Éxodo 3 - Mam Huehuetenango New Ortography

Tej ttxokl Moisés tu'n Dios

1In kwentintoq Moisés kyi'j t-ẍne'l Jetro aju tji' ex pal te Madián, at jun q'ij xi ti'n qe ẍne'l tuj tzqij tx'otx' ex pon t-xe witz Horeb, aju witz te Dios.

2Kub'tzun tyek'un tib' t-anjel Qman twitz tuj jun wi' ch'i'x k'ul in julintoq tu'n q'aq'. O til in julintoq ch'i'x k'ul tu'n q'aq' ex minti' in kub' tz'e'ytoq.

3Tmatzun Moisés: Chin xel laq'e'ye ke'yilte te, ex ok wila'ye tiqu'n minti' in kub' tz'e'y aju ch'i'x k'ul lu.

4Tej tlonte Qman kyja'toq t-xi laq'e' Moisés ke'yilte te, tzaj q'ajt tuj ch'i'x k'ul ex tzaj tma'n te kyja':

—Moisés, Moisés.

—Lu qine lu, chi Moisés, xi ttzaq'we'n.

5Tzajtzun tma'n Dios te kyja':

—Mi'n tzaj laq'e'ya. Q'i'mela t-xajb'iya kyi'j tqana, porke xjan aju lugar jatum tkub'a.

6Ex tzaj tma'ntl: Aqine Tdios tmana, aju Tdios Abraham, Tdios Isaac ex Tdios Jacob, chi Qman.

Oktzun tmaqsi'n Moisés twitz tu'nju tzaj t-xob'il ti'j tu'n tlonte twitz Dios.

7Tzaj tma'ntl Qman:

—Ma wile yajb'il kye xjal etzan wu'ne, aqeju ate' tuj Egipto. Ma nb'iye tq'ajq'ajel kywi' in che ayayan kyu'n caporal, ex b'a'n wu'ne nik'pun in che k'ixb'isanjtz,

8ex tu'ntzun jlu ma chin ku'tze tu'n kyklet wu'ne tuj kyq'ab' aj Egipto, tu'n kyetz wi'ne tuj tx'otx' ma chixin ex tu'n kypon wi'ne tuj jun tx'otx' b'a'n ex ma' twitz. Aju tx'otx' lu, q'inunxix ex tb'anilxix. Atzun najl qe aj Canaán, qe aj Heteo, qe aj Amorreo, qe aj Ferezeo, qe aj Heveo ex qe aj Jebuseo.

9Ma nb'iye in che ayayan aj Israel ex ma wile in che k'ixb'isanjtz kyu'n aj Egipto.

10Tu'ntzun jlu, txi'ya ja'lo. Kxel nsama'na twitz Faraón tu'n kyetz ti'na tuj Egipto qe xjal etzan wu'ne, aqeju aj Israel, chi Dios.

11Xitzun tma'n Moisés te Dios:

—¿Ti woklene tu'n nxi'ye twitz Faraón ex tu'n kyetz wi'ne aj Israel tuj Egipto?

12Tzaj ttzaq'we'n Dios te:

—Txi'ya, ok chin tele tuk'ila. Atzun jlu k'ajb'el te jun techal teya qa wu'ne otoq txi nsama'na: Ok kyetz ti'na tuj Egipto qe xjal etzan wu'ne, kykyaqile che k'ulule weye t-xe witz lu, chi Dios.

13Xitzun tma'n Moisés te Dios:

—Ok npone kywitz aj Israel, ex ok t-xi nma'ne kye kyja': Ma chin tzaj sama'ne kyuk'ile tu'n Kydios qxe'chel, nchiloye, ex qa ma tzaj kyqanin weye: ¿Titzun tb'i? qa che chi, ¿titzun kxel nma'ne kye? Chi Moisés.

14Tzaj ttzaq'we'n Dios te Moisés:

—AQINE AJU AX QINE, chi Dios. Ax ikx tzaj tma'ntl: Kyja'tzun tten kxel tma'na kye aj Israel: Aju tok tb'i AQINE ma tzaj samante weye kyuk'ile, chikuya.

15Xi tma'ntl Dios te Moisés: Atzun jlu kxel tma'na kye aj Israel: Ate Qman aju Kydios qxe'chel, Tdios Abraham, Tdios Isaac ex Tdios Jacob, ma tzaj samante weye kyuk'ile. Atzun nb'iye jlu te jumajx, chi Dios, ex kukx ktzajel na'n kyuj kykyaqil tab'q'iyil, chikuya kye.

16Txi'ya, chmon b'aja qe tij xjal at kyoklen kyxol aj Israel ex q'manxa kye kyja': Ate Qman aju Kydios qxe'chel, Tdios Abraham, Tdios Isaac ex Tdios Jacob, kub' tyek'un tib' nwitze, ex tzaj tma'n weye kyja': Ax tok ma tz'ok nq'o'ne kwent kyi'je ex ma wile aju in b'inchanjtz kyi'je tuj Egipto, chi Dios.

17Ex tmatl: Aqine chin eletz q'inte kyeye tuj yajb'il kyi'je tuj Egipto, tu'n kyxi'ye tuj kytx'otx' aj Canaán, aj Heteo, aj Amorreo, aj Ferezeo, aj Heveo ex aj Jebuseo. Aju tx'otx' lu q'inunxix ex tb'anilxix, chikuya kye.

18Kxel b'i'n tyola kyu'n qe tij xjal kyxol aj Israel. Aya kyuk'ix qe tij xjal lu che xe'le twitz rey te Egipto, ex kxel kyma'ne te kyja': Ate Qmane aju Qdiose, aqo'ye aj Hebreo, kub' tyek'un tib' qwitze. Tu'ntzun jlu, q'ontza amb'il qeye tu'n qxi'ye tuj tzqij tx'otx' ox q'ij qb'eye, tu'n t-xi qq'o'ne chojb'il te Qmane aju Qdiose, che chikuye te.

19B'a'n wu'ne, mlay che etz tzoqpi'ne tu'n rey te Egipto qa minti' ma kub' tcastiw wu'ne.

20Atzun weye kxel nyek'une wipumale, che b'el nk'ixb'isa'ne qe aj Egipto kyu'n kykyaqil nb'inchb'ene nim kyipumal che b'antel wu'ne kyi'j, ex maxitzun che eletz tzoqpi'ne tu'n.

21Wu'ne knetel xtalb'il kyu'n aj Israel kywitz aj Egipto, tu'ntzun mi'n kyetz minti' q'i'n kyu'n.

22Kxel tqanin teyle junjun xu'j te tvesin aj Egipto, ex te xu'j aj Egipto ax najl tuj tja, qe ti'xti saq pwaq kytx'otx'il, q'an pwaq kytx'otx'il ex xb'alun tu'n tok kyq'o'n kyi'j kyal; kyja'tzun tten k'eletz kyi'n aju at kye aj Egipto, chi Dios.