Job 1 - Mam Huehuetenango New Ortography

O taq' Dios amb'il tu'n ttzaj yajb'il ti'j Job

1Tuj jun lugar Uz tb'i attoq jun xjal Job tb'i, in anq'intoq tuj tumelxix ex tz'aqlxix, ex b'a'n niman te Dios, ex tpa'n tib' ti'j mya b'a'n.

2Attoq wuq tky'ajal ex ox tme'jel,

3ex attoq wuq mil t-ẍne'l, ox mil tchej camey, jwe' syent moj tboys ex jwe' syent tbur. Ax ikx nimtoq tmajen ate'. Aju xjal lu, atzunju mas nim tq'inumab'l at kyxol qe xjal najl tuj lugar tuj tjawitz q'ij.

4Qe tky'ajal Job in kyb'incha'ntoq tu'n tok jun nintz wa'n tuj kyja teyle junjun; jun maj tuk'il jun, juntl maj tuk'il juntl, ex iklex in b'ant kyu'n. Ok nno'k wa'n kyu'n, in tzaj kytxko'n qeju ox kyanb' tu'n kywa'n kyuk'il.

5Oktzun tjapun b'aj junjun maj twi' nintz wa'n, in tzaj ttxko'n Job qe tky'ajal, ex ok tjaw we' te prim in kub' tpatun qe alumaj te chojb'il kyil qe tky'ajal teylex junjun. In b'inchet jlu tu'n Job porke in kub' t-ximan: Mya yajku ma che ximan qe nky'ajale mya b'a'n ti'j Dios ex ma che b'inchan il, chi Job.

6At jun q'ij tej kypon qe anjel twitz Dios, tuk'ix Satanás pon kyxol.

7Xi tqanin Qman te Satanás:

—¿Jatum saja?

Xi ttzaq'we'n Satanás:

—Ma b'aj nb'etine tkyaqil twitz tx'otx'; tzyet-x wu'ne tuj jun pak' ttxa'n tx'otx' ex ma pon b'aj tuj juntl pak'.

8Xitzun tma'n Qman te:

—¿Mape tila nmajene Job? Mi a'l juntl xjal twitz tx'otx' in pon ik tza'n te, in anq'in tuj tumelxix ex tz'aqlxix, b'a'n niman weye, ex tpa'n tib' ti'j mya b'a'n.

9Xi ttzaq'we'n Satanás:

—Baqa noq kukx in ajb'en teya.

10Baqa mya tu'nju minti' in taq'a amb'il tu'n ttzaj jun mya b'a'n ti'j, mi kyi'j qeju ate' tuj tja ex mi ti'j tkyaqilju at te; ky'iwla'n tu'na tkyaqilju in tb'incha'n, ex tu'n jlu ma che chmet-xix qe talun tuj tx'otx' lu.

11Q'i'n elchaqa tkyaqilju at te, ex jakutzun tila qa mi xyolin mya b'a'n ti'ja twitzkuya.

12Xitzun ttzaq'we'n Qman te Satanás:

—Ax b'a'n, b'inchama alkye taja tu'n tb'ant ti'j tkyaqil ti'xti at te, atzun ti'jku mi'n tb'inchaya jun mya b'a'n.

Etztzun Satanás twitz Qman.

13At jun q'ij qe tky'ajal Job ex qe tme'jel matoq in che ik'san jun nintz wa'n tuj tja kytzik,

14pon jun majen ma tja Job ex xi tq'o'n tqanil lu te:

—Matoq in qo ch'okine tx'otx' tuj kojb'il kyuk'il qe wakẍ, ex atzun qe bur in che wa'ntoq niqayin,

15tej minab'en ẍe pon qe xjal aj Sabeo ex ma che'x kyelq'a'n qe wakẍ ex qe bur, ex ma che kub' kyb'yo'n qe txqantl wuk'ile tu'n spad. O'kxku aqine ẍin tzoqpaj tu'n wule q'olte tqanil tuk'ila, chi majen.

16Na'nxtoq tb'aj yolin majen lu tej tpon juntl majen ex tma:

—Xkub' jun q'ankyoq ex b'i'x ẍe kyim qe pastor tu'n, kyuk'ix qe ẍne'l. O'kxku aqine ma chin klet tu'n wule q'olte tqanil tuk'ila.

17Na'nxtoq tb'aj yolin majen lu tej tpon juntl majen ex tma:

—At ox k'loj aj Caldeo ẍe ok tzoqpaj q'ojlel qi'je ex ma che'x kyelq'a'n qe chej camey, atzun qe txqantl wuk'ile ma che kub' b'yo'n tu'n spad. O'kxku aqine ma chin tzoqpaj tu'n wule q'olte tqanil tuk'ila.

18Na'nxtoq tb'aj yolin majen lu tej tpon juntl ex tma:

—Qe tky'ajala ex qe tme'jela matoq in che ik'san jun nintz wa'n ma tja ju nej tky'ajala,

19tej minab'en saj jun nintz kyq'iq' tuj tzqij tx'otx', ex ma kub' tilj ja kyib'aj qe tk'wa'la, porke tuj tkyajil pak' ti'j ja saj kyq'iq'. Kykyaqil ma che kyim; o'kxku aqine ma chin klet tu'n wule q'olte tqanil tuk'ila.

20Jawtzun we' Job, ex tu'nju tzaj nim tb'is el t-sb'it'un t-xb'alun ex el tmatzo'n ttzmal twi'; kub' ẍmeje' ex pon takl tib'aj twitz max twitz tx'otx' tu'n tk'ulun te Dios.

21Ex tma:

—Mi jun ti'xti q'i'n wu'ne tej wul itz'je, ex mi jun ti'xti q'i'n wu'ne ok wik'e twitz tx'otx'. Ate Qman saj q'onte tkyaqil weye, ex ax te Qman ma tz'el q'inte tkyaqil. Nimanxwit tb'i Qman.

22Maske tzaj tkyaqil jlu ti'j Job, pero minti' jun il o tb'incha ex minti' o yolin mya b'a'n ti'j Dios.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help