2 Crónicas 11 - Mam Huehuetenango New Ortography

1Tejtzun tpon Roboam tuj Jerusalén e b'aj tchmo'n jun syent tuk'il 80 mil soldad, e jaw t-sk'o'n kyxol tiyjil Judá ex kyxol tiyjil Benjamín, tu'ntzun kyq'ojin kyi'j aj Israel ex tu'n tkawin juntl maj kyib'aj.

2Pero tzaj yolin Qman tuk'il Semaías aju t-sanjel, ex tzaj tma'n te kyja':

3Q'manxa te Roboam aju tky'ajal Salomón ex rey tuj Judá, ex q'manxa kye kykyaqil tiyjil Judá ex kye tiyjil Benjamín:

4Chitzun Qman kyja': Mi'n che'xe q'ojlel kyi'j qe kyermaniye. B'a'n tu'n kyaj meltz'aje kykyaqile kyjaye, porke wu'ne ma che el npa'ne qe aj Israel kyi'je.

Tejtzun kyb'inte aju tzaj tma'n Qman e ajtzun meltz'aj kykyaqil kyja, ex ya minti' e je'x q'ojlel ti'j Jeroboam.

B'a'n ela tkawb'il Roboam

5Axtzun kyaj ten Roboam najal tuj Jerusalén, ex ok tq'o'n muro kyi'j junjun tnam tuj Judá,

6ex atzun qe jlu: Belén, Etam, Tecoa,

7Bet-sur, Soco, Adulam,

8Gat, Maresa, Zif,

9Adoraim, Laquis, Azeca,

10Zora, Ajalón ex Hebrón. Atzun qe tnam lu te Judá ex te Benjamín ok tq'o'n muro kyi'jele.

11B'aj tkyuwsa'n qe muro kyi'j qe tnam, e kub' tq'o'n qe nejenel kye soldad kyuj, ex okx tk'u'n twitz awal kyuj, tuk'ix ta'l twitz uva ex aseyt.

12Ex xi t-sama'n qe maqb'il ex qe lans kyuj kykyaqil qe tnam lu ex e b'aj tkyuwsa'nxix wen, ex kyja'tzun tten e kyaj ten aj Judá ex aj Benjamín tjaq' tkawb'il.

13Kykyaqil qe pal ex qe aj Leví najlqe tuj tkyaqil tx'otx' kye aj Israel e tzaj tu'n taj kyq'on kyib' tuk'il Roboam.

14Kyaj kykolin aj Leví kytx'otx' ex tkyaqil kyetzb'il, tu'n kyul tuj Jerusalén ex kyuj txqantl lugar tuj tx'otx' Judá, tu'nju otoq tz'el q'i'n kyoklen te pal tu'n Jeroboam, ex kyu'n qe tk'wa'l, tu'n mi'n kukx kyajb'en te Qman.

15Tu'nx te Jeroboam ok tq'o'n kyoklen junjun xjal te pal tu'n kyajb'en kyuj qe ja te kyk'ulb'il xjal kywi' qe witz, ex tu'n kyajb'en kyuj qe k'ulb'il kye qe ju'ẍ, ex kye tilb'ilal wakẍ, aqeju tu'nx Jeroboam otoq che kub' tb'incha'n.

16Ax ikx qeju axix tok kyajb'il tu'n kyok lpe' ti'j Qman aju Kydios aj Israel, e ok lpe' kyi'j qe pal ex kyi'j qe aj Leví, e ul tuj Jerusalén tu'n t-xi kyq'o'n chojb'il te Qman aju Kydios qtzan kyxe'chel.

17Kyja'tzun tten kyuwset ju kawb'il tuj Judá, ex tuj ox ab'q'i ok tipun tkawb'il Roboam kyu'n, aju tky'ajal Salomón, porke o'kx tuj ox ab'q'i e niman te Qman, ik tza'n o tb'incha David ex Salomón.

18O moje' Roboam tuk'il jun xu'j Mahalat tb'i, aju tme'jel Jerimot ex tal Abihail; ate Jerimot tky'ajal David, atzunte Abihail tme'jel Eliab ex tal tchman Isaí.

19Aqeju tk'wa'l Roboam e tzaj ti'j Mahalat atzun qe jlu: Jehús, Semarías ex Zaham.

20Te tib'ajxi o moje' Roboam tuk'il juntl xu'j Maaca tb'i, aju tme'jel Absalón, ex qe tk'wa'l e tzaj ti'j Maaca atzun qe jlu: Abías, Atai, Ziza, ex Selomit.

21Attoq wajxaqlaj t-xu'jil Roboam ex 60 tkab' t-xu'jil, pero mas at nim tgan ti'j Maaca kywitz txqantl t-xu'jil. Tzaj 28 tky'ajal ex 60 tme'jel.

22At jun tal Maaca, Abías tb'i, ex ate jlu ok tq'o'n Roboam toklen te nejenel kye terman, ex tajb'iltoq Roboam tu'n tok tq'o'n te rey.

23Ten nim tnab'l Roboam, ex e je'x b'aj t-sama'n qe txqantl tky'ajal tuj tkyaqil tx'otx' Judá ex Benjamín, ex kyuj kykyaqil tnam tok muro kyi'j, ex xi tq'o'n tkyaqilju at tajb'en kye, ex tzaj tjyo'n nim kyxu'jil.