Isaías 9 - Mam Huehuetenango New Ortography

Tzul itz'j jun k'wa'l ex k'okel te rey tu'n kyten xjal tuj txub'txaj

1Mya te jumajx kb'el ten qlolj tib'aj tnam at tuj b'is ja'lo. Tnejel kub' tq'o'n Dios tcastiw tnam Galilea, aju kytx'otx' tiyjil Zabulón ex qe tiyjil Neftalí, aju lugar tvesin tib' kyuk'il qe txqantl tnam mya aj Israel, tzajnix qe' jlajxi nima Jordán tu'n tpon b'aj ttzi mar; ex te yajxi ok tk'ma' ju lugar lu jun nimb'il te.

2Aju tnam in b'ettoq tuj qlolj o til jun matij spik'un; jun spik'un ma qoptz'aj te kye xjal najlqe tuj qxopinxix.

3Nman, tu'na ma che chmet nimxix xjal ex nim in che tzalaj. Kykyaqil in che tzalaj twitza ik tza'n in che tzalaj xjal ok tpon tq'ijlalil tu'n tjaw chmet twitz awal, ex ik tza'n in che tzalaj qe xinaq ok tkub' kysipan jun q'inumab'l kyxolx tkub'lenxi kyi'j aj q'oj kyu'n.

4Porke ma kub' ttoqina aju yuw alxix tkub' tib'aj kyqul xjal, ma kub' ttoqina tze' aju in ajb'en te jub'il ttzal kyi'j, ex tu'na ma naj kyipun xjal aqeju kyuwxix in che kawin kyib'aj, ik tza'n tuj tq'ijlalil tej kynaj aj Madián tu'na.

5Qe sapat in q'ajt t-xi' kyqan soldad kyuj ok kyxi' tuj q'oj, ex kyuk'ix qe xb'alun toksa'n tchk'el xjal ti'j, che okex patit tuj q'aq' tu'n kytz'e'y te jumajx.

6Porke ma itz'j jun tal ne' qxol, ma tzaj tq'o'n Dios jun k'wa'lb'aj qe ex ma tzaj q'o'n toklen tu'n tkawin, ex k'okel q'o'n qe tb'i kyja': Q'ol Nab'l ma'xix t-xilen, Dios ma'xix tipumal, Mamb'aj te jumajx, Nejenel tu'n kyten xjal tuj txub'txaj.

7Kb'el qe' tuj tq'uqb'il David tu'n tkawin te t-xel; ex kukx kch'iyil tkawb'il tuj tkyaqil twitz tx'otx'; te jumajx kweb'el q'oj tu'n, tu'n kyten xjal tuj txub'txaj, ex aju tkawb'il kyjel ten te jumajx. Aju t-xilen tkawb'il atzun, tu'n tb'inchante aju tz'aqlxix, ex tuj tumel kxel tb'incha'n kyi'j xjal te ja'lo ex te jumajx. Kb'antel jlu tu'n Qman aju Tajaw Tkyaqil, tu'nju at-xix tk'ujlalil.

Aju tq'oj Qman kyi'j aj Israel

8Ma tzaj t-sama'n Qman jun tqanil kye aj Israel, aqeju tiyjil Jacob;

9kykyaqil aj Efraín aqeju najl tuj Samaria k'elel kynik' ti'j. Tu'nju jawni qe ex in jaw kyniman kyib', in kyma'n kyja':

10Ma che kub' tilj qe loq', ex kjawil qb'incha'n qe ja tu'n ab'j. Ma kub' kytx'emin qe viga elni kyi'j qe tze' sicómoro mya tb'anilxix, ex che elel qch'expu'n ex che okel qq'o'n qe tze' wi'ten te kyxel, che chi.

11Ex che tzajel ti'n Qman qe aj q'oj ti'j Rezín ex kxel tma'n kye tu'n kyok tzoqpaj kyi'j aj Israel.

12Tuj tjawitz q'ij che tzajel aj Siria ex tuj telex q'ij che tzajel aj Filisteo. Jun tx'a'x che elel aj Israel kyu'n. Maske ikju, pero na'nx tchewix tq'oj Qman kyi'j; kukx tjaw ti'n tq'ab' tu'n tkub' kycastiw.

13Atzun qe xjal, minti' e ajtz meltz'aj tuk'il Dios aju kub' q'onte kycastiw, ex minti' e kub'san twitz Qman aju Tajaw Tkyaqil.

14Ik che okel aj Israel tu'n Qman ik tza'n nne'l ttx'emin xjal tje' jun alumaj tuk'ix twi' ex ik tza'n in jaw ttx'emin xjal tqan xa'j ex tqan ajlaj.

15Aju twi', atzun in yolin kyi'j qe kytijil xjal ex qe nejenel kyxol, atzunju tje' in yolin kyi'j qeju nno'k kyq'on kyib' te t-sanjel Dios, in kyq'o'n xnaq'tzb'il ti'j nik'aj yol.

16Kyu'n qe nejenel ma che el txalpuj qe xjal lu ti'j kyb'e ex qeju ẍaqlu'n kyu'n ma che el tzpet.

17Kyja'tzun minti' tzaj tz'e'y tk'u'j Qman kyi'j qe ku'xun, ex minti' tzaj q'aq'an tk'u'j kyi'j qe meb'a k'wa'l ex kyi'j qe meb'a xu'j. Ex kykyaqil tnam xjal minti' tchi Dios tuj kywitz, jumajx mya b'a'n qe ex kykyaqil in kyma'n yol mya b'a'n. Maske ikju, na'nx tchewix tq'oj Qman kyi'j, kukx tjaw ti'n tq'ab' tu'n tkub' kycastiw.

18Aju mya b'a'n in b'ant kyu'n xjal ik tten ik tza'n q'aq' in tz'e'y ch'i'x tze' tu'n, tuk'ix ch'i'x k'ul, ex in che b'aj tz'e'y tze' tu'n tuj chk'ul, ex tu'n tq'aq'al in jaw tololon nimxix sib'.

19Tu'n tq'oj Qman aju Tajaw Tkyaqil ma b'aj tz'e'y tx'otx', ma b'aj naj tnam tu'n q'aq' ex minti' in tz'e'y kyk'u'j xjal kyi'j kyerman.

20Jurat in b'aj kywa'n aju in knet kyu'n tuj b'anq'ab'aj, ex kukx ktzajel el kyk'u'j, in xi kywa'n aju at tuj kynayaj, ex minti' in noj kyk'u'j, in xi kychyo'n xjal kychib'jal qe kyk'wa'l.

21Kyu'n aj Manasés in che naj qe aj Efraín, ex kyu'n aj Efraín in che naj qe aj Manasés, ex kykab'il in che ok tzoqpaj kyi'j aj Judá. Maske ikju, na'nx tchewix tq'oj Qman kyi'j, kukx tjaw ti'n tq'ab' tu'n tkub' kycastiw.