno'k yasonte tman ex ttxu', knajel tuj qlolj xob'ajilxix ik tza'n jun kandil in kub' yupj.

21Aju q'inumab'l mya kyuw in knet t-xe tnejel, te tib'ajxi mlay tz'el b'a'n te xjal tu'n.

22Mi'n txi tma'na: K'ajel nq'o'ne t-xel mya b'a'n ma b'inchanjtz wi'je; o'kx qe'k tk'u'ja ti'j Qman ex ok kletela tu'n.

23Ik'un tu'n Qman qe mark mya cabal ex qe malb'il mya cabal; mya b'a'n qe jlu.

24Ate Qman ẍaqlulte xjal tuj tb'e; atzunte xjal mlay tz'el tnik' ti'j tb'e.

25At xob'ajil ti'j xjal qa jurat ma txi ttziyan jun tyol te Dios, ex te tib'ajxi mi'n japun tu'n aju otoq txi ttziyan.

26Aju rey at tnab'l in che ex tlajo'n qeju in che b'inchante mya b'a'n, ex in kub' tq'o'n kycastiw kyuwxix wen.

27Aju xewb'aj o txi tq'o'n Dios te xjal tu'n tten tchwinqlal, a jlu jun spik'un in b'aj xpich'un tuj tanmi xjal tu'n.

28Kyuw tten jun rey tuj tkawb'il qa axix tok tyol ex qa at tk'ujlalil.

29Aju mas in che tzalaj qe ku'xun ti'j, tu'nju at kyipun; atzun qe tij xjal at nimb'il kye tu'nju ma saqix kywi'.

30Qa ma b'aj b'ju'n ex qa ma b'aj k'ixb'isa'n jun xjal mya b'a'n, a jlu jun q'anb'il nno'k te te; ex tu'nju tcastiw xjal in kub', in saqix tuj tanmi.