Hechos 24 - Mam Huehuetenango New Ortography

Aju tkolb'il tib' Pablo twitz Félix

1Tel-lenxitzun jwe' q'ij, ku'pun Ananías tuj Cesarea kyuk'ix junjun kytijil xjal, ex jun xjal licenciado, Tértulo tb'i, ate Ananías nejenel kye pal. E pontzun twitz gobernador chik'b'alte alkye til Pablo.

2Tejtzun ttxket Pablo, ok ten Tértulo tx'olb'alte alkye til Pablo, xi tma'n te Félix:

—Chjonte teya, tat gobernador, tu'nju ato'ye tuj txub'txaj tu'na ex b'a'nxix tleya tkub' kyib'aj tnam tu'nju tnab'la b'a'nxix.

3Kyja'tzun in qk'mo'ne t-xtalb'ila tkyaqil q'ij ex tuj tkyaqil lugar, nimxix in xi qq'o'ne chjonte teya tat Félix, aya nimxix toklena.

4Ex tu'n mi'n t-sikta mas nim tuj, chin kub'sale twitza tu'n t-xi tb'i'na kab' ox qyole, qa ma tb'inchaya xtalb'il.

5Ma knet ju xjal lu qu'ne noq in tzpet-san kynab'l xjal, ex in oksan kyk'u'j kykyaqil xjal judiy tuj tkyaqil twitz tx'otx' tu'n kyq'ojin kyxolx, ex nejenel kyxol jun k'loj xjal t-xnaq'tzb'en jun xjal aj Nazaret.

6Ax ikx o tajb'e tu'n tb'aj ttz'ilsa'n tja Dios; kyja'tzun tzyet qu'ne Ax ikx teya ok tok tuj xjel tu'na, k'elel tnik'a ti'j qa at til ik tza'n in qma'ne, chi Tértulo.

9Ax ikx kye xjal judiy xi kymojtza'n:

—Tkyaqil jlu ax tok, che chi.

10Tzajtzun tyek'un tq'ab' gobernador tu'n tyolin Pablo, xitzun tma'n Pablo:

—B'a'n wu'ne ela'xi ab'q'i toklen tena te jwes tuj ju nasyon lu, kyja'tzun ma qe'xix nk'u'je tu'n t-xi nma'ne nkolb'il wib'e teya.

11B'a'n tu'n t-xi tqanina tu'n tb'inteya, ma kab'laj q'ij njaxlene tuj Jerusalén k'ulul te Dios.

12Minti' in knete kyu'n xjal judiy tzinwt chin yoline kyuk'il xjal ex qa tzinwt che jaw tilj xjal wu'ne, mi tuj tja Dios, mi kyuj ja te k'ulb'il, mi tuj tnam;

13ex mlay che el twitz ti'j wile in kyma'n.

14Ex ax tok kxel nma'ne teya, oksla'n wu'ne aju okslab'l in che yolin ti'j qa mya b'a'n, ex in chin ajb'ene te Dios, aju Kydios qtzan nxe'chele, porke oksla'n wu'ne tkyaqilju tz'ib'an tuj tu'jil ley ex tuj kyu'jil t-sanjel Dios.

15Ex q'uql nk'u'je ti'j Dios, ik tza'n kye q'uql kyk'u'j ti'j, qa ok che jawil anq'in qe kyimni, tza'nx qeju tz'aqlxix, ax ikx qeju mya tz'aqlxix.

16Kyja'tzun nno'k tilil wu'ne kukx tu'n nb'inchanteye b'a'n twitz Dios ex kywitz xjal ik tza'nx in tma'n wanmiye, ex tu'n ntene minti' npaltile.

17Tb'ajlenxitzun ela' ab'q'i, in ultzune tuj ntanmiye q'ol kotzb'aj kye nxjalile ex q'ol oyaj te Dios.

18Matoq in b'ant jlu wu'ne tuj tja Dios te tx'ajb'il weye, tej nknete kyu'n junjun xjal judiy aj Asia, mya nim xjal uk'in wu'ne ex mya in che tilin xjal wuk'ile.

19Awttzun qeju ma che ul twitza q'malte alkye wile, qa at kyq'oj wi'je.

20Ex qa mi'n, ax qe xjal ate' tzalu b'a'n tu'n ttzaj kyma'n alkye wile knet kyu'n tej npone kywitz Aj Sanjelal kye xjal judiy.

21Qatzun qa a wile tuj kywitz, tej ntene kyxol jaw tq'ajq'ajel nwi'ye kyuw ex xi nma'ne kyja': Ti'j anq'ib'l kye kyimni ma chin oke tuj xjel kyu'ne ja'lo, nchiye kye, chi Pablo.

22Atzunte Félix, tej tb'aj tb'i'n jlu xi tma'n tu'n kyayon, porke elni tnik' ti'j ju Okslab'l lu, ex xi tma'n kye:

—Okxi tkub'il coronel Lisias k'eleltzun b'aj nnik'e ti'j kyxtise.

23Xitzun tma'n Félix te capitán tu'n tok xq'uqit Pablo, ex tzoqpi'n ch'in ex tu'n mi'n kymayet qe tamiw ok kypon tuk'il tu'n kyajb'en te.

24Tb'ajlenxitzun kab' q'ij, pon juntl maj Félix tuk'ix t-xu'jil Drusila tb'i, ex judiy xjal. Txkettzun Pablo tu'n Félix, ex xi tb'i'n aju tyol Pablo in yolin ti'j qa il ti'j tu'n qokslan ti'j Jesucrist.

25Ex tej tmante Pablo tu'n qok tz'aqlxix ex tu'n qjak'unte qib' ex tej tyolin ti'j ju jwisi tzul, b'i'x jaw sek'paj Félix, ex tma:

—Txi'ya ja'lo; alkye q'ij at amb'il weye ktxketela juntl maj wu'ne, chi Félix.

26Ax ikx in ayontoq Félix ti'j tu'n t-xi tq'o'n Pablo ch'in pwaq te tu'n t-xi ttzoqpi'n; kyja'tzun nimku maj xi txokb'aj Pablo tu'n ex o yolin tuk'il.

27Tejtzun tjapun kab' ab'q'i, eltzun q'i'n Félix, ex kyaj ten Porcio Festo te t-xel; ex tu'nju o tajb'e Félix tu'n tkub' xtalin kyu'n xjal judiy, kyja'tzun kyaj q'o'n Pablo tuj pres tu'n.