Gálatas 4 - Mam Huehuetenango New Ortography

1Kyja'tzun in xi nma'ne: Matoq tal k'wa'lx ju etzal, junx ta' ik tza'n jun majen, maske a tajaw tkyaqil.

2Porke tok tuj tkwent kwentil te ex tuj tkwent mayordom, akutzun in japun tq'ijlalil ik tza'n q'ma'maj tu'n mamb'aj.

3Ikx qe, ik qten nej ik tza'n qe k'wa'l, ato' tjaq' tkawb'il kyxnaq'tzb'il xjal, aju xnaq'tzb'il mya tz'aql.

4Pero tej tjapun tq'ijlalil, tzaj t-sama'n Dios Tk'wa'l, ul itz'j ti'j xu'j, ex ul itz'j tjaq' tipumal tley Moisés,

5tu'ntzun qkolpet tu'n, aqo' ato' tjaq' ley, tu'n qk'monte qoklen tu'n qok te tk'wa'l Dios.

6Ex tu'nju tk'wa'l Dios qeye, kyja'tzun ma tzaj t-sama'n Dios T-xew Tk'wa'l tuj kyanmiye; ex aju Xewb'aj at tuj kyanmiye in tma'n te Qman Dios kyja': Tat.

7Kyja'tzun, mya majentl qeye, tk'wa'l Dios qeye: ex tu'nju tk'wa'l Dios qeye, ax ikx at kyoklene ti'j ju etzb'il tzul tq'o'n Dios kyeye noq tu'n Crist.

In b'isun Pablo kyi'j okslal

8Tuj tq'ijlalil ojtxi minti' el kynik'e ti'j Dios, ex in che ajb'ene kye qeju dios mya ax tok Dios qe.

9Atzun ja'lo ma tz'el kynik'e ti'j Dios, ex qa a Dios ma tz'el tnik' kyi'je, ¿tza'ntzun tten tu'n t-xi kyb'i'ne juntl maj aju xnaq'tzb'il minti' tipun ex minti' tajb'en, ex kyaje tu'n kyoke te majen tu'n kyajb'ene juntl maj te?

10Kukx niman junjun q'ij kyu'ne, tuk'ix junjun xjaw, tuk'ix junjun tq'ijlalil, ex junjun ab'q'i.

11Ma tzaj nb'ise kyi'je, mya yajku noqx gan ma chin aq'nane kyxole.

12Erman, chin kub'sale kywitze tu'n kyoke ik tza'n qine, porke weye o chin oke ik tza'n kyeye. Minti' jun mya b'a'n ma kyb'inchaye wi'je.

13Porke b'a'n kyu'ne, xi npakb'a'ne tqanil kolb'il kyeye nej tu'n tlaj jun yab'il tzaj wi'je.

14Maske tzaj jun kyb'ise tu'n nlaje, tu'n tlaj yab'il ti'j nximlale, pero minti' in el kyik'une ex minti' in etz kylajo'ne, noq o'kx in k'monjtze kyu'ne mer ik tza'n jun t-anjel Dios qine ex mer ik tza'n Jesucrist qine tuj kywitze.

15¿Jatumtzun ta' kytzalajb'ile aju at wi'je nej? Ax qine testiw kyi'je, noqwit at tumel tu'n tb'ant kyu'ne, owtlo jatz kyi'ne tb'aq' kywitze tu'n ttzaj kyq'o'ne te weye.

16Atzun ja'lo ¿tu'npeju ma txi nma'ne ju yol ax tok kyeye, ma chin oke te aj q'oj kyi'je?

17At junjun xjal nim kygan kyi'je ex mejor che xmoxin, pero mya b'a'n kyximb'etz, atzun kyajb'il tu'n tel kypa'n kyib'e qi'je, tu'ntzun kyok lpe'ye kyi'j.

18Ex b'a'n kukx tu'n tten kygan xjal kyi'je, pero qa ax tok b'a'n kyximb'etz, ex qa kukx tu'n tten kygan kyi'je tkyaqil maj, mya noq o'kx ik tza'n atine kyxole.

19Aqeye tal nk'wa'le, ma tzaj juntl maj k'ixk'oj wi'je tu'n kylaje, ik tza'n jun xu'j ok in ul itz'j tal, nno'k tilil wu'ne tu'n kyoke ik tza'n te Crist.

20Wajb'ile tu'n ntene kyxole ja'lo ex tu'n nyoline tuj junxitl tumel; porke minti' nne'l nnik'e ti'j alkye kb'antel wu'ne kyi'je.

Aju techal ti'j Sara ex ti'j Agar

21Kymantze weye, aqeye kyajb'ile tu'n kytene tjaq' tley Moisés: ¿b'ajxpe kyb'iye ti in tma'n ley?

22Porke in tma'n tuj Tu'jil, ate Abraham tzaj kab'e tk'wa'l; jun tzaj ti'j Agar aju xu'j majen, atzun juntl tzaj ti'j Sara aju mer t-xu'jil ex mya majen.

23Pero aju k'wa'l tal ju xu'j majen itz'j ik tza'n in che itz'j mastl k'wa'l, atzunju k'wa'l tal ju xu'j mya majen, itz'j noq tu'n tjapun aju yol tzaj ttziyan Dios te Abraham.

24At jun nab'l ti'j jlu. Porke aqeju kab'e xu'j lu, atzun in yolin ti'j kab'e yol kyaj b'ant ti'j ojtxi. Tnejel yol, atzun tzaj q'o'n twi witz Sinaí, in che ok xjal te majen tu'n kyitz'jlenx, atzun in yolin jlu ti'j xu'j Agar.

25Porke ate xu'j Agar, atzun in yolin ti'j ju witz Sinaí tuj tx'otx' Arabia; aju witz Sinaí junx ta' tuk'il ju tnam Jerusalén at ja'lo, porke aju tnam Jerusalén ma tz'ok te majen kyuk'ix kykyaqil xjal najl qe tuj.

26Atzunju tnam Jerusalén aju at tuj kya'j, atzun qtxu' qkyaqil, ex mya majen.

27Porke in tma'n tuj Tu'jil:

Tzalajxa aya xu'j mib'an alina ex minti' jun tala ma tzul itz'j. Sch'ina tu'n tzalajb'il, aya xu'j minti' ma tila k'ixk'oj tu'n talina. Porke aju xu'j o kyaj kolin tu'n tchmil mas ela' tal at twitz ju xu'j at tchmil, chi tuj Tu'jil.

28Kyja'tzun erman, ikx qe ma qo ok tk'wa'l Dios tu'nju yol tzaj ttziyan Dios, ik tza'n te Isaac.

29Ex ikx in b'aj ja'lo ik tza'n o b'aj ojtxi; aju k'wa'lb'aj o itz'j tu'n tipumal Xewb'aj Xjan o yajlanjtz tu'nju k'wa'lb'aj o itz'j tu'n tajb'il xjal.

30Pero ¿titzun in tma'n tuj Tu'jil? Ljo'mexa aju xu'j majen tuk'ix ju tal, porke aju k'wa'l tal ju xu'j majen minti' toklen ti'j tetzb'il tman, noq o'kx aju k'wa'l tal ju xu'j mya majen at toklen ti'j etzb'il, chi tuj Tu'jil.

31Kyja'tzun erman, mya tal ju xu'j majen qo', noq o'kx tal ju xu'j mya majen.