Isaías 2 - Mam Huehuetenango New Ortography

Kweb'el q'oj tu'n Qman kyuj qe nasyon

1Atzun yol lu tzaj tma'n Dios te Isaías aju tky'ajal Amoz, in yolin kyi'j aj Judá ex ti'j tnam Jerusalén.

2Tuj tq'ijlalil tzul, aju witz jatum tkub' tja Qman ma'xix toklen k'okel. Aju witz lu ma'xix twa'l kywitz qe txqantl witz. Kykyaqil nasyon che ul b'aj twi',

3ex nimku kyajlal tnam che ul ex ok kyma' kyja': Kytzaje ex qo jax twi' ju witz etzan tu'n Qman, tuj tja Tdios Jacob, tu'ntzun ttzaj t-xnaq'tza'n qe aju tajb'il tu'n tb'ant qu'n ex tu'ntzun qb'et tuj b'e ma tzaj tma'n qe. Porke tuj tnam Sión ktzajel q'o'n xnaq'tzb'il qe, ex tuj Jerusalén ktzajel tma'n Qman tyol.

4A k'okel te jwes kyib'aj nasyon ex kxel tb'incha'n kyi'j nimku tnam tu'n mi'n kyq'ojin. Kb'ajel kyb'incha'n kyspad tu'n kyok te punt ex kylans kb'ajel kyb'incha'n tu'n kyok te job'l tq'ab' uva. Mlayx tzaj kytzyu'n qe tnam juntl maj kyspad tu'n kyq'ojin kyi'j txqantl tnam, ex mlayx kyk'am juntl maj xnaq'tzb'il tu'n tb'ant kyq'ojin.

5Aqeye tiyjil Jacob, qoqe ja'lo tu'n qb'et tuj t-spik'umal Qman.

Aju kycastiw qe xjal in jaw kyniman kyib'

6Nman, ma che kyaj tkolina qe xjal etzan tu'na, aqeju tiyjil Jacob; ma noj tuj kytanmi kyu'n qe xjal b'a'n che q'ijin tzajni qe tuj tjawitz q'ij, ex kyu'n aj nab'l ik tza'n qeju ate' kyxol aj Filisteo, ex in b'ant ti'j kyyol kyuk'il xjal kyuj txqantl nasyon.

7Nojni tuj kytanmi tu'n q'an pwaq ex saq pwaq ex at nimxix q'inumab'l tuj; nojni tuj kytanmi kyu'n chej cabay ex at nimxix carwaj mlay b'ant kyajlanjtz.

8Ax ikx nojni tuj kytanmi kyu'n qe tilb'ilal nno'k kydiosin xjal ex in che k'ulun kywitz qe kydios kyu'nx in che b'ant.

9Ma che ok te ch'in kyoklen, jumajx ma tz'el kyoklen. Mi'n kub' tnajsa'na kyil.

10Kylamon okx kyib'e kyuj toy' pik, ex kyewanx kyib'e tjaq' tx'otx'; kyewanx kyib'e twitz Qman tu'nju xob'ajilxixte ex in qoptz'aj tajwalil wen.

11Aqe xjal in jaw kyniman kyib' kb'el kych'ixwi; ex aqeju nno'k kyq'on kyib' te ma' kyoklen che okel te ch'in kyoklen. O'kxte Qman kjawil nimsa'n tb'i tuj tq'ijlalil tzul.

12Tuj q'ij lu kjawil ti'n tib' Qman tu'n tq'ojin kyi'j kykyaqil xjal in jaw kyniman kyib', ex kyi'j kykyaqil qeju nno'k kyq'on kyib' te ma' kyoklen, ex b'i'x kb'el kych'ixwi, porke ate Qman aju Tajaw Tkyaqil kb'inchalte jlu.

13Ax ikx kjawil ttx'emin kykyaqil qe tze' wi'ten ma'xix kywa'l ate' twi witz Líbano, ex kykyaqil qe tze' k'ol ate' tuj tx'otx' Basán;

14ax ikx kb'el t-xitun qe nimaq witz ex qe tal witz ma'xix kywa'l,

15kyuk'ix qe ja ma' kywa'l ex qe muro kyuw kyten.

16Ax ikx kb'el t-xitun kykyaqil kybarc aj Tarsis kyuk'ix kykyaqil qe barc tb'anilxix che ke'yin.

17Aqe xjal in jaw kyniman kyib' ex nno'k kyq'on kyib' te ma' kyoklen, b'i'x kb'el kych'ixwi. O'kx te Qman kjawil nimsa'n tb'i tuj tq'ijlalil lu,

18ex b'i'x che najel kykyaqil qe tilb'ilal tu'n, aqeju nno'k kydiosin xjal.

19Ok ttzaj Qman tu'n tkub' kycastiw xjal tu'n, k'okex kylamon kyib' xjal kyuj toy' pik ex kb'elex kylamon kyib' kyuj qe tpa'xil tx'otx'; k'elel kyewan kyib' twitz Qman tu'nju xob'ajilxixte ex in qoptz'aj tajwalil wen.

20Tuj tq'ijlalil tzul k'elex kyxo'n xjal qe tilb'ilal q'an pwaq ex saq pwaq kytx'otx'il, aqeju kyu'nx kub' kyb'incha'n tu'n kyk'ulun kywitz; k'elex kyxo'n jatum ate' qe ich' ex qe sotz',

21ex k'okex kylamon kyib' kyuj qe toy' xaq ex kyuj qe toy' pik tu'n tel kyewan kyib' twitz Qman, tu'nju xob'ajilxixte, ex in qoptz'aj tajwalil wen ok ttzaj Qman tu'n tkub' kycastiw xjal tu'n.

22Mi'n tz'ok qe' kyk'u'je ti'j jun xjal, porke noq ch'in toklen ex minab'en jaku jatz b'aj t-xew.