Filipenses 3 - Mam Huehuetenango New Ortography

Tza'n tten tu'n qok tz'aqlxix

1Kyja'tzun erman che tzalajxe ti'j Qajaw. Mlay chin sikte tu'n t-xi ntz'ib'ane juntl maj axju yol xi ntz'ib'ane kyeye nej, ex jun onb'il jlu te kyeye.

2Ten kykwente kyi'je kye xjal ik kyten ik tza'n tx'yan; ten kykwente kyi'je kye b'inchal mya b'a'n; ten kykwente kyi'je kye qeju in b'aj kyqesin kyximlal.

3Porke aqeju axix tok ma tz'ok sircunsisyón kyi'j, aqo' porke in qo k'ulun te Dios tuj qanmi ex in qo tzalaj ti'j Jesucrist; mya ti'j qxilen q'uql qk'u'j ex mya ti'j qb'inchb'en.

4Ik tza'n weye, noqwit waje tu'n tqe' nk'u'je ti'j nxilene ex qa ti'j nb'inchb'ene, ja'lo tz'ok qe' nk'u'je ti'j. Qa at juntl xjal taj tu'n tqe' tk'u'j ti'j t-xilen ex qa ti'j tb'inchb'en, mlay pon ik tza'n weye.

5Porke tej witz'je in sircunsidarinjtze tuj twajxaqin q'ij; tiyjil Israel qine, ex tiyjil Benjamín qine; hebreo xjal qine ex hebreo xjal qe nmane. Fariseo qine, nim nganiye ti'j tley Moisés;

6ex tu'nju at nim nganiye ti'j tley Moisés, kyja'tzun e yajlanjtz qe okslal wu'ne; tkyaqilju in tma'n ley tu'n tjapun, o b'ant wu'ne, minti' npaltile twitz ley.

7Tkyaqil jlu at tajb'en weye nej, ya ja'lo minti'tl tajb'en weye, tu'n tlaj ma txi woksla'ne Crist.

8Ax tok ma kub' nximane tkyaqil jlu minti'tl tajb'en te weye, noq o'kx waje tu'n wojtzqinteye Jesucrist aju Wajawe, porke ma'xix toklen jlu. Tu'n tlaj Crist ma naj tkyaqil wu'ne, ex tuj nwitze ma tz'ok ik tza'n tz'is, tu'ntzun tknet Crist wu'ne ik tza'n jun kamb'ab'l,

9ex tu'n ntene tuk'il minti' ma chin oke tz'aqlxix wu'nx wib'e tu'nju o nb'inchaye aju in tma'n ley, noq o'kx tu'n wokslab'le ti'j Crist; ma chin oke te tz'aqlxix tu'n Dios tu'nju ma chin okslane ti'j.

10Wajb'ile tu'n wojtzqinteye Crist ex tu'n nk'monteye tipumal te weye, ik tza'n tipumal Crist tej tjatz anq'in kyxol kyimni, ex wajb'ile tu'n tik'x wu'ne ik tza'n te Crist ik'x tu'n, ex tu'n woke ik tza'n te Crist tej tkyim,

11tu'ntzun nkanune ti'j tu'n njatz anq'ine kyxol kyimni.

Ljo'nx qu'n tu'n qkanun ti'j jatum tok qwitz

12Ja'lo na'nx nkanune ti'j ex na'nx ttz'aqet-xix wu'ne, noq o'kx nno'k tilil wu'ne tu'n nkamb'anteye, porke ik tza'n weye ma chin kamb'anjtze tu'n Jesucrist.

13Erman, minti' in xi nma'ne qa ma nkamb'aye, pero atzun jlu in nb'incha'ne, ma tzik' tna'l wu'ne aju ma kyaj wi'jxiye, ex nno'k tilil wu'ne tu'n nkanune ti'j ju tkub' nwitze.

14Ljo'nx wu'ne tu'n nkanune ti'j jatum tok nwitze tu'n nk'monteye jun oyaj, ex max tuj kya'j ma tzaj txokb'il weye tu'n Dios, tu'nju atine tuk'il Jesucrist.

15Kyja'tzun tten, qkyaqil aqo' ma tz'aqet qnab'l, axwit jlu tu'n qximan ti'j; qatzun qa junxitl kyximb'etze, ax Dios ktzajel yek'unte kyeye.

16Aju ma tz'el qnik' ti'j, axtzunju tu'n qximan ti'j ex tu'n qb'inchante.

17Erman, kykano'mile wi'je, ex kyq'o'nke kwent kyi'j qeju in che anq'in ik tza'n ju yek'b'il xi qq'o'ne kyeye.

18Porke nimku xjal in che b'et aj q'oj qe ti'j tcrus Crist, nimku maj o txi nma'ne kyeye kyi'j jlu, ex ja'lo b'i'x in chin jaw oq'e tu'n t-xi nma'ntle kyeye.

19Che xe'l jlu tuj najen, porke axju tachb'il kyk'u'j ma tz'ok te kydios; ex in che tzalaj ti'j kych'ixwi; o'kx in che ximan ti'j aju at twitz tx'otx'.

20Pero aju qtanmi atzun ta' tuj kya'j; atzun ktzajel Klol qe aju Qajaw Jesucrist, aju in qo ayon ti'j.

21Aju qximlal minti' ch'in tb'anil, pero kch'expetel tu'n Jesucrist, k'okel ik tza'n t-ximlal Jesucrist tb'anilxix, tu'n tipumal kch'expetel tu'nju at tipumal tu'n tten tkyaqil tjaq' tkawb'il.