Proverbios 15 - Mam Huehuetenango New Ortography

1Aju tzaq'web'l te yol tuk'il k'ujlalil, b'i'x in we' q'oj tu'n, atzunju tzaq'web'l tuk'il ilb'il, mas in tzaj q'oj tu'n.

2Nim yol te q'ob'l nab'l in che yolin qe xjal at kynab'l ti'j, atzun qe xjal minti' kynab'l o'kx in che yolin ti'j yol minti' tajb'en.

3Tuj tkyaqil lugar at Qman Dios, ex in q'on kwent kyi'j qe xjal b'a'n ex kyi'j qe mya b'a'n.

4Aju yol at tchya'l in tzaj tq'o'n qchwinqlal, atzunju yol puro ploj in qo k'ixb'i tu'n.

5Aju xjal minti' tnab'l minti' in kub' tuj twitz ok tok mayo'n tu'n tman; atzunju xjal niman tman tu'n in tzaj tyek'un qa at tnab'l.

6Nim ti'xti at tuj tja ju xjal tz'aqlxix, atzunju xjal mya b'a'n minti' in xi tnik'b'en aju in tkamb'a'n.

7Qe xjal at kynab'l in kyq'o'n ojtzqib'l kye mastl, atzun qe xjal minti' kynab'l minti' in kyb'incha'n ikju.

8Aju oyaj in kyq'o'n qe xjal mya b'a'n, minti' in xi tk'mo'n Qman, atzunju kyna'j Dios qe xjal tz'aqlxix, in xi tk'mo'n Qman tuk'il tzalajb'il.

9Ik'un tu'n Qman aju kyb'inchb'en qe xjal mya b'a'n, atzunju xjal in b'et tuj tumel k'ujla'n tu'n Qman.

10Aju xjal in kyaj tkolin ju b'e b'a'n, b'a'n tu'n t-xi kawit kyuw; atzunju nne'l tik'un kawb'il te, kymel.

11Twitz Qman tkub'sa'n ju kamik tuk'ix ju kynajb'il kyimni, ax ikx tkub'sa'n twitz aju kyximb'etz xjal.

12Aju xjal jawni twitz minti' in tk'ujla'n aju nno'k mayonte te ti'j mya b'a'n, ex minti' nno'k tmojb'an tib' kyuk'il qeju at kynab'l.

13Aju xjal in tzalaj tanmi, ax ikx in tzalaj twitz, ex aju xjal b'is ta', b'i'x in tzaj ta'w tuj tanmi.

14Aju xjal at tnab'l in jyon ti'j ojtzqib'l, atzunju xjal minti' tnab'l o'kx tok tk'u'j ti'j ju minti' tajb'en.

15Kykyaqil q'ij mya b'a'n in che ela teju xjal in b'isun, atzunju xjal in tzalaj, kykyaqil q'ij in che ok puro b'a'n te te.

16Mas b'a'n tu'n qniman te Qman Dios maske meb'a xjal qo', twitzju tu'n qok q'inun ex tuj b'is in qo anq'in.

17Mas b'a'n qa at qk'ujlalil maske noq itzaj qchi', twitzju chib'j qchi' ex at ik'b'il qxol.

18Aju xjal jurat in jaw q'ojl, noq q'oj in jyo'n ti'j; atzunju xjal minti' in tzaj naj tq'oj, in kub' yupj q'oj tu'n.

19Tuj twitz ju xjal ky'aj mer ik tza'n ch'i'x tkub' tuj tb'e; atzunju xjal tz'aqlxix, aju tb'e puro qtz'umin tuj.

20Aju k'wa'lb'aj at tnab'l, jun tzalajb'il jlu te tman; atzunju k'wa'lb'aj minti' tnab'l, jun b'is jlu te ttxu'.

21Aju xjal minti' tnab'l in tzalaj tu'nju minti' tnab'l; atzunju xjal at tnab'l tuj tumel in b'et tuj tb'e.

22Minti' in japun aju in kub' kyximan xjal qa mi a'l jun q'ol kyconsej; ex qa at nim q'ol consej b'a'n nne'la jlu.

23At tzalajb'il teju xjal in tzaq'wet ju yol tu'n, ex mas at tzalajb'il te qa ma tzaq'wet tu'n ok tajb'en.

24Aju b'e tb'eyil chwinqlal kyja' in xi' jawni, ex in klet ju xjal at tnab'l tu'n tu'n mi'n tku'x tuj kynajb'il kyimni.

25In kub' t-xitun Qman tja ju xjal in jaw tniman tib', ex in tkyuwsa'n aju tetzb'il meb'a xu'j.

26Ik'un tu'n Qman aju kyximb'etz qe xjal b'inchal mya b'a'n, atzun qe yol minti' kypaltil in tzalaj kyi'j.

27Aju xjal in pon tk'u'j ti'j nimku, tu'nx in che naj qeju ate' tuj tja; atzunju xjal minti' in tk'mo'n pwaq tu'n mi'n tkub' kysentens xjal tu'n, ok k'anq'il.

28Aju xjal tz'aqlxix, nej in kub' ten ximal ti'j alkye yol tu'n t-xi' ttzaq'we'n, atzunju xjal b'inchal mya b'a'n, noq nne'tz chitj yol mya b'a'n tuj ttzi'.

29Nne'l tpa'n tib' Qman kyi'j xjal b'inchal mya b'a'n, atzun qe xjal tz'aqlxix in tzaj tb'i'n kyna'j Dios.

30Aju xjal in qo tzaj tke'yin tuk'il tzalajb'il in qo tzalaj tu'n; ex aju tqanil b'a'n in tq'o'n ak'aj qipumal.

31Aju xjal in xi tniman aju kawb'il tuj tumelxix ktel kyxol qe xjal at kynab'l.

32Aju xjal minti' in xi tniman kawb'il te, tu'nx tib' nne'l tik'un tib'; atzunju xjal in xi tniman kawb'il te, nno'k mastl tnab'l.

33Qa in qo xob' twitz Dios, tu'n jlu in tzaj q'o'n xnaq'tzb'il qe tu'n tten qnab'l; qa qajb'il tu'n qk'monte nimb'il qe, tnejel il ti'j tu'n tkub' qmansin qib'.