Efesios 5 - Mam Huehuetenango New Ortography

Tza'n tten tu'n kyanq'in qe tk'wa'l Dios

1Kykano'mile ti'j Dios, porke tk'wa'l Dios qeye, k'ujla'nxix qeye tu'n.

2Kukx kyk'ujlam kyib'e ik tza'nte Crist ma qo tk'ujla ex xi tq'on tib' tu'n tkyim te qxel ik tza'n jun tal ẍne'l in kub' te chojb'il qil, atzun jun oyaj at tk'ok'jal ex in tzalaj Dios ti'j.

3Atzunju yaẍb'il ex tkyaqil ttz'ilil, ex tkyaqilju in pon kyk'u'j xjal ti'j, minti' tu'n kyyoline ti'j, porke mya b'a'n tu'n kyyolin okslal ti'j jlu.

4Ex mi'n che yoline ti'j tk'ayil yol, ex qa jun yol minti' tnab'l, ex qa jun yaqb'il mya b'a'n, porke mya b'a'n jlu; mas b'a'n tu'n t-xi kyq'o'ne chjonte te Dios.

5Porke b'a'n jlu kyu'ne, qe xjal in che yaẍin, ex qe xjal tz'il tuj kyanmi, ex qe xjal in pon kyk'u'j ti'j q'inumab'l, minti' kyoklen ti'j tkawb'il Crist, aju ax tkawb'il Dios, ex qa ma pon qk'u'j ti'j q'inumab'l, junx ta' jlu ik tza'n in qo k'ulun kywitz qe tilb'ilal.

6Kykwentim kyib'e tu'n mi'n kykub' sb'u'ne tu'n jun yol noqx gan, porke tu'n tlaj tkyaqil jlu in tzaj tq'oj Dios kyi'j qe xjal mib'an che b'in.

7Kyja'tzun mi'n tz'ok kymojb'an kyib'e kyuk'il.

8Porke ojtxi ate'ye tuj qlolj, atzun ja'lo ate'ye tuj spik'un tu'nju okslal qeye ti'j Qajaw; che anq'intzune tuj spik'un porke te spik'un qeye.

9Porke aju in tzaj tq'o'n spik'un qe, atzun tu'n qb'inchante b'a'n, ex tu'n qb'et tuj tumelxix, ex tu'n qyolin axix tok.

10Tz'elx kynik'e ti'j alkyeju b'a'n tuj twitz Qajaw.

11Ex mi'n tz'ok kyq'on kyib'e ti'j ju in b'inchanjtz tuj qlolj minti' jun b'a'n in tq'o'n, noq o'kx tu'n t-xi kymayo'ne.

12Porke ch'ixb'il tu'n qyolin ti'j ju in kyb'incha'n xjal tuj ewaj.

13Pero tkyaqil nne'l tuj q'ancha'l ok tkanun spik'un ti'j; ex tkyaqil nne'l tuj q'ancha'l tu'n spik'un.

14Kyja'tzun at jun yol in tma'n kyja':

Aya in tana, q'i'mel twatla ex we'ktza kyxol kyimni, ex kb'el ten t-spik'umal Crist tib'aja.

15Kyja'tzun che ximane ti'j tza'n tten tu'n kyb'ete; mi'n che b'ete minti' kynab'le, noq o'kx tu'n tten kynab'le.

16Tz'ajb'enxwit tkyaqil q'ij kyu'ne tu'n kyb'inchanteye b'a'n, porke mya b'a'n ju tq'ijlalil ja'lo.

17Kyja'tzun, mi'n che oke minti' kynab'le, noq o'kx tu'n tel kynik'e ti'j alkyeju tajb'il Qajaw.

18Mi'n che k'ane q'e'n; porke tu'ntzun jlu minti' ch'in kyjuk'b'il kyib' xjal; noq o'kx tu'n tnoj tuj kyanmiye tu'n Xewb'aj Xjan.

19Che yoline kyi'j salmo kyxolxe ex che b'itzane; kyb'itzanxe b'itz te Dios, che b'itzane ex kyq'onxe chjonte te Qajaw tu'n tkyaqil kyanmiye.

20Kukx kyq'onxe chjonte te Qman Dios ti'j tkyaqil, noq tu'n Qajaw Jesucrist.

Tza'n tten tu'n kyanq'in okslal tuj kyja

21Kynimanx kyib'e kyxolxe tu'nju at tchi Crist tuj kywitze.

22Aqeye xu'j, kynimanxe kychmile ik tza'n in xi kynimane Qajaw.

23Porke ate xinaq nejenel te xu'j, ik tza'n te Crist nejenel kye kykyaqil okslal; ex ax Crist Klol kye; atzun kye okslal t-ximlal Crist qe.

24Ik tza'n kye okslal in xi kyniman Crist, ikxtzun kye xu'j tu'n t-xi kyniman kychmil tuj tkyaqil.

25Aqeye chmilb'aj, kyk'ujlam kyxu'jile ik tza'n te Crist ma che tk'ujla kykyaqil okslal ex xi tq'on tib' tu'n tkyim tu'n kyklet,

26tu'ntzun kyel tpa'n tu'n kyajb'en okslal o'kx te Dios, kyb'ajlenxi tx'jet tu'n tyol Dios; ik tza'n tu'n a' otoq che b'aj tx'jet.

27Tu'ntzun kykub' ten qe okslal twitz Dios tb'anilxix che ke'yin, minti' ch'in tz'il kyi'j ex minti' ch'in yu'ch twitz kyxb'alun ex minti' juntl mya b'a'n kyi'j, noq o'kx tu'n kyajb'en o'kx te Dios ex minti' ch'in kypaltil.

28Ax ikx qe chmilb'aj kyk'ujlam kyxu'jil ik tza'n in kyk'ujla'n kyximlal. Aju xjal in tk'ujla'n t-xu'jil in tk'ujlan tib'.

29Porke mi jun xjal nne'l tik'un t-ximlal, noq o'kx in tk'a'chan ex kwentin tu'n, ik tza'n in tb'incha'n Crist kye kykyaqil okslal.

30Porke atzun ato'k ti'j t-ximlal Crist, ex ti'j tchib'jal ex ti'j tb'aqil.

31Kyja'tzun tten, kyjel tq'o'n xinaq tman ex ttxu', ex kmojeb'il tuk'il t-xu'jil ex che okel kykab'il te junx.

32Aju yol lu ma' t-xilen, mlay tz'el qnik' ti'j qu'nx qib'; aju yol in xi nma'ne in yolin ti'j Crist ex kyi'j kykyaqil okslal.

33Kyja'tzun tten teyle junjun kyeye, k'ujlam t-xu'jil ik tza'n in tk'ujlan tib', ax ikx te xu'j nimanx tchmil.