Jeremías 36 - Mam Huehuetenango New Ortography

Jaw t-sch'i'n Baruc aju yol tz'ib'an tuj u'j

1Tuj tkyajin ab'q'i toklen Joacim aju tky'ajal Josías te rey tuj Judá, tzaj yolin Qman tuk'il Jeremías ex tma kyja':

2Q'intza jun b'otz' u'j ex tz'ib'ankuya tkyaqil yol o txi nma'ne teya kyi'j aj Israel, kyi'j aj Judá ex kyi'j txqantl nasyon, atxix tej nyoline tnejel maj tuk'ila, tej tten Josías te rey asta ja'lo.

3Mya yajku ok kyb'inte aj Judá tkyaqilju mya b'a'n o kub' nximane tu'n ttzaj nsama'ne kyib'aj, jaku kyaj kykolin tu'n kyb'inchante mya b'a'n, ax ikx weye jaku kub' nnajsa'ne kyil ex kyb'inchb'en mya b'a'n, chi Dios.

4Tzajtzun txko'n Baruc tky'ajal Nerías tu'n Jeremías, ex ok ten Jeremías q'malte tkyaqil yol otoq tzaj q'ma'n te tu'n Qman, atzunte Baruc kub' ttz'ib'an twitz jun b'otz' u'j.

5Te tib'ajxi xi tma'n Jeremías te Baruc kyja': Weye minti' permis tu'n nxi'ye tuj tja Dios,

6kyja'tzun, txi'ya tuj tja Dios tuj jun q'ij ok in kub' kyyo'n xjal we'yaj, ex sch'in jawa aju yol tz'ib'an twitz u'j, aju xi nma'ne teya tu'n tkub' ttz'ib'ana, tu'ntzun kyb'inte kykyaqil xjal aju tyol Qman, ex tu'n kyb'inte kykyaqil aj Judá, aqeju che ul tuj tja Dios.

7Mya yaj jaku che ok ten kub'sal twitz Qman, ex qape jaku kyaj kykolin kyb'inchb'en mya b'a'n, porke xob'ajilxix ttx'u'jil Qman ex tq'oj ma tzaj tma'n ti'j tnam lu, chi Jeremías.

8Tb'inchatzun Baruc tkyaqilju otoq txi q'ma'n te tu'n Jeremías aju t-sanjel Dios. Xi' tuj tja Dios ex jaw t-sch'i'n aju tz'ib'an tuj jun b'otz' u'j.

9Tuj tb'elajin xjaw te tjwe'yin ab'q'i toklen Joacim aju tky'ajal Josías te rey tuj Judá, etz jun orden tu'n kye aj Jerusalén ex kye xjal otoq che tzaj kyuj txqantl tnam te Judá, tu'n tkub' kyyo'n we'yaj twitz Qman.

10Xi'tzun Baruc tuj ttxa'n pe'n ma' tjaw te tja Dios, jatum nno'kx b'e ttzi Ak'aj Tlamel, ex max jatum ta' tcuart Gemarías aju aj tz'ib'al, aju tky'ajal Safán; ex kywitz kykyaqil xjal jaw t-sch'in Baruc tyol Jeremías, aju tz'ib'an twitz u'j.

Jaw t-sch'i'n Baruc qe yol tz'ib'an twitz u'j, kywitz qe xjal ma' kyoklen

11Tej tb'inte Micaías aju tky'ajal Gemarías ex tal tchman Safán tkyaqil tyol Qman jaw t-sch'i'n Baruc twitz u'j,

12xi' max tuj tja rey jatum ta' tcuart aj tz'ib'al te rey, ex jatum kychmon kyib' qe xjal ma' kyoklen. Atzun qe jlu: Elisama aju aj tz'ib'al te rey, Delaía aju tky'ajal Semaías, Elnatán aju tky'ajal Acbor, Gemarías aju tky'ajal Safán, tuk'ix Sedequías aju tky'ajal Hananías kyuk'ix txqantl xjal ma' kyoklen.

13Xi ttx'olb'a'n Micaías tkyaqilju otoq tb'i tej tjaw t-sch'i'n Baruc kywitz xjal aju yol tz'ib'an twitz ju u'j.

14Atzun kye xjal ma' kyoklen xi kysama'n Jehudí tuk'il Baruc, tu'n t-xi tma'n te tu'n tpon kyuk'il ex tu'n tpon ti'n aju u'j otoq jaw t-sch'i'n kywitz xjal. Ate Jehudí tky'ajal Netanías, tal tchman Selemías ex ttxk'a tchman Cusi. Xitzun ti'n Baruc ju u'j ex pon kyuk'il xjal ma' kyoklen,

15atzun kye xi kyma'n te:

—Qekuya ex sch'in jawa qwitze, tu'n qb'inteye aju yol tz'ib'an twitz u'j.

Jawtzun t-sch'i'n Baruc,

16ex tej kyb'inte tkyaqil yol lu, teyle junjun b'aj kyke'yin tuj kywitz, in che xob' ex kyma:

—Il ti'j tu'n t-xi qtxolb'a'n tkyaqil jlu te rey.

17Te tib'ajxi xi kyma'n te Baruc:

—Q'mantza qeye tza'n tten kub' ttz'ib'ana tkyaqil jlu. ¿Apetzun Jeremías tzaj q'mante teya tu'n ttz'ib'ana ju yol lu?

18Atzunte Baruc xi ttzaq'we'n:

—Twitzelku Jeremías tzaj q'mante tkyaqil jlu weye, ex atzun weye nku'xxi ntz'ib'ane tu'n tint tuj jun b'otz' u'j.

19Xitzun kyma'n te Baruc: Kyxi'ye ewal kyib'e, aya tuk'ix Jeremías, tu'ntzun mi a'l jun b'a'n tb'inte jatum ate'ye.

Kub' tpatun rey Joacim aju u'j tz'ib'an yol twitz

20Kyaj kyq'o'n xjal ma' kyoklen ju u'j tuj tcuart Elisama aju aj tz'ib'al te rey, ex e je'x max tuj tja rey tu'n t-xi kytx'olb'a'n te tkyaqil aju otoq kyb'i.

21Xitzun sama'n Jehudí tu'n rey q'ilte u'j, ma tuj tcuart Elisama aju aj tz'ib'al te rey, ex tej tul ti'n Jehudí, jaw t-sch'i'n twitz rey ex kywitz kykyaqil xjal ma' kyoklen ate' ttxlaj.

22Tu'nju atzun ate'toq tuj tb'elajin xjaw, ex maxtoq ta' rey tuj jun cuart in ajb'en tu'n tuj tq'ijlalil che'w, ex attoq jun tkub'il xq'a'l in k'ant tkub' twitz.

23Ok in b'aj t-sch'i'n Jehudí ox ex qa kyaje piẍ u'j, nne'lxi tk'apu'n rey tu'n kchil ex nkub'xi tpatun tuj tkub'il xq'a'l. Kyja'ylex o tenb'a tu'n, tejxi tkub' b'aj tpatun tkyaqil u'j.

24Minti' tzaj t-xob'il rey, mi qe xjal ma' kyoklen, ex mi qeju e b'in ti'j tej tjaw sch'i'n u'j, ex minti' el kysb'it'un kyxb'alun kyi'j.

25Maske e kub'san Elnatán tuk'ix Delaía ex Gemarías twitz rey tu'n mi'n tkub' tpatun u'j, pero minti' xi tniman kyyol,

26noq o'kx xi tma'n te Jerameel aju tky'ajalx, ex te Seraías aju tky'ajal Azriel, ex te Selemías aju tky'ajal Adbeel, tu'n kyxi' tzyulte Jeremías aju t-sanjel Dios, tuk'ix Baruc aju aj tz'ib'al te Jeremías, tu'ntzun kyokx q'o'n tuj pres. Ex e je'x ewan tu'n Qman.

Kub' ttz'ib'an Baruc juntl maj tkyaqil aju xi tma'n Jeremías te

27Te tib'ajxi tkub'len tpatun rey u'j jatum tz'ib'an aju yol otoq txi tma'n Jeremías te Baruc, tzaj yolin Qman tuk'il Jeremías kyja':

28Q'intza juntl b'otz' u'j ex tz'ib'an kub'a juntl maj tkyaqil yol tz'ib'amaj twitz tnejel, aju kub' tpatun Joacim aju rey te Judá.

29Ex q'manxa te rey: Chi Qman teya kyja': Ma kub' tpatuna aju b'otz' u'j ex ma tmaya: ¿Tiqu'n ma kub' ttz'ib'an Jeremías twitz u'j qa tzul rey te Babilonia tu'n tnaj tnam lu tu'n, ex qa minti' xjal kyjel ten tuj tx'otx' lu, mi alumaj, chiya?

30Kyja'tzun aqine Dios in chin q'mante jlu teya Joacim, aya rey te Judá: Mlay che ok qe tiyjila te rey tu'n kyokx qe' tuj tq'uqb'il David. Ok tkyima, aju t-ximlala kukx kyjel pale' ti'j q'ij ex ti'j tq'ab' che'w,

31ex tzul nq'o'ne castiw tib'aja, kyib'aj qe tiyjila ex kyib'aj qe xjal ma' kyoklen ate' ttxlaja, tu'n tlaj kyile. Kb'el nq'o'ne tkyaqil txkaj castiw kyib'aje ex kyib'aj qe xjal najl tuj Jerusalén ex kyib'aj aj Judá, ik tza'n o nmaye kye, tu'nju minti' ma txi kyb'i'ne nyole, chikuya te rey, chi Qman te Jeremías.

32Tzajtzun ti'n Jeremías juntl b'otz' u'j ex xi tq'o'n te Baruc aju tky'ajal Nerías ex aj tz'ib'al te. Ku'x ttz'ib'an Baruc tkyaqil yol xi tma'n Jeremías te, ax ik tza'n tz'ib'amajtoq twitz tnejel b'otz' u'j aju kub' tpatun rey Joacim. Nimku txqantl yol ok ttz'aqsa'n Jeremías, ex ax tnab'l ik tza'n tnejel.