2 Pedro 1 - Mam Huehuetenango New Ortography

Jun q'olb'eb'l tu'n apostol Pedro

1Aqine Simón Pedro, apostol qine te Jesucrist in chin ajb'ene te; in xi ntz'ib'ane jlu kyeye, aqeye ma kyk'ame jun okslab'l tb'anilxix ik tza'nx qeye, porke tz'aqlxix aju Klolqe Jesucrist, aju Qdios.

2Tenxwit nim xtalb'il kyeye ex tu'n tqe'xix kyk'u'je, tu'nju ojtzqi'n Dios kyu'ne tuk'ix Qajaw Jesús.

Tza'n tu'n tten kychwinqlal okslal

3Tu'n tipumal Dios ma tzaj q'o'n qe tkyaqilju in ajb'en tu'n tten qchwinqlal ex tu'n qniman te Dios; ma tzaj q'o'n jlu qe tu'nju ojtzqi'n Dios qu'n, aju o txkonte qe tu'n tajwalil ex tnab'l tb'anilxix.

4Tu'n jlu ma tzaj tma'n Dios qe jun yol tb'anilxix ex ma' t-xilen; tu'n jlu tu'n tten qchwinqlal junx tuk'il Dios, ex tu'n qel oq ti'j kyb'inchb'en xjal puro tz'il, porke in pon kyk'u'j ti'j mya b'a'n.

5Atzun kyeye ja'lo, tz'ok tililx kyu'ne mya noq o'kx tu'n tten kyokslab'le, ax ikx tu'n kytene b'a'n tuj tkyaqil; ex mya noq o'kx tu'n kytene b'a'n tuj tkyaqil, ax ikx tu'n tten kyojtzqib'le;

6ex mya noq o'kx tu'n tten kyojtzqib'le, ax ikx tu'n kyjak'unte kyib'e; ex mya noq o'kx tu'n kyjak'unte kyib'e, ax ikx tu'n tten kypasense; ex mya noq o'kx tu'n tten kypasense, ax ikx tu'n kynimane te Dios;

7ex mya noq o'kx tu'n kynimane te Dios, ax ikx tu'n tok kyitz'in kyib'e; ex mya noq o'kx tu'n tok kyitz'in kyib'e, ax ikx tu'n tten kyk'ujlalile.

8Porke qa ma kyb'inchaye tkyaqil jlu ex qa ma che chmet-xix, mlay che oke te ky'aj, ex mlay che kyaj tene minti'wt twitz kyaq'unb'ene tuj ojtzqib'l te Qajaw Jesucrist.

9Atzun jun xjal minti' in tb'incha'n tkyaqil jlu, sjumj ti'j twitz, ex moẍ te; ex ma tzik' tna'l tu'n qa o tx'jet tuj til ojtxi.

10Kyja'tzun erman, tz'ok tililx kyu'ne tu'n tqe'xix kyk'u'je tu'nju o che txkete tu'n Dios ex o che jaw sk'o'ne tu'n; ex qa ma kyb'inchaye jlu, mlayx che kub' tz'aqe.

11Kyja'tzun ktzajel q'o'n kyeye tu'n kyokxe tu'n tkyaqil tzalajb'il tuj jun kawb'il te jumajx te Qajaw ex Klolqe Jesucrist.

12Kyja'tzun, kukx kxel nma'ne jlu kyeye tu'n ttzaj kyna'ne, maske b'a'n kyu'ne, ex tzyu'nxix kyu'ne aju yol axix tok at kyuk'ile.

13Porke b'a'n tuj nwitze tu'n tjaw nk'asune kynab'le na'nxtoq nkyime,

14porke b'a'n wu'ne ch'ix tkyim nximlale tu'n taj wanmiye tuj kya'j, ik tza'n ma tzaj tma'n Qajaw Jesucrist weye.

15Ax ikx k'okel tilil wu'ne tu'n t-xi nma'ne jlu kyeye tu'ntzun kukx tu'n ttzaj kyna'ne, nkyimlenxiye.

Qeju o kyil tajwalil Jesucrist

16Ex ma txi qchik'b'a'ne kyeye aju tipumal Qajaw Jesucrist ex ju tulel, mya jun yol la'jb'il ma txi qma'ne kyeye ex mya jun sb'ub'l, porke o qile tajwalil Jesucrist tu'nx tb'aq' qwitze.

17O qile tej ttzaj tq'o'n Qman Dios nimb'il te Jesús tuk'ix nim toklen, tzaj q'ajt Dios tuj t-spik'umal in qoptz'aj wen, ex tma: Atzun Nk'wa'le jlu k'ujla'nxix wu'ne, in chin tzalaje ti'j, chi Dios.

18Ax qo'ye o b'inte ju yol lu tej ttzaj q'ma'n tuj kya'j, tej qtene tuk'il Jesús twi witz jatum kub' ten Dios.

19Ax ikx at jun yol quk'il mas segurxix, aju kyyol qe t-sanjel Dios; ik tten ju yol lu ik tza'n ttxan tzaj in k'ant tuj qlolj. Kyja'tzun, b'a'n tu'n t-xi kyq'o'n kywi'ye ti'j akutzun in kub' spik'un, ex akutzun in ja'wil ju che'w aju jaqolte t-xe kya'j, tu'n t-spik'b'anjtz tuj kyanmiye.

20Pero tnejel tz'elx kynik'e ti'j jlu: Aju kyyol qe t-sanjel Dios tz'ib'an tuj Tu'jil mlay pujet qu'n tu'n qex qnab'l.

21Porke minti' e pakb'an qe t-sanjel Dios tu'n kyex kyajb'il; noq o'kx te Dios in che ajb'en qe xjal lu, xi kyma'n ju yol aju tzaj tma'n Dios kye, porke ẍaqlu'n qe tu'n Xewb'aj Xjan.