1Nman, aya Ndiose ex Klol weye, q'ijl ex qonik'an in xi nqanine onb'il teya,
2ponwit nyole twitza, q'ontz twi'ya ti'j nkub'sb'ile.
3Nimxix mya b'a'n ma tzaj wi'je, kyja'tzun ch'ix nkyime;
4jaku chin ok kyq'o'n te tajlal kyxol qe kyimni, porke ma chin kyaj tene minti' wipune.
5Ma chin kyaj q'o'ne kyxol qe kyimni, ik ntene ik tza'n qe xjal otoq che kyim tuj q'oj ex otoq che ku'x maqu'n; ex ik tza'n qeju minti'tl kolb'il kye tuk'ila ex otoq tzik' kyna'njtz tu'na.
6Ma chin ku'x tq'o'na max t-xe'pun jul, kyuj qe lugar qlolj kyuj ex ma' kyxe'.
7Ma tzaj nim tq'oja wi'je, ma chin oke ik tza'n jun xjal in kyaj mulq'aj tjaq' a' tu'nju b'is in tzaj tq'o'na.
8Tu'na ma chin kyaj koline kyu'n qe wamiwoye; tu'na ma chin el ik'une kyu'n. Presin qine ex minti' tumel tu'n ntzoqpaje.
9Tu'n tlaj nim in chin oq'e nib'an woke moẍ. Tkyaqil q'ij in chin kub'sane twitza Nman, ex in che jaw nyek'une qe nq'ab'e twitz kya'j tu'n nyoline tuk'ila.
10¿Jakupe che b'ant qe b'inchb'en nim kyipumal tu'na kye qe kyimni? ¿Jakupe txi kyq'o'n qe kyimni chjonte teya?
11¿Jakupe che yolin ti'j tyola axix tok ex ti'j tk'ujlalila tuj kynajb'il kyimni jatum in b'aj naj tkyaqil?
12Tuj kynajb'il kyimni puro qloljxix jatum nnik' tna'njtz tkyaqil, ¿atpe jun jaku tz'el tnik' ti'j ttena tz'aqlxix ex kyi'j qe tb'inchb'ena nim kyipumal?
13Atzun weye Nman, in chin qanine onb'il teya; prim in chin kub'sane twitza.
14¿Tiqu'n in chin el tik'una Nman? ¿Tiqu'n nne'l tewan tib'a nwitze?
15Atxix tuj nku'xumale in tene tuj b'is ex ch'ixmi in kyime; o tzik'x wu'ne qe ti'xti xob'ajilxix tzaj tq'o'na wi'je, ex mlay tzik'x mastl wu'ne.
16Ma tzaj ttx'u'jila xob'ajilxix wi'je ex ma chin naje tu'n,
17tkyaqil or txolin wi'je tu'n, mer ik tza'n tjaq' a' ma chin aj mulq'aje.
18O che el tlaq'b'a'na wi'je qe wamiwoye ex qe wuk'ile, atzun ja'lo o'kx qlolj at wuk'ile.
Who We AreWhat We EelieveWhat We Do
2025 by iamachristian.org,Inc All rights reserved.
