Levítico 18 - Mam Huehuetenango New Ortography

Qe ley tu'n mi'n kytan xinaq kyuk'il nimku xu'j

1Tzaj yolin Qman tuk'il Moisés ex tma:

2Q'manxa kye aj Israel kyja': Aqine Kymane ex Kydiose.

3Mi'n che'x lpe'ye kyi'j kycostumr aj Egipto, tuj tx'otx' jatum e najane nej.

Mi'n che ok lpe'ye kyi'j kycostumr aj Canaán, tuj tx'otx' jatum che pol wi'ne, ex mi'n kyb'inchaye ik tza'nx kye kyley.

4Japunx qe nmandamyente ex qe nleye kyu'ne ex che anq'ine ik tza'nx in kyma'n. Aqine Kymane ex Kydiose.

5Kyb'inchame tkyaqilju in kyma'n qe nleye ex qe nmandamyente. Aju xjal kjapunel tu'n, k'anq'il. Aqine Kymane.

6Mi jun xinaq b'a'n tu'n tkub' tan tuk'il jun xu'j at t-xilen tuk'il. Aqine Kymane.

7Mi'n kub' tq'o'na tch'ixwi tmana tu'n tkub' tana tuk'il ttxu'ya. Mya b'a'n tu'n tb'inchanteya ikju, porke ttxu'ya jlu.

8Mi'n kub' tq'o'na tch'ixwi tmana tu'n tkub' tana tuk'il juntl t-xu'jil tmana.

9Mi'n kub' tana tuk'il tanb'a. Qa jun tanb'a o'kx tmana junx tuk'il ex qa noq o'kx ttxu'ya junx tuk'il, qa ax otoq tzul itz'j tuj ja ex qa ti'jxi, pero mi'n kub' tana tuk'il.

10Mi'n kub' tq'o'na tch'ixwiya tu'nx tib'a tu'n tkub' tana tuk'il jun tchmana xu'j, qa tme'jel jun tky'ajala ex qa tal jun tme'jela. Pero mi'n kub' tana tuk'il.

11Mi'n kub' tana tuk'il jun tal juntl t-xu'jil tmana, porke a tmana otoq tzaj k'wa'linte te, ex tanb'a jlu. Mi'n kub' tana tuk'il.

12Mi'n kub' tana tuk'il tanb' tmana; porke terman tmana jlu.

13Mi'n kub' tana tuk'il jun xu'j terman ttxu'ya; porke terman ttxu'ya jlu.

14Mi'n kub' tq'o'na tch'ixwi terman tmana tu'n tkub' tana tuk'il t-xu'jil, porke t-xu'jil terman tmana jlu.

15Mi'n kub' tana tuk'il tlib'a, porke t-xu'jil tky'ajala jlu; kyja'tzun mi'n kub' tana tuk'il.

16Mi'n kub' tq'o'na tch'ixwi termaniya tu'n tkub' tana tuk'il t-xu'jil.

17Mi'n kub' tana tuk'il jun xu'j ex tuk'il jun tal ax xu'j, ex mi'n kub' tana tuk'il jun tal tchman xu'j lu, qa tme'jel jun tal ex qa tal jun tal xu'j lu. Aju b'inchb'en lu jumajx mya b'a'n, porke kypamili kyib' qe jlu.

18Mi'n jaw t-xu'jla'na jun terman t-xu'jila, ex mi'n kub' tana tuk'il akux itz'x t-xu'jila, tu'ntzun mi'n tkub' ten q'oj kyxol.

19Mi'n kub' tana tuk'il jun xu'j ok tul ẍwo'j ti'j.

20Mi'n kub' tana tuk'il t-xu'jil jun tuk'ila, tu'ntzun mi'n ttz'ilixa tu'n jlu.

21Mi'n txi tq'o'na jun tk'wa'la tu'n tkub' patit te jun oyaj te Moloc aju tilb'ilal nno'k kydiosin xjal. Mi'n tb'inchaya jlu tu'ntzun mi'n kyyolin xjal mya b'a'n ti'j Nb'iye. Aqine Kymane.

22Mi'n kub' tana tuk'il jun xinaq ik tza'n in kub' tana tuk'il xu'j, porke ik'b'ilxix jlu.

23Mi'n kub' tana tuk'il jun alumaj, tu'ntzun mi'n ttz'ilixa. Ax ikx mya b'a'n tu'n t-xi tq'on tib' jun xu'j te jun alumaj, porke ik'b'ilxix jlu.

24Mi'n b'aj kytz'ilsan kyib'e kyu'n qe jlu, porke kyu'ntzun qe jlu ma b'aj kytz'ilsan kyib' qe xjal, aqeju che elex nlajo'ne kywitze,

25ex tuk'ix kytx'otx' ma tz'ilix; kyja'tzun ma kub' kycastiw wu'ne ti'j kyb'inchb'en mya b'a'n ex ma che ex nlajo'ne tuj kytx'otx'.

26Atzun kyeye, aqeye aj Israel ex qe stranjer xjal najl kyxole, japunx qe nleye ex qe nmandamyente kyu'ne, ex mi'n kyb'inchaye qe b'inchb'en lu, aqeju ik'b'ilxix,

27porke tkyaqil aju mya b'a'n lu o kyb'incha' qe xjal najlqetoq tuj tx'otx' nej, ex aju tx'otx' b'i'x o tz'ilix kyu'n.

28Mi'n kyb'inchaye qe jlu tu'ntzun mi'n kyex nlajo'ne tuj tx'otx' lu, ik tza'nx ma che ex nlajo'ne qe xjal najlqetoq tuj nej.

29Alkye jun xjal ma tb'incha noq alkyexku jun kyxol qeju mya b'a'n lu, aqeju ik'b'ilxix, b'i'x k'elex lajet tu'ntzun mi'n ttentl kyxol t-xjalil.

30Kyja'tzun, japunx qe nmandamyente kyu'ne ex mi'n kyb'inchaye mya b'a'n lu, aqeju ik'b'ilxix in kyb'incha'n xjal tuj tx'otx' jatum che pole, ex mi'n b'aj kytz'ilsan kyib'e kyu'n qe jlu. Aqine Kymane ex Kydiose.