1At tzalajb'il kye qeju in che b'et minti' kypaltil ex in japun tley Qman kyu'n.
2At tzalajb'il kye qeju in kyb'incha'n aju in tma'n Dios tu'n tb'ant ex in che jyon ti'j Qman tu'n tkyaqil kyanmi,
3aqeju minti' in kyb'incha'n jun mya b'a'n, ex in che b'et tuj tb'e Qman.
4Aya o q'mante tu'n kyjapun qe t-xnaq'tzb'ila ik tza'nx kyten.
5Kukxwit chin tene wa'lxix tu'ntzun t-xi nnimane qe tleya.
6Mlay chin ch'ixwiye ok t-xi nnimane kykyaqil tmandamyenta.
7Axix tok kjawil nnimsa'ne tu'n wanmiye ok kyb'ant wu'ne qe tleya tz'aqlxix.
8Waje tu'n kyjapun qe tleya wu'ne. Mi'n chin kyaj tkolina te jumajx.
-2-9¿Ti jaku tenb'a tu'n jun ku'xun tu'n tten tchwinqlal saq? O'kx tu'n tanq'in ik tza'nx in tma'n tyola.
10In chin jyone ti'ja tu'n tkyaqil wanmiye; mi'n taq'a amb'il tu'n tel npa'n wib'e kyi'j qe tmandamyenta.
11O txi nk'u'ne qe tyola tuj wanmiye tu'ntzun mi'n nb'inchane il twitza.
12Nimanxwit tb'iya Nman. Chin t-xnaq'tzantza kyi'j qe tleya.
13O che'x nchik'b'a'ne kykyaqil qe tleya aqeju o tmaya.
14Mas in chin tzalaje tu'n wok lpe'ye kyi'j qe tmandamyenta twitz tkyaqil q'inumab'l.
15Chin b'el tene ximal kyi'j qe t-xnaq'tzb'ila ex k'okel nq'o'ne nwitze ti'j ju in b'ant tu'na.
16Chin tzalajele kyi'j qe tleya ex mlay tzik' tna'l tyola wu'ne.
-3-17B'inchama b'a'n weye aqine tmajena, tu'ntzun wanq'ine ex tu'n t-xi nnimane tyola.
18Spik'b'ama tuj nnab'le tu'ntzun twile qe t-xnaq'tzb'ila ma'xix kyxilen ex tb'anilxix.
19B'etin xjal qine tzalu twitz tx'otx'. Mi'n tz'el tewana qe tmandamyenta nwitze.
20Ma b'aj wipune tu'n tlaj waje tu'n wojtzqinteye qe tmandamyenta.
21In xi tmayo'na qeju in jaw kyniman kyib' ex mya b'a'n qe, aqeju nne'l kypa'n kyib' kyi'j qe tmandamyenta.
22Laq'b'a'n ela qe wi'je tu'n mi'n kyxmayin wi'je ex tu'n mi'n wel ik'une kyu'n, porke ma txi nb'i'ne qe tmandamyenta.
23Maske che yolin qe nejenel kyxol xjal tu'n kyb'inchante mya b'a'n wi'je, pero aqine tmajena kukx chin ximale kyi'j qe tleya.
24In chin tzalaje kyi'j qe tmandamyenta; atzun qe jlu in che q'onte nnab'le.
-4-25Ch'ix nkyime; q'ontza nchwinqlale ik tza'nxju yol o tzaj ttziyana.
26O txi nma'ne teya aju in b'aj wi'je, ex o chin tzaj ttzaq'we'na. Chin t-xnaq'tzantza kyi'j qe tleya.
27Q'ontza nnab'le tu'ntzun nxi lpe'ye kyi'j qe t-xnaq'tzb'ila ex waje tu'n nximane kyi'j qe tb'inchb'ena ma' kyxilen.
28In chin oq'e tu'nju at nimxix b'is tuj wanmiye; q'uqb'antza nk'u'je ik tza'nx ju yol o tzaj ttziyana.
29Mi'n taq'a amb'il tu'n nnik'ane yol ex chin t-xtalintza kyu'n qe t-xnaq'tzb'ila.
30O jaw nsk'o'ne ju b'e axix tok ex at nganiye kyi'j qe tleya.
31Nman, ma txi nq'on wib'e tu'n nnimane qe tmandamyenta; mi'n kub' tq'o'na nch'ixwiye.
32Nno'k tilil wu'ne tu'n kyjapun qe tmandamyenta ex nojni wanmiye tu'n tzalajb'il tu'na.
-5-33Nman, chin t-xnaq'tzantza kyi'j qe tleya ex kukx che xel nnimane te jumajx.
34Q'ontza nnab'le tu'ntzun tjapun t-xnaq'tzb'ila wu'ne; waje tu'n t-xi nnimane tu'n tkyaqil wanmiye.
35Onintza qine tu'n nnimane tmandamyenta, ex atzun in knet tzalajb'il wu'ne.
36Q'ontza nganiye kyi'j qe tmandamyenta ex mya ti'j kamb'ab'l in knet mya tuj tumel.
37Mi'n taq'a amb'il tu'n tok ten nwitze kyi'j qeju mya ax tok dios qe; q'ontza nchwinqlale tu'n nb'ete tuj tb'eya.
38Aqine tmajena, japunx tu'na wuk'ile aju yol o tzaj ttziyana kye qeju in che niman teya.
39Laq'b'a'n ela wi'je aju xmayb'il in chin xob'e ti'j, porke b'a'n qe tleya.
40At-xix nganiye kyi'j qe t-xnaq'tzb'ila; q'ontza nchwinqlale porke tz'aqlxix teya.
-6-41Nman, yek'untza weye aju tk'ujlalila ex ju kolb'il tu'na, ik tza'nx o tzaj ttziyana.
42Kyja'tzun jaku tzaq'wet wu'ne aju in xmayin wi'je tu'nju q'uql nk'u'je ti'j tyola.
43Chin tonintza tu'n kukx nyoline ti'j ju yol ax tok porke ma qe' nk'u'je ti'j tleya.
44Kukx che japunel qe tleya wu'ne tuj tkyaqil wanq'ib'le.
45Kyja'tzun jaku chin anq'ine tzoqpi'ntl qine, tu'nju otoq chinx lpe'ye kyi'j t-xnaq'tzb'ila.
46Ok chin yolile kyi'j qe tmandamyenta kywitz qe rey ex mlay tzaj nch'ixwiye,
47porke k'ujla'n qe tmandamyenta wu'ne ex in chin tzalaje kyi'j.
48K'ujla'n qe tmandamyenta wu'ne ex at nganiye kyi'j, ex nimxix in chin ximane kyi'j qe tleya.
-7-49Na'ntza aju yol tzaj tma'na weye, aqine tmajena; aju tzaj tma'na tu'n tqe' nk'u'je ti'j.
50Atzun jlu ma tz'ok te q'uqb'ab'l nk'u'je tuj b'is: Tu'nju yol tzaj ttziyana ma tzaj tq'o'na nchwinqlale.
51Qeju in jaw kyniman kyib' minti' in xi kykolin tu'n kyxmayin wi'je, atzun weye mlay tz'el npa'n wib'e ti'j tleya.
52Na'n wu'ne aju tzaj tma'na ojtxi tu'n tb'ant qu'ne, ex kyi'jtzun jlu in knet q'uqb'ab'l nk'u'je, Nman.
53Ma tzaj ntx'u'jile kyi'j qe xjal mya b'a'n tu'nju in kyaj kykolin tleya.
54In chin b'itzane kyi'j qe tleya tuj tx'otx' jatum atine ik tza'n b'etin xjal.
55Nman, qonik'an in tzaj nna'ne tb'iya; ex kjapunel tleya wu'ne.
56Atzun jlu kb'antel wu'ne: Kxel nnimane qe t-xnaq'tzb'ila.
-8-57Nman, o'kx aya wetzb'ile, o txi ntziyane tu'n t-xi nnimane tyola.
58Tu'n tkyaqil wanmiye ma chin kub'sane twitza, chin t-xtalin kub'a ik tza'nxju yol o tzaj ttziyana.
59In kub' tene ximal ti'j ju in b'ant wu'ne, ex in ajtz meltz'aje juntl maj tu'n t-xi nnimane qe tmandamyenta.
60Ok tilil wu'ne, jurat naj xi nnimane tmandamyenta.
61Ma b'aj kytxolin kyib' qe b'inchal mya b'a'n wi'je tu'n ntzyete kyu'n, ex minti' ma tzik' kyna'njtz qe tleya wu'ne.
62Tmij aq'b'il in chin jaw we'ye q'ol chjonte teya kyi'j qe tleya tz'aqlxix.
63Wamiw wib'e kyuk'il qeju in che niman teya ex kyuk'il qeju in che japun qe tleya kyu'n.
64Nman, nojni twitz tx'otx' tu'n tk'ujlalila; chin t-xnaq'tzantza kyi'j qe tleya.
-9-65Nman, ma tb'inchaya b'a'n weye, aqine tmajena, ik tza'nx ju yol o tzaj ttziyana.
66Chin t-xnaq'tzantza tu'n tten nnab'le ex wojtzqib'le, porke q'uql nk'u'je kyi'j qe tmandamyenta.
67Tej na'nxtoq nyajlanjtze, in el txalpuje ti'j tb'eya, atzun ja'lo in xi nnimane tyola.
68B'a'n teya ex in tb'incha'na aju b'a'n; chin t-xnaq'tzantza kyi'j qe tleya.
69Qeju in jaw kyniman kyib' in xi kynik'an yol wi'je, ex in che japun qe t-xnaq'tzb'ila wu'ne tu'n tkyaqil wanmiye.
70Tzpetni ta' kynab'l, atzun weye in chin tzalaje ti'j tleya.
71B'a'n ok te weye tej nyajlanjtze, kyja'tzun tten el nnik'e kyi'j qe tleya.
72Te weye mas ma' toklen aju xnaq'tzb'il tzaj tq'o'na twitz nimku q'an pwaq ex saq pwaq.
-10-73Tu'na kub' tb'incha'na qine; q'ontza nnab'le tu'n tel nnik'e kyi'j qe tmandamyenta.
74Qeju in che niman teya che tzalajel ok wok kyke'yin, porke ma tz'ok qe' nk'u'je ti'j tyola.
75Nman, b'a'n wu'ne tz'aqlxix qe tleya ex tuj tumel in yajlanjtze tu'na.
76Tz'ajb'enwt tk'ujlalila te q'uqb'ab'l nk'u'je, ik tza'nx ju yol tzaj ttziyana weye.
77Tzaj tz'e'y tk'u'ja wi'je tu'ntzun wanq'ine, porke in chin tzalaje ti'j tleya.
78Tzajxwit kych'ixwi qeju in jaw kyniman kyib' ex qeju noq elajx in chin ok kyyaso'n; waje tu'n nximane kyi'j qe t-xnaq'tzb'ila.
79Tz'okwit kychmon kyib' wuk'ile qeju in che niman teya, aqeju ojtzqi'n qe tmandamyenta kyu'n.
80Kuchiwt tu'n wok lpe'ye kyi'j qe t-xnaq'tzb'ila tu'n tkyaqil wanmiye, tu'ntzun mi'n njaw ch'ixwiye.
-11-81Nib'an tb'aj wipune tu'n tlaj in chin ayone ti'j tu'n nklete tu'na; pero ma tz'ok qe' nk'u'je ti'j tyola.
82Nib'an tb'aj kyipun qe tb'aq' nwitze tu'nju in chin ayone ti'j tu'n tjapun ju yol o tzaj ttziyana, ex in nma'ne: ¿Jtoj b'an ttzaja q'uqb'alte nk'u'je?
83Maske ma chin tijine ex minti'tl wajb'ene, pero minti' nnik' kyna'njtz qe tleya wu'ne.
84¿Jte' q'ijtl tu'n nyone ti'j? ¿Jtoj b'an tkub' tq'o'na kysentens qeju in che yajlante weye?
85Qe xjal in jaw kyniman kyib' ex minti' in xi kyniman tleya ma ku'x kylaku'n jun jul tu'n nxi tz'aqe tuj.
86Chin tonintza, ex noqx gan in chin b'aj yajla'ne. Kykyaqil tmandamyenta axix tok qe.
87Ch'ixmi in kub' b'yo'ne kyu'n xjal, pero minti' kyaj nkoline qe t-xnaq'tzb'ila.
88Q'ontza nchwinqlale ik tza'nx tk'ujlalila tu'ntzun kyjapun qe tmandamyenta wu'ne.
-12-89Nman, te jumajx ktel tyola kyuwsa'maj max tuj kya'j.
90Aju yol in tzaj ttziyana kukx in japun tu'na; tu'na kub' tb'incha'na aju tx'otx' ex kukx tten.
91Kykyaqil ti'xti kukx wa'lx qe ik tza'n kyaj tma'na, ex kykyaqil in che ajb'en teya.
92Noqwit minti' in tzaj ti'n t-xnaq'tzb'ila tzalajb'il weye, mawtlo chin naje tu'n b'is.
93Mlayx tzik' kyna'njtz qe t-xnaq'tzb'ila wu'ne, porke kyu'n qe jlu ma tzaj tq'o'na nchwinqlale.
94Chin tkloma porke teya qine ex ma chin ok lpe'ye kyi'j qe t-xnaq'tzb'ila.
95Qe xjal mya b'a'n o'kx in che ayon ti'j tu'n nnaje kyu'n, atzun weye o'kx in chin ximane kyi'j qe tmandamyenta.
96Ma wile, kykyaqil ti'xti at jatum tu'n kypon b'aj, atzun qe tmandamyenta minti' b'ajsb'il kye.
-13-97K'ujla'nxix tleya wu'ne. Tkyaqil q'ij in chin ximane ti'j.
98Kyu'n qe tmandamyenta at mas nnab'le kywitz aj q'oj wi'je tu'nju kukx ate' qe tmandamyenta wuk'ile.
99Mas ma tzik' nnab'le kywitz qe xnaq'tzal weye tu'nju kukx in chin ximane ti'j ju in tma'na weye tu'n nb'inchanteye.
100Mas ma tzik' nnab'le kywitz qe tij xjal tu'nju niman qe tmandamyenta wu'ne.
101Ma tz'el npa'n wib'e ti'j tkyaqil b'e mya b'a'n tu'ntzun tjapun tyola wu'ne.
102B'ajx tz'el npa'n wib'e kyi'j qe tmandamyenta tu'nju aya xnaq'tzal weye.
103Aju yol tzaj ttziyana weye mas chi' nne'l tuj ntzi'ye twitz ta'l kab'.
104Kyu'n qe tmandamyenta ma tz'ok nnab'le, kyja'tzun nne'l wik'une tkyaqil xnaq'tzb'il nik'aj yol.
-14-105Ik tten tyola ik tza'n jun kandil te ẍaqlul weye, in tq'o'n spik'un tuj nb'eye.
106Xi ntziyane jun nyole axix tok ex kjapunel wu'ne; qe tmandamyenta tz'aqlxix che japunel wu'ne.
107Nman, nimxix yajb'il ma tzaj wi'je, q'ontza wanq'ib'le ik tza'n o tzaj ttziyana.
108K'monxa nyole te aq'b'il chjonte teya Nman, ex chin t-xnaq'tzantza kyi'j qe tmandamyenta.
109Kukx nne'lje' wi'je tu'n nkyime, ex mlay tzik' tna'l tleya wu'ne.
110Qe xjal mya b'a'n in kub' kyq'o'n k'ob'il tuj nb'eye, ex b'ajx tz'el npa'n wib'e kyi'j qe t-xnaq'tzb'ila.
111Ma che ok qe tmandamyenta te jun wetzb'ile te jumajx porke in kyq'o'n tzalajb'il te wanmiye.
112Tu'n tkyaqil wanmiye ma kub' nximane tu'n kyjapun qe tleya wu'ne te jumajx.
-15-113In che el wik'une qe xjal xmletz', atzunju tleya k'ujla'n wu'ne.
114Aya klol weye ik tza'n jun maqb'il tu'n nklete; ma tz'ok qe' nk'u'je ti'j tyola.
115Kylaq'b'amil kyib'e wi'je aqeye xjal mya b'a'n, porke waje tu'n kyjapun wu'ne qe tmandamyent Ndiose.
116Q'ontza wipune ik tza'nxju yol o tzaj ttziyana, tu'ntzun wanq'ine; japunx tu'na aju tzaj ttziyana, tu'ntzun mi'n wele tuj nch'ixwiye.
117Chin tonintza ex jaku chin klete; kyja'tzun kukx che japunel qe tleya wu'ne.
118In che el tik'una qeju nne'l kypa'n kyib' kyi'j qe tleya porke minti' tnab'l kyximb'etz.
119Qe xjal mya b'a'n ate' twitz tx'otx' in che el tik'una ik tza'n tz'is; kyja'tzun k'ujla'n qe tmandamyenta wu'ne.
120In lu'lun nximlale tu'nju in chin xob'e twitza; ma tzaj t-xob'il wi'je kyu'n qeju castiw tu'na.
-16-121B'ajx txi nkoline tu'n nb'inchanteye aju tz'aqlxix; mi'n chinx tq'o'na tuj kyq'ab' qeju yajlal weye.
122Tkyaj we'ya wi'je tu'n tb'inchanteya b'a'n weye; tu'n mi'n nb'aj kyyaso'n qeju in jaw kyniman kyib'.
123Nib'an tb'aj kyipun qe tb'aq' nwitze tu'n tlaj in chin ayone tu'n nklete tu'na, in chin ayone tu'n ntzoqpete tu'na ik tza'nx o tzaj ttziyana.
124Xtalin kub'a qine tu'nju tk'ujlalila, aqine tmajena; chin t-xnaq'tzantza kyi'j qe tleya.
125Aqine tmajena. Q'ontza nnab'le ex waje tu'n tel nnik'e kyi'j qe tmandamyenta.
126Nman, ma pon tq'ijlalil tu'n tkub' kycastiw tu'na porke minti' o txi kyniman tleya.
127Kyja'tzun in nk'ujla'ne qe tmandamyenta mas twitz q'an pwaq tb'anilxix.
128Kyja'tzun in chinx lpe'ye kyi'j qe t-xnaq'tzb'ila ex nne'l wik'une kykyaqil xnaq'tzb'il nik'aj yol.
-17-129Ma' t-xilen tkyaqilju t-xnaq'tzb'ila, kyja'tzun niman wu'ne.
130Aju chik'b'ab'l ti'j tyola in t-spik'b'a'n tuj qnab'le ex in tq'o'n kynab'l qe xjal ch'in kynab'l.
131Nimxix waje kyi'j qe tmandamyenta.
132Chin tke'yintza ex tzajx tz'e'y tk'u'ja wi'je ik tza'n in tb'incha'na kyi'j qeju in che k'ujlan teya.
133Chin t-ẍaqluma ik tza'nx in tma'n tyola, ex mi'n taq'a amb'il tu'n tkub' wi'je tu'nju mya b'a'n.
134Chin tkloma teju yajb'il weye kyu'n xjal ex waje tu'n kyjapun qe tmandamyenta wu'ne.
135Chin tke'yintza tu'n tzalajb'il, aqine tmajena, ex chin t-xnaq'tzantza tu'n tel nnik'e kyi'j qe tleya.
136Nimxix ta'l nwitze nne'l mer ik tza'n jun nima, porke minti' in xi niman t-xnaq'tzb'ila kyu'n xjal.
-18-137Tz'aqlxix teya Nman, ex tz'aqlxix qe tmandamyenta.
138Aju tmaya qeye tu'n qb'inchanteye, tz'aqlxix ex ax tok.
139Ma tzaj tlo'ch nk'u'je, porke qe aj q'oj wi'je minti' kyaj ti'j tyola.
140Aju tyola minti' tpaltil, kyja'tzun k'ujla'n wu'ne, aqine tmajena.
141Noq ch'in woklene ex ik'un qine kyu'n xjal, pero minti' ma tzik' kyna'l qe tmandamyenta wu'ne.
142Tz'aqlxix teya te jumajx, ex aju xnaq'tzb'il tu'na axix tok.
143O chin tene tuj k'ixk'oj ex tuj b'is, ex aqe tmandamyenta e tzalajsante weye.
144Qe tmandamyenta tz'aqlxix qe te jumajx; q'ontza nnab'le tu'n wanq'ine.
-19-145Nman, in chin kub'sane twitza tu'n tkyaqil wanmiye; chin ttzaq'wentza, waje tu'n kyjapun qe tleya wu'ne.
146Twitza in chin kub'sane, chin tonintza tu'ntzun kyjapun qe tmandamyenta wu'ne.
147Na'nxtoq tkub' q'ij, in chin jaw we'ye qanil onb'il teya; ma tz'ok qe' nk'u'je ti'j tyola.
148In chin itz'lene enter aq'b'il tu'ntzun nximane ti'j ju yol o tzaj ttziyana.
149B'intza tq'ajq'ajel nwi'ye Nman noq tu'nju tk'ujlalila; q'ontza nchwinqlale ik tza'nx tajb'ila.
150Niqayin ate' wi'je qe yajlal weye mya b'a'n qe, ex najchaq kyelsa'n ti'j tleya.
151Niqayin ta'ya Nman, ex kykyaqil qe tmandamyenta axix tok qe.
152Atxix ojtxi wojtzqiye qe tmandamyenta, aqeju e kyaj b'ant tu'na te jumajx.
-20-153Ke'yintza aju yajb'il weye ex chin tkloma porke minti' nnik' tna'njtz tleya wu'ne.
154Yolina wi'je tu'n nklete ex kolpima qine, q'ontza nchwinqlale ik tza'nx ju yol o tzaj ttziyana.
155Mlayx che klet qe xjal mya b'a'n porke minti' in che ok lpe' kyi'j qe tleya.
156Nman, nim tq'aq'b'il tk'u'ja; q'ontza nchwinqlale ik tza'nx tajb'ila.
157Nim kyajlal qe aj q'oj wi'je ex yajlal weye, pero minti' nne'l npa'n wib'e kyi'j qe tmandamyenta.
158Minti' in kub' tuj nwitze qe xjal in che ok meltz'aj ti'ja tu'nju minti' in xi kyniman qe tmandamyenta.
159Nman, ke'yintza nim in nk'ujla'ne qe t-xnaq'tzb'ila; q'ontza nchwinqlale tu'nju tk'ujlalila.
160Kykyaqil qe tyola axix tok qe; kykyaqil qe tleya tz'aqlxix qe ex te jumajx qe.
-21-161Qe nejenel kyxol xjal noqx gan in chin b'aj yajla'ne kyu'n, atzun weye in chin xob'e tu'n tyola.
162In chin tzalaje tu'nju yol o tzaj ttziyana, ik tza'n jun xjal otoq tz'ok noj ti'j jun nintz q'inumab'l.
163Nne'l wik'une aju nik'aj yol ex minti' in kub' tuj nwitze, pero in nk'ujla'ne aju tleya.
164Tkyaqil or in jaw nnimsa'ne tb'iya noq tu'nju tz'aqlxix qe tleya.
165Qeju in kyk'ujla'n qe tleya txub'txaj ate', ex noq alkyex ma tzaj kyi'j, mlay che kub' tz'aq.
166Nman, chin ayole ti'j tu'n nklete tu'na, porke ma che japun qe tmandamyenta wu'ne.
167In che'x nnimane qe tmandamyenta ex in che nk'ujla'ne tu'n tkyaqil wanmiye.
168In che'x nnimane qe t-xnaq'tzb'ila ex qe tmandamyenta; ojtzqi'n tu'na kykyaqil qe nb'inchb'ene.
-22-169Ok njaw sch'ine, ponxwit tq'ajq'ajel nwi'ye twitza Nman; q'ontza nnab'le ik tza'nx tyola.
170Ponxwit aju nna'j Diose twitza; chin tkloma ik tza'nx o tzaj ttziyana.
171Kuchiwt kukx jaw nnimsa'ne tb'iya, porke o chin tzaj t-xnaq'tza'na kyi'j qe tleya.
172Kuchiwt kukx t-xi nb'itzane jun b'itz ti'j ju yol o tzaj ttziyana, porke kykyaqil qe tmandamyenta tz'aqlxix qe.
173Noq tenkuya tu'n ttzaj tq'o'na onb'il weye, porke o jaw nsk'o'ne qe t-xnaq'tzb'ila.
174Nman, waje tu'n nklete tu'na. In chin tzalaje ti'j tleya.
175Waje chin anq'ine tu'n tjaw nnimsa'ne tb'iya; awt ju tb'inchb'ena tz'aqlxix onin wi'je.
176Ma chin el tzpete ik tza'n jun ẍne'l; tzaja jyolte weye porke minti' nnik' kyna'l qe tmandamyenta wu'ne.
Who We AreWhat We EelieveWhat We Do
2025 by iamachristian.org,Inc All rights reserved.
