1-2Tzyettzun tyolin Job ex xi' tyol ti'j ju q'ij tej tul itz'j ex tma:
3—Kuchiwt tu'n tnaj ju qonik'an tej wok tene tuj talb'il ntxu'ye, ex kuchiwt tu'n tnaj ju q'ij tej witz'je.
4Noqwit ok ju q'ij te qonik'an tej witz'je ex noqwit ik' tna'l tu'n Dios tu'n mi'n tjawil q'ij.
5Noqwit ok yupj tu'n txqan q'eq muj ex b'i'xwit okx naj tuj, ex noqwit yupj twitz q'ij tu'n ttzaj xob'ajil.
6Noqwit b'i'x xi naj ju qonik'an lu tuj qxopin ex minti'wt ok tajlal kyxol qe txqantl q'ij te xjaw ex te ab'q'i.
7Noqwit minti' e itz'j k'wa'l tuj qonik'an lu, ex noqwit minti' jaw tq'ajq'ajel kywi xjal tu'n tzalajb'il tej tul itz'j jun ne'.
8Noqwit otoq txi' kyyol qe aj q'ij ti'j ju q'ij lu, aqeju b'a'n txi niman kyyol tu'nju nintz txkup at tuj mar, Leviatán tb'i.
9Noqwit minti' e k'ant qe che'w te prim lu, ex noqwit minti' jawil q'ij aju in che ayon xjal ti'j, ex minti'wt tzaj t-xe kya'j.
10Kuchiwt tu'n tnaj ju qonik'an lu, aju o taq' amb'il tu'n witz'je, tu'nju minti' mayet tu'n aju k'ixk'oj ma tzaj wi'je.
11¿Tiqu'n mi in kyime tuj talb'il ntxu'ye, ex tiqu'n mya b'i'x in kyime texju or tej witz'je?
12¿Tiqu'n in kub' q'o'ne twi tqan ntxu'ye, ex tiqu'n tzaj q'o'n nch'u'ye tu'n ntxu'ye?
13Noqwit b'i'x in kyime tej wul itz'je, luwtlo qine in chin tan tuj txub'txaj ex luwtlo qine in chin ojlan tuj txub'txaj,
14kyuk'il qe rey ex kyuk'il qe txqantl xjal at kyoklen ttxlaj rey, aqeju in b'aj kyb'incha'n qe nmaq kypantyón,
15ex qa kyuk'il qe kawil, aqeju in b'aj kychmo'n nim q'an pwaq ex saq pwaq tuj kyja.
16¿Tiqu'n minti' in ku'x maqu'ne ik tza'n jun k'wa'l minti' in japun tq'ij tu'n tul itz'j, ex qa ik tza'n qe k'wa'l otoq che kyim ok kyul itz'j?
17Ok kyku'x maqut qe xjal b'inchal mya b'a'n, ya mlay che yajlantl kyi'j kyuk'il, ex qe xjal otoq che sikt wen, atzun in che ojlan.
18Atzun in che ten qe pres tuj txub'txaj, ex ya mi a'l caporal tu'n tyolin kyuw kye;
19atzun in che pon qe xjal ma' kyoklen ex qe ch'in kyoklen, ex ju majen tkyaj tjaq' tkawb'il patrón, atzun in tzoqpet.
20¿Tiqu'n in tzaj tq'o'n Dios spik'un te xjal nim nnik'x tu'n?
21In ayon tu'n tkyim, ex minti'x in kyim; mas in jyon ti'j kamik twitzju q'inumab'l tku'x tjaq' tx'otx'.
22Maxitzun ktzalajel xjal lu ok tku'x maqu'n.
23Noq in takpaje' xjal tu'n Dios, porke maqo'n tb'e tu'n tuj tkyaqil pak'.
24Minti' ch'in in chin wa'ne, noq o'kx in chin ayayane; ex ok in chin ayayane, mer ik tza'n tq'ajq'ajel txqan a' minti' in we' tu'n tq'ajt.
25Tkyaqilju in chin xob'toqe ti'j ex aju mas tzaj t-xob'il wi'je, ma tzaj wi'je.
26Minti' in chin ojlane ex minti' in chin tene tuj txub'txaj; minti' in chin tene tuj tzalajb'il, noq o'kx in chin yajlanjtze.
Who We AreWhat We EelieveWhat We Do
2025 by iamachristian.org,Inc All rights reserved.
