Isaías 45 - Mam Huehuetenango New Ortography

Tzaj tma'n Qman tu'n tjapun jun aq'untl tu'n Ciro

1Ok tq'o'n Qman toklen Ciro tu'n tok te rey, tzaj ttzyu'n tq'ab' tu'n tten tipumal, tu'ntzun tkub' kyi'j qe nasyon tu'n ex tu'n tel b'aj ti'n kymakb'il rey, aqeju in che ajb'en tuj q'oj. Che jaqetel qe tlamel tnam tu'n Qman twitz rey Ciro ex mi a'l jun jaku tz'etz lamonte kye. Ex ja'lo in xi tma'n te kyja':

2Chin b'el neje twitza, che b'el nti'line qe witz, che k'okex npa'ne qe tlamel tnam q'an k'uxb'il ex che b'ajel ntoqine qe k'uxb'il tok ttzi tlamel tnam.

3Che xel nq'o'ne qe ti'xti tb'anil ex wi'yil teya, aqeju ewan ex ju q'inumab'l k'u'n kyuj qe lugar tuj tewan, tu'ntzun tel tnik'a ti'j aqine Kydios aj Israel ex aqine in chin txokone ti'ja ti'j tb'iya.

4Txketa wu'ne ti'j tb'iya noq tu'n kylaj sk'o'maj wu'ne qe nmajene, aqeju aj Israel tiyjil Jacob, ex ma txi nq'o'ne juntl tb'iya ma' toklen maske minti' nne'l tnik'a wi'je.

5Aqine Dios ex minti' juntl, minti' juntl Dios o'kx qine. Kxel nq'o'ne tipuna tu'n tkub' kyi'j tnam tu'na maske minti' nne'l tnik'a wi'je.

6Ok nb'incha'ye jlu tu'n tel kynik' kykyaqil xjal tuj tjawitz q'ij ex tuj telex q'ij minti' juntl ik tza'n qine. Aqine Dios aju Kymane ex minti' juntl.

7Wu'ne in b'ant spik'un ex qlolj, in che ten xjal tuj txub'txaj wu'ne, ex in tzaj nq'o'ne yajb'il kyi'j. Aqine Dios aju in b'inchante tkyaqil jlu.

Aju tipumal Dios ma' t-xilen

8Max tuj kya'j ktzajel nsama'ne aju kamb'ab'l ik tza'n tq'ab' che'w in tzaj twitz kya'j, ex ik tza'n jb'al in tzaj tuj muj in tk'mo'n tx'otx', aju ktzajel tq'o'n ik tza'n twitz atzunju kolb'il ex ok kyb'incha' xjal ju tz'aqlxix.

9Ay b'ek'b'il twitz ju xjal nno'k ten q'ojel tuk'il ju b'inchalte te. Ik tten ik tza'n jun piẍ ttx'aqan k'il kyxol txqantl piẍ ttx'aqan k'il. ¿Jakupe txi tma'n aju xkab' tx'otx' te b'inchal xar? ¿Ti nb'aj teya? chiwt, ex ¿jakupe txi tma'n jun k'il teju b'inchalte te: Miban tz'aq'nana, chiwt?

10Ay b'ek'b'il twitz ju xjal in xi tman te tman kyja': ¿Tiqu'n ma chin ok tpoq'sa'na? qa chi, ex qa in xi tma'n te ttxu' kyja': ¿Tiqu'n ma chin ul talina? qa chi.

11Ate Qman aju Dios Xjan kye aj Israel, aju b'inchante kye, in tma'n kyja': ¿Jakupelo tzaj kyqanine weye alkye kb'antel wu'ne kyi'j qe nk'wa'le ex qa tu'n ttzaj kyq'ma'n weye alkye tu'n tb'ant wu'ne?

12Wu'ne o b'ant twitz tx'otx' kyuk'ix qe xjal najl twitz; tu'n nq'ab'e xi nlik'pu'ne kya'j ex xi nma'ne tu'n kyjaw jlet kykyaqil che'w ate' twitz kya'j.

13Wu'ne jaw jlet ju rey Ciro tu'n tkub' kyi'j qe txqantl rey tu'n, ex mya kyuw k'elel tb'e wu'ne, tu'n kjawil tb'incha'n juntl maj tnam etzan wu'ne, ex tu'n che tzoqpetel qe xjal e je'x q'i'n pres, ex mlay tz'el tqanin twi tk'u'j ex chojb'ilte ti'j taq'unb'en. A Qman aju Tajaw Tkyaqil in q'mante jlu.

14Chi Qman kye aj Israel kyja': Aju kyq'inumab'l qe aj Egipto ex aju kyk'a'ẍ aj Etiopía k'okel te kyeye; ex qe aj Seba ma' kywa'l tzul kyq'on kyib' tuj kykwente ex che okel te kymajene, che okel lpe' kyi'je k'alo'n qe tu'n caden ex che b'el ẍmeje' kywitze tu'n kykub'san kyeye, ex ktzajel kyma'n kyeye kyja': Ax tok a Dios at kyuk'ile, o'kx te ex minti' juntl Dios, che chilo, chi Dios.

15Axix tok aya jun Dios ta'ya tuj ewaj, aya Kydios aj Israel ex aya kolol.

16Kykyaqil qeju b'inchal qe tilb'ilal kb'el kych'ixwi ex k'elel kynik' xjal kyi'j noqx gan ju in b'ant kyu'n.

17Atzun kye aj Israel che kletel tu'n Qman, te jumajx aju kolb'il kye, mlay kub' kych'ixwi ex mlay naj kynab'l.

18Ate Qman o b'inchante kya'j, atzun Diosju, aju b'inchante tx'otx' ex kub' tq'uqb'a'n, ex mya o b'ant tu'n tu'n tten noq kukx, noq o'kx o tb'incha tu'n kyten xjal twitz, atzunju in q'mante kyja': Aqine Dios ex minti' juntl.

19Minti' ma chin yoline tuj ewaj ex mi tuj jun lugar tuj tewan twitz tx'otx'. Minti' xi nma'ne kye qe tiyjil Jacob: Chin kyjyome noqx gan, nchiwte. Aqine Dios in chin yoline axix tok ex in xi nma'ne aju tz'aqlxix.

In yolin Qman kyi'j qe tilb'ilal tu'nju noqx gan qe

20Aqeye xjal, kychmon ok kyib'e ex kytzaje, che laq'etze kykyaqile aqeye e kyaj klet kyuj qe tnam. Minti' kynab'l qe xjal iqan qe tilb'ilal kyu'n ok kyex tuj cay, porke qe tilb'ilal, tze' qe, ex in che kub' ten xjal kub'sal twitz kydios aju mlay che klet tu'n.

21B'a'n tu'n kyyoline ex kymantze jun yol te kolb'il kyib'e, ex b'a'n tu'n tb'aj kyqanine kyxolxe: ¿Alkye o q'mante jlu atxix ojtxi tej na'nxtoq tb'ant? ¿Alkye o q'onte tqanil jlu ojtxi? ¿Myapetzun aqine in q'onte tqanil? Aqine Dios ex minti' juntl. O'kx aqine tz'aqlxix ex kolol, minti' juntl.

22Kytzaje wuk'ile tu'n kyklete wu'ne, aqeye tnam ate'ye max ttxa'npun tx'otx', porke aqine Dios ex minti' juntl.

23Xi nma'ne jun nyole axix tok wu'nx wib'e, xi ntziyane jun nyole axix tok, ex aju yol lu mlay ch'expet; kykyaqil xjal che kb'el ẍmeje' nwitze, ex kykyaqil ktzajel kytziyan tu'n kynimante weye.

24O'kx tuk'il Qman at ipumalj tu'n tkub' ti'j tkyaqil, che chilo wi'je. Kykyaqil qeju in che q'ojin wi'je kb'el kych'ixwi.

25Noq wu'ne che okel te tz'aqlxix kykyaqil kyiyjil aj Israel, ex che tzalajel wi'je.