2 Reyes 21 - Mam Huehuetenango New Ortography

Tej tkawin Manasés tuj Judá 2 Crónicas 33.1-20

1Toktoq Manasés twi' kab'laj ab'q'i tej tok te rey ex o kawin 55 ab'q'i tuj Jerusalén. Aju ttxu' Manasés Hepsiba tb'i.

2Ex mya b'a'n e ela qe tb'inchb'en tuj twitz Qman, porke o tb'incha axju mya b'a'n in kyb'incha'ntoq qe nasyon otoq che ex tlajo'n Qman kywitz aj Israel.

3E jaw tb'incha'n juntl maj qe ja te kyk'ulb'il xjal kywi' qe witz, aqeju otoq che kub' t-xitun Ezequías aju qtzan tman; e jaw tb'incha'n qe altar twitz tilb'ilal Baal, ex kub' tb'incha'n jun tilb'ilal xu'j dios Asera, ik tza'n o tb'incha Acab aju rey kye aj Israel; ax ikx o k'ulun twitz q'ij, twitz xjaw ex kywitz kykyaqil che'w.

4Ex e jaw tb'incha'n qe altar tuj tja Qman, jatum otoq tma Qman qa atzun tu'n ttzaj na'n tb'i te jumajx tuj Jerusalén.

5Jaw tb'incha'n txqantl altar tuj tnejel ex tuj tkab'in ttxa'n tpe'n tja Qman, ex e ajb'en tu'n tu'n kyk'ulun xjal twitz q'ij, twitz xjaw ex kywitz kykyaqil che'w.

6Ax ikx kub' tpatun tk'wa'l te chojb'il, o xnaq'tzan ti'j tu'n tb'ant tq'ijin ex tu'n kytxket kyanmi kyimni tu'n, ex e ok tq'o'n qe xjal spiritist ex qe xjal b'a'n che ky'a'n tu'n kyten kyxol xjal. Jumajx mya b'a'n e ela qe tb'inchb'en tuj twitz Qman, ex tu'n jlu tzaj tq'oj Qman ti'j.

7Ax ikx okx tq'o'n tuj tja Dios jun tilb'ilal xu'j dios Asera, aju b'aj tb'incha'n. Ex otoq tma Dios te David ex te Salomón aju tky'ajal kyja': Aju tja Dios at tuj Jerusalén, aju tnam o jaw nsk'o'ne kyxol kykyaqil k'loj kyiyjil aj Israel, atzun ktzajel na'n nb'iye tuj te jumajx.

8Mlay che ex nlajo'ntle qe aj Israel tuj tx'otx' xi nq'o'ne kye qe kyxe'chel qa ma che japun nleye kyu'n, ex qa ma kyb'incha tkyaqil aju o txi nma'ne kye, ex qa ma japun kykyaqil nxnaq'tzb'ile kyu'n, aju xi tma'n nmajene Moisés kye, chi Dios.

9Atzun kye minti' xi kyb'i'n. A Manasés xi q'inte kye tuj b'e mya b'a'n, ex mas nim mya b'a'n o kyb'incha ik tza'n in kyb'incha'ntoq qe nasyon otoq che naj tu'n Qman kywitz.

10Kyja'tzun tzaj yolin Qman kyuk'il qe t-sanjel, aqeju tmajen, chi kyja':

11Ma tb'incha Manasés nimku mya b'a'n, mas nimxix mya b'a'n ma tb'incha ik tza'n in kyb'incha'n aj Amorreo, aqeju ate'toq tuj tx'otx' nej. Ex tu'n Manasés ma che b'inchan aj Judá il, tu'nju ma che ok ten k'ulul kywitz tilb'ilal kydios xjal.

12Tu'ntzun jlu, aqine Kymane, aju Kydios aj Israel, in chin q'mante jlu: Ktzajel wi'ne mya b'a'n kyib'aj aj Jerusalén ex kyib'aj aj Judá, okxi tel twinqil kyẍkyin qeju che b'il ti'j.

13Kb'el nxitune tnam Jerusalén ik tza'n o tenb'a tnam Samaria wu'ne, ex b'i'x che najel qe aj Jerusalén wu'ne, ik tza'n o tenb'a Acab wu'ne kyuk'ix qe tiyjil. Kyjel ten tnam Jerusalén minti' jun xjal tuj, ik tza'n in b'aj tx'jet jun plat, nne'l su't a' ti'j ex in kub' mutzb'at.

14Atzun ch'intl tnam xjal etzan wu'ne, che kyjel nkoline ex che xel nq'o'ne tuj kyq'ab' qe aj q'oj kyi'j, tu'ntzun tel q'i'n tkyaqilju at kye ex tu'n tkub' kyi'j kyu'n.

15Porke aju kyb'inchb'en puro mya b'a'n ma tz'el tuj nwitze, ex kukx in tzaj nq'oje kyu'n, atxix tuj q'ij tej kyetz wi'ne qe kyxe'chel tuj Egipto ex kukx ja'lo, chi Dios.

16Tu'n kylaj qe il tb'incha Manasés, kyja'tzun e b'inchan qe aj Judá il tu'n. Tu'ntzun jlu, jumajx mya b'a'n e ela qe kyb'inchb'en tuj twitz Qman. Mya o'kx jlu, ax ikx e kub' tb'yo'n Manasés nimku xjal minti' kyil tuj Jerusalén, ex o noj enter tnam Jerusalén tu'n kychk'el xjal.

17Aju ch'intl tx'olb'ab'en ti'j Manasés ex ti'j tkyaqilju o tb'incha, kyuk'ix qe il e b'ant tu'n, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

18Tejtzun tkyim, ku'x maqu'n t-xol tqan awal te tja rey, aju tqan tawal Uza. Te tib'ajxi aju o kawin te t-xel, atzun Amón aju tky'ajal.

Tej tkawin Amón tuj Judá 2 Crónicas 33.21-25

19Toktoq Amón twi' 22 ab'q'i tej tok te rey, ex o kawin kab'e ab'q'i tuj Jerusalén. Aju ttxu' Amón Mesulemet tb'i, aju aj Jotba, ex tme'jel Haruz.

20Ex jumajx mya b'a'n e ela qe tb'inchb'en tuj twitz Qman, ik tza'nx qe tb'inchb'en Manasés aju qtzan tman,

21ex xi lpe' ti'j mya b'a'n tb'incha qtzan tman, ex o k'ulun kywitz qe tilb'ilal aqeju otoq k'ulun qtzan tman kywitz.

22Kyja'tzun kyaj tkolin Amón Qman, aju Kydios qtzan t-xe'chel, ex minti' xi tniman tyol.

23Qe xjal at kyoklen ttxlaj jaw kyi'n kyib' ti'j ex kub' kyb'yo'n tuj tja, aju tja rey.

24Ex qe tnam xjal e kub' kyb'yo'n qeju otoq che kub' b'yonte te rey Amón, ex ok kyq'o'n Josías aju tky'ajal, te rey.

25Aju ch'intl tx'olb'ab'en ti'j Amón ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

26Ku'x maqu'n Amón tuj tpantyón tkub' tuj tqan tawal Uza. Te tib'ajxi aju o kawin te t-xel, atzun Josías aju tky'ajal.