2 Samuel 10 - Mam Huehuetenango New Ortography

Kub' kyi'j aj Siria ex aj Amón tu'n David 1 Crónicas 19.1-19

1Tb'ajlenxi jlu kyim Nahas aju rey kye aj Amón, ex aju kyaj ten te t-xel tu'n tkawin, atzun Hanún aju tky'ajal.

2Kub'tzun t-ximan David tu'n tb'inchante xtalb'il ti'j Hanún aju tky'ajal Nahas, ik tza'nxju xtalb'il otoq tb'incha qtzan tman Hanún ti'j David, ex e je'x t-sama'n junjun xjal at kyoklen ttxlaj tu'n t-xi kyq'uqb'a'n tk'u'j Hanún ti'j tkyimlen qtzan tman. Tejtzun kypon qe xjal at kyoklen ttxlaj David tuj kytx'otx' aj Amón,

3qe nejenel kye aj Amón xi kyma'n te Hanún aju kawil kyib'aj: ¿Chipetzuna tat rey qa ma che tzaj t-sama'n David qe xinaq lu q'uqb'al tk'u'ja ex tu'n tjaw tnimsa'n tb'i qtzan tmana? ¿Myapetzun ma che tzaj t-sama'n qe xinaq lu ke'yilte alkye tumel tu'n kyoktz tuj tnam ex tu'n tkub' kyxitun?

4Xitzun tq'o'n Hanún jun orden tu'n kyokx presin qe xjal at kyoklen ttxlaj David, ex tu'n tel matzet mij kyxmatz, ex tu'n tel qesit mij kyxb'alun tu'n tjapun max twi kyẍo'p, ex te tib'ajxi e ajtz tlajo'n.

5Tejtzun tb'inte David jlu, xi tma'n tu'n kyxi kanab'aj qe, ex nimxix kych'ixwi otoq tzaj, ex tu'n t-xi q'ma'n kye tu'n kykyaj ten tuj tnam Jericó okxi tch'iy kyxmatz, ex maxitzun tu'n kypon meltz'aj.

6Eltzun kynik' aj Amón ti'j qa otoq kyb'incha jun ik'b'ilxix twitz David; tu'n jlu tzaj kyi'n winqin mil soldad aj Siria tuj tnam Bet-rehob ex tuj Soba, tzaj kyi'n jun mil xinaq tuk'il rey te tnam Maaca ex kab'laj mil tuj tnam Is-tob, ex xi kychjo'n twi kyk'u'j.

7Tejtzun tb'inte David jlu, xi sama'n Joab tu'n, kyuk'ix kykyaqil qe t-soldad.

8E etztzun aj Amón ex b'aj kytxolb'an kyib' tu'n tb'ant kyten tuj q'oj ax ttzi tlamel tnam, ex atzun qe soldad aj Siria te tnam Soba ex Rehob, kyuk'ix qe soldad te tnam Is-tob ex Maaca, atzun e kub' ten tuj kojb'il.

9Tej tke'yinte Joab kyja'toq kyok tzoqpaj aj q'oj ti'j, at kyja' kytzaj twitz ex at kyja' kyxi' ttzal ti'j, e jaw t-sk'o'n qe soldad aj Israel mas tb'anilxix ex b'ant kyten tu'n kyok tzoqpaj kyi'j aj Siria.

10Atzun qe txqantl soldad e kyaj tq'o'n tuj tkwent Abisai aju terman, tu'n kyq'ojin kyuk'il aj Amón,

11ex xi tma'n te kyja': Qa ma kub' wi'je kyu'n aj Siria, b'ixtzun tzaja onil weye, ex qatzun ma kub' ti'ja kyu'n aj Amón, jakutzun chin pone onil teya.

12Kyuwx tk'u'ja ex qq'o'nk qipun tu'n kyklet qxjalil ex tu'n kyklet qe tnam etzan tu'n Dios. Ex b'ant-xwit tu'n Qman aju b'a'n tuj twitz.

13Xi'tzun Joab kyuk'ix qe t-soldad tu'n kyok tzoqpaj kyi'j aj Siria, ex e je'l oq aj Siria twitz.

14Ex tej kyke'yinte qe aj Amón otoq che el oq qe aj Siria, ax ikx kye e je'l oq twitz Abisai, ex okx kyklon kyib' tuj tnam. Tu'ntzunju minti'tl ok tzoqpaj Joab kyi'j aj Amón ex aj meltz'aj tuj Jerusalén.

15Tejtzun tel kynik' aj Siria ti'j qa otoq kub' kyi'j kyu'n aj Israel, ok kychmon kyib' juntl maj.

16Ex xi tma'n Hadad-ezer tu'n kyxi q'ib'aj qe aj Siria ate' jlajxi nima Éufrates, e pontzun qe tuj tnam Helam. Aju nejenel kye t-soldad Hadad-ezer, atzun Sobac.

17Ex o pon tqanil jlu tuk'il David, ex oktzun tchmo'n kykyaqil aj Israel, ik'xtzun tuj nima Jordán ex pon tuj tnam Helam. Ex tej kyke'yinte aj Siria kyja' ttzaj David, b'ant kyten tu'n kyok ten q'ojlel ti'j,

18ex te tib'ajxi e je'l oq kywitz aj Israel, ex kub' tb'yo'n David 40 mil soldad kyjax kyib'aj chej ex kyuk'ix wuq syent soldad kyokx kyuj carwaj in che ajb'en tuj q'oj; ax ikx kub' tb'yo'n David aju xjal Sobac tb'i. Aju nejenel kye kysoldad aj Siria axtzun kyim ma chixin.

19Tejtzun kyke'yinte kykyaqil qe rey kymojb'antoq kyib' tuk'il Hadad-ezer qa otoq kub' kyi'j kyu'n aj Israel, b'ant ti'j jun kyyol kyuk'il aj Israel tu'n mi'n kyq'ojintl ex e kyaj ten tjaq' kykawb'il. B'i'xtzun ok t-xob'il kyi'j aj Siria tu'n kyonin kyi'j aj Amón.