1Ate Absalón aju tky'ajal David attoq jun tanb' tb'anilxix ke'yin, Tamar tb'i. Ex ate Amnón ax tky'ajal David o t-xo' tgan ti'j txin lu,
2ex otoq tz'ok tyab' Amnón tu'n tb'is, porke ate Tamar aju tanb' na'nxtoq tlonte xinaq, ex tuj twitz Amnón qa minti' tumel tu'n tok ten ti'j.
3Ex ate Amnón attoq jun tamiw jawni twitz Jonadab tb'i, tky'ajal Simea aju terman David.
4At jun q'ij xi tqanin Jonadab te:
—Aya tky'ajal rey, ¿ti in b'aj ti'ja? ¿Tiqu'n teyle junjun q'ij noq kyja' tok ti'ja? ¿Maj mi'n tzaj tma'na weye?
Atzunte Amnón xi ttzaq'we'n:
—At nim nganiye ti'j Tamar aju tanb' wermaniye Absalón.
5Oktzun ten Jonadab consejaril te ex tma:
—Tankuya tuj tkoẍb'ila ex yab'in kub' tib'a. Ex oktzun tpon tmana ke'yil teya, q'manxa te kyja': B'inchama xtalb'il samantza wanb'e Tamar tu'n ttzaj tq'o'n nwaye, ex nwitzxe tu'n tb'aj tb'incha'n chib'j tu'ntzun t-xi nchyo'ne ok twile aju ktzajel tq'o'n weye, chikuya te.
6Kub'tzun tan Amnón twi watb'il ex kub' tyab'sin tib'. Ex tej t-xi' rey ke'yilte te, xi tma'n Amnón te:
—B'inchama xtalb'il, e ttzaj wanb'e Tamar tu'n tkub' tb'incha'n kab'e wab'j ax tzalu, ex ax ktzajel q'onte weye.
7Xitzun t-sama'n David jun xjal max tja Tamar q'malte te:
—B'inchama xtalb'il, txi'ya tja termaniya Amnón ex b'inchama ch'in twa.
8Xi'tzun Tamar tja Amnón aju t-xib'an, ex koẍltoq Amnón twi twatb'il. Tzajtzun ti'n Tamar ch'in arin ex b'aj t-xyoq'in, ex axtzun ma chixin ok ten b'inchalte wab'j ex e b'aj ttzq'ajsa'n;
9tzaj ti'n aju k'uxb'il jatum in tzq'aj pan ex xi tq'o'n wab'j te, ex minti' xi twa'n Amnón, ex xi tma'n tu'n kyex kykyaqil qeju ate'toq tuja.
10Tejtzun kyetz b'aj kykyaqil, xitzun tma'n Amnón te Tamar:
—Q'intza wab'j max tuj nkwarte ex axa ktzajel q'onte weye.
Tzajtzun ti'n Tamar wab'j aju otoq b'ant tu'n, ex xitzun ti'n max tuj tkwart Amnón aju t-xib'an.
11Tejtzun tpon laq'e' Tamar tu'n t-xi tq'o'n twa, tzajtzun ttzyu'n Amnón tanb' ex xi tma'n te:
—Aya wanb'e tzaja, tankuya wuk'ile.
12Atzunte Tamar xi ttzaq'we'n:
—Mi'n nxib'an, mi'n tz'ok tq'o'na il wi'je tu'n nkub' tane tuk'ila, porke minti' in b'inchanjtz jlu kyxol aj Israel. Mi'n tb'inchaya aju mya b'a'n lu.
13¿Jatum chin xe'le ok tkub' nch'ixwiye? Ex atzun teya k'okela kyxol aj Israel ik tza'n jun xjal minti' tnab'l. In chin kub'sane twitza tu'n t-xi'ya yolil tuk'il rey, ex mlay kub' t-xk'ayin tu'n ntzaj q'o'ne teya.
14Atzunte Amnón minti' xi tniman, ex tu'nju mas nim tipun twitz Tamar, kyja'tzun ok ten ipalte ex kub' tan tuk'il.
15Te tib'ajxi jlu ok ten Amnón ik'ul ti'j tuk'il jun ik'b'il nimxix, aju ik'b'il lu mas ma'xix twitzju tk'ujlalil attoq ti'j nej. Kyja'tzun xi tma'n te kyja':
—We'ktza ex texa.
16Xitzun ttzaq'we'n Tamar:
—Mi'n nxib'an, ex qa ma chin ex tlajo'na ja'lo, a jlu jun mya b'a'n mas ma' t-xilen twitz aju ma tb'inchaya wi'je.
Atzunte Amnón minti' xi tb'i'n;
17noq o'kx tzaj ttxko'n ju tmajen ex xi tma'n te:
—Q'i'mexa xu'j lu, ex lamo'mexa tlamel ja wen.
18Extzun ti'n majen aju xu'j tuj ja, ex etztzun tlamo'n tlamel ja wen. Atzunte Tamar toksa'ntoq t-xb'alun tb'anilxix, aju xb'alun in ajb'en kyu'n qe kyme'jel rey ok na'nxtoq kymoje',
19jax tq'o'n tza'j tuj twi', el t-sb'it'un t-xb'alun toksa'n ti'j, ex jax tq'o'n tq'ab' tuj twi' ajtzun in oq' tuj b'e.
20Xitzun tma'n Absalón te, aju t-xib'an:
—¿Maj atzun Amnón aju t-xib'ana ma b'inchante jlu ti'ja? Kukxju wanb', mi'n q'ajta, ex termaniya jlu. Mi'n tzaj nim tb'isa tu'n jlu.
Axtzun kyaj ten Tamar tja Absalón aju t-xib'an, in b'isun wen.
21Tejtzun tb'inte rey David tkyaqilju otoq b'aj, tzaj nimxix tq'oj.
22Ax ikx te Absalón minti' jun yol xi tma'n te Amnón qa b'a'n ex qa mya b'a'n, maske in ik'untoq ti'j tu'nju otoq kub' tq'o'n tch'ixwi Tamar aju tanb'.
O xelin tu'n Absalón ti'j ju tb'incha Amnón23Tb'ajlenxi kab' ab'q'i, qe tmajen Absalón in che matzontoq kytzmal ẍne'l tuj lugar Baal-hazor tb'i, niqayin ttxlaj tnam Efraín, ex e tzaj ttxkon Absalón kykyaqil qe tky'ajal rey tu'n kywa'n tuk'il.
24Ax ikx xi' tuk'il rey, ex xi tma'n te:
—Tat Rey, ja'lo qe xinaq ate' wuk'ile in che matzon kytzmal qe nẍne'le. Aqine tmajena wajb'ile tu'n tpona wuk'ile kyuk'ix qe xjal at kyoklen ttxlaja.
25Atzunte rey xi ttzaq'we'n:
—Mi'n nky'ajal, mlay qo'xe qkyaqile tu'ntzun mya nim tu'n tb'aj tnajsa'na.
Ex maske ok tq'o'n Absalón il ti'j tu'n t-xi', pero ate rey minti' xi', noq o'kx kub' tky'iwla'n.
26Xitzun tma'n Absalón:
—Qatzun mlay txi'ya, ex q'ontza amb'il tu'n t-xi' Amnón wuk'ile, aju wermaniye.
—¿Tiqu'ntzun tajb'ila tu'n t-xi' Amnón tuk'ila? Chi rey xi tqanin.
27Ex ok tq'o'n Absalón il ti'j, ex kyja'tzun xi tq'o'n rey amb'il tu'n t-xi' Amnón tuk'il, kyuk'ix txqantl tky'ajal.
28Ex otoq txi tma'n Absalón kye qe tmajen kyja':
—B'ix tz'ok kyq'o'ne kwent ti'j ok tchyo'n twi' Amnón tu'n vin, ex ok t-xi nma'ne kyeye tu'n tkub' kybyo'ne, b'ixtzun kub' kyb'yo'ne. Mi'n che xob'e tu'n kyb'inchanteye jlu, porke wu'ne ju orden lu. Kyja'tzun kyuwx kyk'u'je ex tenx kyipune.
29Kyja'tzun o japun kyu'n qe tmajen Absalón aju orden xi tq'o'n kye, kub' b'yo'n Amnón kyu'n. Kykyaqiltzun qe tky'ajal rey e jaw we', e jax tib'aj kychej mul ex e je'l oq.
30Tej ate'xtoq tuj kyb'e, pon tqanil tuk'il David qa otoq che kub' b'yo'n kykyaqil qe tky'ajal tu'n Absalón, ex qa mi jun kye otoq kyaj anq'in.
31Jawtzun we' rey, el t-sb'it'un t-xb'alun ti'j te jun yek'b'il ti'j tb'is, ex kub' t-xo'n tib' twitz tx'otx'. Ax ikx kykyaqil qe xjal ate'toq tuk'il, aqeju at kyoklen ttxlaj, el kysb'it'un kyxb'alun kyi'j;
32ex xi tma'n Jonadab aju tky'ajal Simea, aju terman David kyja':
—Tat Rey, mi'n ximana ti'j qa ma che kub' b'yo'n kykyaqil qe tky'ajala. O'kx te Amnón ma kub' b'yo'n, ex atzun jlu ximamaj tu'n Absalón atxix tuj q'ij tej tkub' t-xo'n Amnón Tamar aju tanb'.
33Kyja'tzun Tat Rey, mi'n ximana ti'j qa kykyaqil tky'ajala ma che kyim. O'kx te Amnón ma kyim.
34Atzunte Absalón otoq tz'el oq. At jun ku'xun toksa'ntoq te xq'uqil o til txqan xjal kyja' kyku'tz tuj tb'eyil tnam Horonaim, xi'tzun q'malte te rey qa otoq til txqan xjal kyja' kyku'tz tuj tb'eyil tnam Horonaim.
35Ex xi tma'n Jonadab te rey:
—Ke'yinxa Tat Rey, lu qe tky'ajala che ul ik tza'nx xi nma'ne, aqine ajb'el teya.
36Matoq in b'aj yolin Jonadab tej kypon qe tky'ajal rey, ex e ok ten oq'el tuk'il tq'ajq'ajel kywi' kyuwxix. Ax ikx te rey kyuk'ix kykyaqil xjal at kyoklen ttxlaj nimxix o che oq'.
37-38Atzunte Absalón otoq tz'el oq, ex xi' tuk'il Talmai, aju tky'ajal Amiud ex rey tuj tnam Gesur, ex axtzun kyaj ten ox ab'q'i ma chixin. Atzunte David in oq'toq tkyaqil q'ij ti'j tkyimlen Amnón aju tky'ajal,
39ex tej t-xi tkolin tu'n tb'isun ti'j tkamik Amnón, tzajtzun nimxix tgan tu'n tke'yinte twitz Absalón.
Who We AreWhat We EelieveWhat We Do
2025 by iamachristian.org,Inc All rights reserved.
