2 Reyes 23 - Mam Huehuetenango New Ortography

1Xitzun tma'n rey tu'n kytzaj txket kykyaqil qe kytijil xjal tuj Judá kyuk'ix qe kytijil xjal tuj tnam Jerusalén, tu'n tok kychmon kyib' tuk'il.

2Xi'tzun rey tuj tja Dios, kyuk'ix kykyaqil qe xinaq aj Judá ex qe xjal najl tuj Jerusalén, qe pal, qe t-sanjel Dios, kyuk'ix tnam xjal, tza'nx qeju ch'in kyoklen ax ikx qeju ma' kyoklen. Atzun jaw t-sch'i'n rey tkyaqilju in tma'n tuj libro aju otoq knet tuj tja Dios, jatum tz'ib'an ju yol kyaj b'ant ti'j tu'n Dios kyuk'il aj Israel.

3Kub'tzun we' rey ttxlaj tqan ja ex xi ttziyan jun tyol te Qman, tu'n t-xi tniman ex tu'n kyjapun qe tmandamyent Qman tu'n tu'n tkyaqil tanmi, kyuk'ix qe t-xnaq'tzb'il ex qe tley, ex tu'n tjapun tu'n aju yol kyaj b'ant ti'j tu'n Dios kyuk'il, aju tz'ib'an tuj libro. Ax ikx kye tnam xjal xi kytziyan jun kyyol tu'n tjapun kyu'n.

B'aj tpatun Josías qe tilb'ilal nno'k kydiosin xjal 2 Crónicas 34.3-7

4Xitzun tq'o'n rey orden te Hilcías aju tnejel pal, tuk'ix kye txqantl pal ex kye qe xq'uqil ttzi tja Dios, tu'n tetz kyi'n tuj tja Dios kykyaqil qe makb'il in che ajb'entoq te k'ulb'il twitz Baal, twitz xu'j dios Asera, twitz q'ij, twitz xjaw ex kywitz kykyaqil qe che'w. E kub' tpatun kykyaqil jlu ti'jxi tnam Jerusalén tuj kojb'il, tuj lugar Cedrón, ex xi ti'n kytza'jel max tuj Betel.

5Te tib'ajxi el ti'n rey kyoklen qe pal, aqeju otoq che ok q'o'n kyu'n qe rey te Judá, tu'n tkub' kypatun storak kyuj lugar jatum in che k'ulun xjal kywi' qe witz, kyuj qe tnam ate' tuj tkwent Judá, kyuk'ix qeju ate' ti'jele tnam Jerusalén, ex el ti'n kyoklen qe pal in kub' kypatun storak twitz tilb'ilal Baal, twitz q'ij, twitz xjaw, ex kywitz kykyaqil qe che'w.

6Etz ti'n tilb'ilal xu'j dios Asera tuj tja Qman, ex xi ti'n ti'jxi tnam Jerusalén, kub' tpatun tuj tq'ab' xaq Cedrón, tejxi tkub' tza'jix tu'n, ex xi tchitun ttza'jil tib'aj camposant te tnam.

7Ax ikx e b'aj t-xitun qe ja jatum najlqe xinaq in che ok ten ti'j juntl xinaq, ex in kyb'incha'n jlu te jun k'ulb'il te kydios ti'jele tja Qman, jatum in che chmon xu'j ti'j xb'alun tu'n tajb'en te tilb'ilal xu'j dios Asera.

8Te tib'ajxi xi tma'n tu'n kytzaj kykyaqil qe pal kyuj qe tnam at tuj Judá, ex e ok tq'o'n te minti' tajb'en tkyaqil lugar kywi' qe witz jatum in che k'ulun xjal, tzajx qe' tu'n tuj tnam Geba ex pon b'aj max tuj Beerseba; kyujtzun qe lugar lu otoq kub' kypatun qe pal storak. Ax ikx e b'aj tq'uchin qe altar jatum in che k'ulun qe xjal kywitz tilb'ilal, aqeju kykub'sa'n ttzi tlamel tnam aju otoq b'aj tb'incha'n Josué aju gobernador te tnam, aqeju kykub'sa'n ttzi tlamel tnam te kub'ni.

9Ex qe pal in che ajb'entoq kyuj lugar jatum in che k'ulun qe xjal kywi' qe witz, minti' xi q'o'n amb'il kye tu'n kypon laq'e' jatum ta' altar te Qman tuj Jerusalén, noq o'kx xi q'o'n amb'il kye tu'n kywa'n pan kyuk'il txqantl pal, aju pan minti' t-samel tuj tu'n tjaw mal tk'u'j.

10Ax ikx ok tq'o'n Josías te minti' tajb'en aju lugar Tofet tb'i, aju in ajb'en te patb'il xjal, aju tkub'sa'n tuj chq'ajlaj Ben-hinom tb'i, tu'ntzun mi jun tu'n tkub' tpatun tky'ajal ex qa tme'jel te chojb'il te dios Moloc.

11Ex e jel ti'n qe chej pa'maj kyu'n qe rey te Judá tu'n kyajb'en te k'ulb'il te q'ij, ex atzun kykub'sa'ntoq qe chej lu niqayin ttzi tlamel tja Qman, ttxlaj tnajb'il xjal Natán-melec tb'i, aju kwentil kye cuart ate' ti'jele tja Qman; ex kub' tpatun carwaj jatum tokx tilb'ilal q'ij tuj.

12Ax ikx e kub' t-xitun qe altar otoq che jaw kyb'incha'n qe rey te Judá twi tja rey Acaz, ex qe altar otoq che jaw tb'incha'n Manasés ttxa'n tpe'n tja Qman; e b'aj tb'uchin ex xi t-xo'kj qe ttx'aqan tuj tq'ab' xaq Cedrón.

13Ax ikx ok tq'o'n rey te minti' tajb'en qe lugar jatum in che k'ulun qe xjal kywi' qe witz; aqeju kykub'sa'n ttxlaj Jerusalén tuj tjawitz q'ij, xi'yni te kub'ni tjaq'xi ju witz te xitb'il, aqeju otoq che b'aj tb'incha'n Salomón aju rey kye aj Israel, te k'ulb'il te tilb'ilal Astoret aju kydios aj Sidón; ex te k'ulb'il te Quemós aju kydios aj Moab; ex te k'ulb'il te Milcom aju kydios aj Amón; aqeju tilb'ilal lu ik'un qe tu'n Dios.

14Ax ikx e b'aj tb'uchin qe tilb'ilal ab'j kytx'otx'il, ex qe tilb'ilal xu'j dios Asera tze' qe, ex b'aj tnojsa'n qe lugar lu tu'n kyb'aqil kyimni, jatum kykub'sa'ntoq qe tilb'ilal lu.

15Atzunju altar tuj Betel, tuk'ix ju lugar jatum in che k'ulun qe xjal twi witz, e b'aj t-xitun Josías tejxi kyok tu'n ik tza'n quq ex e kub' tpatun. Aqe jlu otoq che kub' tb'incha'n Jeroboam aju tky'ajal Nabat, aju e b'inchan aj Israel il tu'n. Ax ikx kub' tpatun tilb'ilal xu'j dios Asera.

16Aj tke'yin Josías ti'jxi, ex tej ttil qe pantyón kykub'sa'n tk'u'j witz, xi tma'n tu'n kyetz q'i'n qe kyb'aqil kyimni kyuj, ex e kub' tpatun tib'aj altar tu'n tok tq'o'n te minti' tajb'en. Kyja'tzun tten o japun tyol Qman aju o q'manjtz tu'n t-sanjel ojtxi, qa tu'n tjapun jlu.

17Xitzun tqanin Josías:

—¿Al e pantyón ma wile ma chixin?

Atzun kye xinaq te tnam xi kytzaq'we'n:

—Tat Rey, atzun tpantyón t-sanjel Dios jlu, aju tzaj tuj Judá ex tzaj tx'olb'ante ojtxi ti'j ju ma b'ant tu'na ja'lo ti'j altar tuj Betel.

18Xitzun tma'n Josías kye:

—E tten ik tza'nx tten. Mi a'l jun tz'ok tq'o'n tq'ab' ti'j tb'aqil.

Kyja'tzun tten kyaj klet tb'aqil, tuk'ix tb'aqil t-sanjel Dios tzaj tuj Samaria.

19Atzun qe ja ate' tuj Samaria, jatum in che k'ulun qe xjal kywi' qe witz, aqeju otoq che jaw b'incha'n kyu'n qe rey kye aj Israel, b'i'x e b'aj t-xitun Josías, ik e tenb'a tu'n ik tza'nx otoq che tenb'a qe altar tuj Betel, porke noq tu'n kylaj qe jlu o tzaj nim tq'oj Qman kyi'j.

20Te tib'ajxitzun jlu, e kub' tb'yo'n kykyaqil qe pal kyib'aj altar, aqeju in che ajb'en kyuj qe lugar jatum in che k'ulun qe xjal kywi' qe witz, ex kyib'aj qe altar lu e kub' tpatun kyb'aqil qe kyimni. Ajtztzun tu'n tul tuj Jerusalén.

Kub' tik'sa'n Josías Xjan Q'ij 2 Crónicas 35.1-19

21Xi tq'o'n rey orden kye kykyaqil aj Israel tu'n tkub' kyik'sa'n Xjan Q'ij te nimb'ilte Qman aju Kydios, ik tza'nx tz'ib'amaj tuj libro ti'j ju yol kyaj b'ant ti'j tu'n Dios kyuk'il.

22B'ajxtoq kub' ik'sa'n jun Xjan Q'ij ik tza'n jlu, atxix tuj tq'ijlalil tej kyten qe nejenel e kawin kyib'aj aj Israel, mi tuj tkyaqil tq'ijlalil tej kyten qe rey te kawil kyib'aj aj Israel ex kyib'aj aj Judá.

23Tuj twajxaqlajin ab'q'i toklen Josías te rey tej tkub' ik'sa'n Xjan Q'ij te nimb'il te Qman tuj Jerusalén.

Ok tilil tu'n Josías tu'n tjapun tley Dios tu'n

24Ax ikx e b'aj naj qe xjal tu'n Josías aqeju b'a'n mañ kyu'n, kyuk'ix qe aj q'ij, kyuk'ix qe kysant xjal tokx t-xe kyja, ex qe txqantl tilb'ilal in che k'ulun kywitz, kyuk'ix kykyaqil qe makb'il puro ik'b'il in che ajb'en tuj kyk'ulb'il xjal tuj Judá ex tuj Jerusalén. O tb'incha ikju, tu'ntzun tjapun aju ley tz'ib'an tuj libro aju knet tuj tja Qman tu'n pal Hilcías.

25Mi a'l juntl rey o pon ik tza'n te Josías, mi tej na'nxtoq tok te rey, mi te tib'ajxi, porke ate rey lu ok lpe' ti'j Qman tu'n tkyaqil tanmi, ex tu'n tkyaqil tk'u'j, ex tu'n tkyaqil tipumal, ik tza'nx tz'ib'amaj tuj tley Moisés.

26Ex mi tu'n ikju, kukx o ten tq'oj Qman kyi'j, ex nimxix tq'oj otoq tzaj kyi'j aj Judá, tu'n tlaj tkyaqilju mya b'a'n tb'incha Manasés, tu'nju otoq tz'okx kyik'le'n Dios.

27Kyja'tzun o tma Qman: Che elex nlajone qe aj Judá tu'n mi'n kytentl nwitze, ik tza'n o nb'inchaye kyi'j aj Israel, ex k'elel wik'une tnam Jerusalén aju sk'o'majtoq wu'ne, ex k'elel wik'une aju ja jatum otoq nmaye kukx tu'n ttzaj na'n nb'iye tuj.

Tej tkyim Josías 2 Crónicas 35.20-27

28Aju ch'intl tx'olb'ab'en ti'j Josías, tuk'ix tkyaqilju o tb'incha, atzun tz'ib'an tuj u'j jatum ta' tx'olb'ab'en ti'j kyb'inchb'en qe rey te Judá.

29Tuj tq'ijlalil tej tten Josías te rey, at jun rey te Egipto, Faraón Necao tb'i, tzaj tu'n tpon ttzi nima Éufrates tu'n tonin ti'j rey te Asiria. Etztzun rey Josías tu'n tq'ojin ti'j Necao; ex tej tke'yinjtz tu'n Necao tuj tnam Meguido, kub' b'yo'n Josías tu'n.

30Okxtzun q'o'n t-ximlal tuj jun carwaj kyu'n qe xjal ma' kyoklen ttxlaj, ex ajtz kyi'n tuj tnam Meguido tu'n tul tuj Jerusalén tu'n tokx kyq'o'n tuj tpantyón. Atzun kye xjal tzaj kyi'n Joacaz aju tky'ajal Josías, ex ok kyq'o'n toklen tu'n tok te rey te t-xel qtzan tman.

Tej tkawin Joacaz tuj Judá 2 Crónicas 36.1-4

31Toktoq Joacaz twi' 23 ab'q'i tej tok te rey, ex o kawin ox xjaw tuj Jerusalén. Aju ttxu' Joacaz Hamutal tb'i, aju aj Libna ex tme'jel Jeremías.

32Ex mya b'a'n e ela qe tb'inchb'en tuj twitz Qman, ik tza'nx kyb'inchb'en qtzan t-xe'chel.

33Okx presin Joacaz tu'n Faraón Necao tuj tnam Ribla tuj tx'otx' Hamat, tu'ntzun mi'n tkawin tuj Jerusalén, ex kub' tq'o'n Necao jun chojenj kyib'aj xjal te 75 quintal saq pwaq ex 75 libr q'an pwaq.

34Ok tq'o'n Faraón Necao juntl tky'ajal Josías, aju Eliacim tb'i, te rey te t-xel qtzan tman, ex b'aj tch'expun tb'i, Joacim juntl tb'i ok tq'o'n. Atzunte Joacaz xi q'i'n tuj Egipto ex atzun kyim.

35Xi tq'o'n Joacim saq pwaq te Necao tuk'ix q'an pwaq in tqanintoq. Tu'ntzun jlu kub' tq'o'n jun chojenj kyib'aj qe xjal najl tuj tx'otx', ex teyle junjun xi tq'o'n saq pwaq ex q'an pwaq ik tza'nxju at te, tu'ntzun t-xi q'ot te Faraón Necao.

Tej tkawin Joacim tuj Judá 2 Crónicas 36.5-8

36Toktoq Joacim twi' 25 ab'q'i tej tok te rey, ex o kawin junlaj ab'q'i tuj Jerusalén. Aju ttxu' Joacim Zebuda tb'i, aju aj Ruma, ex tme'jel Pedaías.

37Ex mya b'a'n e ela qe tb'inchb'en tuj twitz Qman, ik tza'nx kyb'inchb'en qtzan t-xe'chel.