1In xi qq'one chjonte teya Dios, in xi qq'one chjonte teya; in tzaj qna'ne tb'iya ex in xi qtx'olb'a'ne qe tb'inchb'ena ma'xix kyxilen.
2In tma'n Qman kyja': Ok tpon tq'ijlalil b'animaj wu'ne, kb'el nq'o'ne kysentens xjal tuj tumelxix.
3Maske tzaj lu'lun tx'otx' kyuk'ix kykyaqil qeju najl twitz, pero wu'ne kyuwsa'maj qe tq'uqb'il tu'n mi'n kyyukch.
4In xi nma'ne jlu kye qe xjal in jaw kyniman kyib' ex qe xjal mya b'a'n: Mi'n tz'ok kyq'on kyib'e te ma' kyoklene ex mi'n jaw kyniman kyib'e;
5mi'n b'aj kyyoline qa at kyipumale, ex mi'n che oke jawni che yoline.
6Porke aju tu'n tjaw nimsa'n jun xjal, myatzun a in tzaj tuj tjawitz q'ij ex mi tuj telex q'ij, mi tuj lugar minti' kynajb'il xjal,
7o'kx ate Dios jwes; at junjun nno'k tq'o'n te ch'in toklen ex atzun junjuntl nno'k tq'o'n te ma' toklen.
8Tzyu'n vas tu'n tq'ab' Qman, ex aju vas lu atzun in yolin ti'j tq'oj, tku'x vin tuj, aju vin smo'maj twitz. Oktzun t-xi tqo'n aju vin lu, kykyaqil xjal mya b'a'n kyb'inchb'en ate' twitz tx'otx' kxel kyk'a'n tkyaqil.
9Atzun weye kukx kxel nq'o'ne tqanil ti'j Tdios Jacob ex kxel nb'itzane qe b'itz te nimb'il te,
10porke tu'n, knajel kynimb'il kyib' qe xjal mya b'a'n, atzun te xjal tz'aqlxix kxel tq'o'n mastl tipumal.
Who We AreWhat We EelieveWhat We Do
2025 by iamachristian.org,Inc All rights reserved.
