Proverbios 1 - Mam Huehuetenango New Ortography

Aju kyoklen qe yol in kyq'o'n xnaq'tzb'il

1Qe yol o q'manjtz tu'n Salomón aju tky'ajal David ex rey kye aj Israel,

2atzun kyxilen jlu:

Tu'n t-xi q'ot kynab'l xjal, tu'n t-xi q'ot xnaq'tzb'il kye ex tu'n tajb'en te onb'il kye tu'n tel kynik' kyi'j qe yol nim kynab'l;

3tu'n tknet jun xnaq'tzb'il kyu'n, tu'n tel kynik' ti'j jun ti'xti qa b'a'n ta', tu'n tten kynab'l tu'n kyb'inchante aju tz'aqlxix, tu'n kyb'et tuj tumelxix ex tu'n kyten cabal;

4tu'n tok kynab'l qe ku'xun ch'in kynab'l, ex tu'n t-xi q'ot kynab'l tu'ntzun kyel twitz jun ti'xti tu'n tb'inchet kyu'n, ex tu'n kyximan ti'j alkye b'a'n tu'n tb'ant kyu'n.

5Aju xjal at tnab'l ex list in kub' tq'o'n twi' kyi'j qe yol b'a'n, tu'ntzun jlu nno'k mastl tnab'l ex tojtzqib'l

6tu'n tel tnik' ti'j ju in kyma'n qe xjal aj nab'l, ti'j kyyol ex kyi'j qe techal in kyb'incha'n, ex tu'n tel kynik' kyi'j qe yol in che na'n aj nab'l kyi'j.

7Aju tumel tu'n tten tojtzqib'l xjal, atzun tu'n t-xob' twitz Qman ex tu'n tniman te, ex qe xjal mib'an che b'in nne'l kyik'un aju ojtzqib'l ex xnaq'tzb'il.

Qe consej kye ku'xun

8Nk'wa'l, q'onx twi'ya ti'j xnaq'tzb'il in tq'o'n tmana, ex mi'n tzik' tna'l tu'na aju xnaq'tzb'il in tq'o'n ttxu'ya,

9porke a jlu k'okel te teya ik tza'n jun tb'anil adorn ex ik tza'n jun uwj, ex qa ik tza'n jun coron tjax tuj twi'ya.

10Nk'wa'l, qa kyaj qe xjal aj il tu'n tkub' sb'u'na kyu'n, mi'n txi tq'o'na amb'il kye.

11B'alo ok kyma' teya: Qo' quk'ile, qo xq'uqil ti'j jun xjal minti' til tu'n tkub' qu'n ok tik' tuj b'e;

12qe xjal b'a'n kymod b'i'x che najel qu'n te jumajx, ik tza'n in che naj xjal tu'n kamik; enter qe in che ku'pun tuj kynajb'il kyimni.

13Knetel tkyaqil txkaj q'inumab'l qu'n ex kb'ajel noj tuj qja tu'n tkyaqilju k'elel qelq'a'n.

14Tzaja quk'ile, qo ten junx, ex junx e tajb'en qpwaq, che chilo teya.

15Nk'wa'l, mi'n txi'ya kyuk'il qe xjal lu, pa'n el tib'a ti'j b'e mya b'a'n q'i'n kyu'n,

16porke tok tilil kyu'n tu'n kyb'inchante mya b'a'n, ex tok tilil tu'n kykub' qe xjal kyu'n.

17Noq gan in kub' q'ot k'ob'il qa in che ke'yin chyu'j ti'j.

18Qe xjal lu kyi'jx in kub' kyq'o'n tramp ex in xi kyq'on kyib' tuj xob'ajil.

19Tu'nxju in pon kyk'u'j ti'j in che naj; atzun b'ajsb'il kye xjal jlu, aqeju in pon kyk'u'j ti'j tu'n kyelq'a'n.

Jun txokb'il tu'nju q'ol nab'l

20Kyuj qe cay ex kyuj plas in b'injtz tq'ajq'ajel twi' ju q'ol nab'l,

21in xi tma'n tyol ttzi tlamel tnam ex kyuj qe lugar jatum in che chmet xjal, chi in tma'n:

22Aqeye ku'xun minti' kynab'le, b'a'n che xmayine ex mib'an che b'ine: ¿Jtoj b'an tkyaj kykoline tu'n kytene minti' kynab'le? ¿Jtoj b'an tkyaj kykoline aju tzalajb'il tuj kywitze tu'n kyxmayine kyi'j kyuk'ile? ¿Maj kukx k'elel kyik'une aju ojtzqib'l?

23Kyq'ontz kywi'ye ti'j ju in che ok nmayo'ne ti'j ex jaku txi nq'o'ne kynab'le; kxel nma'ne kyeye alkye nximb'etze.

24O che tzaj ntxko'ne tu'n kytzaje wuk'ile, ex minti' ma chinx kynimane.

25Noqpe ma tz'el kyik'une nconseje ex minti' kyaje tu'n kyok nmayo'ne.

26Kyja'tzun kpol tq'ijlalil tu'n wok tene tze'l kyi'je ok ttzaj mya b'a'n kyib'aje; ok chin xmayile kyi'je ok ttzaj nim xob'ajil kyi'je,

27ex ok ttzaj xob'ajil kyib'aje tuk'ix yajb'il ex b'is, a jlu mer ik tza'n jun xkyaqinpaẍ in b'aj naj tkyaqil tu'n.

28Atzun q'ij lu ok che txokele wi'je, ex mlay che tzaj ntzaq'we'ne; ok che jyole wi'je, ex mlay chin knete kyu'ne;

29porke nne'l kyik'une aju ojtzqib'l ex mi'n kyaje tu'n kynimane Qman.

30Minti' kyaje tu'n t-xi kyb'i'ne nconseje ex minti' in kub' tuj kywitze tu'n kyok nmayo'ne.

31K'ik'ex nim kyu'ne tu'n tlaj kymodiye mya b'a'n. B'i'x kjawitz b'aj kyganiye ti'j kyximb'etze mya b'a'n.

32Qeju minti' kynab'l in che naj tu'nju atx taj kynab'l, ex qeju mib'an che niman in che naj tu'nju minti' kyaj ti'j tu'n kyb'inchante jun ti'xti;

33atzunju xjal ma tzaj tq'o'n twi' ti'j nyole, ok k'anq'il tuj tzalajb'il ex mlayx tzaj t-xob'il twitz noq alkye tzul ti'j.