1Nman Dios, qe xjal mya okslal ti'ja ma che oktz tuj tx'otx' etzan tu'na. Ma b'aj kytz'ilsa'n tjaya xjan ex ma b'aj kyxitun aju tnam Jerusalén.
2Aju kyximlal qe tmajena ex kyximlal qeju o che niman teya, ma txi kyq'o'n tu'n tajb'en te kychi' k'utz ex qe jil te tjaq' k'ul.
3Ma b'aj chitj kychk'el mer ik tza'n a' tuj enter tnam Jerusalén, ex mi a'l b'a'n tku'x maqunte kye.
4Ma qo ok xmayine kyu'n qe qvesine; ex ma qo ok tze'ne kyu'n qeju ate' qi'jele.
5Nman Dios, ¿jtoj txi tkolina tu'n tq'ojina qi'je? ¿Kukxpe ktzajel tq'oja qi'je mer ik tza'n q'aq' in k'ant?
6E ttzaj ttx'u'jila kyi'j qe nasyon mya okslal qe ti'ja, aqeju minti' ojtzqi'na kyu'n ex minti' in tzaj na'n tb'iya kyu'n.
7Ex atzun qe jlu o che kub' b'yonte qe tiyjil Jacob ex ma b'aj kyxitun kytanmi.
8Mi'n kub' tq'o'na qcastiwoye tu'n tlaj mya b'a'n kyb'incha qe qxe'chele; q'aq'antz tk'u'ja qi'je porke ma b'aj qipune.
9Nman Dios, aya klol qeye, qo tonintza, qo tkloma ex najsama qile tu'ntzun tjaw nimsa'n tb'iya.
10¿Tza'n tten kxel kyma'n qe txqantl nasyon kyja':? ¿Jatumtzun ta' Kydios? Kuchiwt tz'ok qke'yine ok t-xelin tu'na aju kykamik qe tmajena, tu'ntzun ikx kye tu'n tel kynik' ti'j.
11B'intza tq'ajq'ajel kywi' qe pres, aqeju tkub' kysentens tu'n kykyim, ex kloma qe tu'nju tipumala ma'xix.
12Nman Dios, q'on aja wuq maj t-xel kye qe txqantl nasyon kyvesin kyib' quk'ile, tu'n tlaj yol mya b'a'n o kyma ti'ja.
13Atzun qeye, aqo'ye etzan tu'na, ik qo'ye ik tza'n ẍne'l, ex kwentin qo'ye tu'na, kukx kxel qq'o'ne chjonte teya, che xel qb'itzane qe b'itz te nimb'il teya tuj tkyaqil tab'q'iyil.
Who We AreWhat We EelieveWhat We Do
2025 by iamachristian.org,Inc All rights reserved.
