Deuteronomio 6 - Mam Huehuetenango New Ortography

Aju mandamyent ma'xix toklen

1Atzun qe mandamyent lu, kyuk'ix qe ley ex qe kawb'il o che tzaj tma'n Qman Dios tu'n kyxi nxnaq'tza'ne kyeye, ex tu'n kyjapun kyu'ne ok kypone tuj tx'otx' k'okel te kyetzb'ile,

2tu'ntzun tten tchiylal Qman Dios tuj kywitze, ex tu'n kyjapun qe tley ex qe tmandamyent kyu'ne, aqeju ma che'x nma'ne kyeye, kyuk'ix qe kyk'wa'le ex qe tal kychmane tuj tkyaqil q'ij te kyanq'ib'le, tu'ntzun kytene nim q'ij twitz tx'otx'.

3Kyja'tzun aqeye aj Israel, kyb'inxe ex tz'ok tililx tu'n kyjapun qe jlu kyu'ne, tu'ntzun tel b'a'n kyeye tuj tkyaqil, ex tu'n kychmet-xixe tuj q'inun tx'otx' ex tb'anilxix, ik tza'nx tzaj ttziyan Qman aju Kydios kyxe'chele.

4Kyb'intze aqeye aj Israel: Ate Qman Dios o'kxku junx.

5Kyk'ujlame Qman Dios tu'n tkyaqil kyanmiye, tu'n tkyaqil kyk'u'je ex tu'n tkyaqil kyipune.

6Kyawankxe tuj kyanmiye kykyaqil qe yol ma che'x nma'ne kyeye ja'lo,

7kukx kymanxe kye kyk'wa'le, ex che yoline kyi'j tuj kyjaye ex tuj kyb'eye, ax ikx ok kyxi'ye tal ex ok kyjaw we'ye;

8kyk'alonke ti'j kyq'ab'e ex tib'aj kywitze te jun techal,

9ax ikx kytz'ib'ancuye kyi'j tlamel kyjaye ex kyi'j tmarkil.

Xi tkyuwsa'n Moisés kye aj Israel tu'n t-xi kyniman tley Dios

10Ok kyokx q'o'ne tu'n Qman tuj tx'otx' tzaj ttziyan kye qxe'chel Abraham, Isaac ex Jacob, jatum ate' nintz tnam tb'anilxix mya kyu'ne jaw kyb'incha'ne;

11ate' ja tuj, nojni kyuj kyu'n ti'xti tb'anilxix mya kyu'ne e noj; ate' xoch tuj, mya kyu'ne ku'x kylaku'ne; ex ate' tqan uva tuk'ix tqan olivo tuj, mya kyu'ne ku'x kyawa'ne; ex ok kywa'ne ti'j ex ok kynoje,

12ten kykwent kyi'je tu'n mi'n tik' tna'l Qman kyu'ne, aju etz q'inte kyeye tuj tx'otx' Egipto jatum ate'toqe te majen.

13Tenx tchiylal Qman Dios tuj kywitze, ex o'kx te che ajb'ene, ex o'kx tb'i ktzajel kyna'ne ti'j kyyole.

14Mi'n che k'ulune kywitz kydios txqantl tnam ate' niqayin kytxlaje,

15porke aju Qman Dios at qxol, minti' in kub' tuj twitz tu'n kyk'ulune twitz juntl dios; jaku tzaj tq'oj kyi'je, ex b'i'x che najele tu'n.

16Mi'n tz'ok kyq'o'ne Qman Dios tuj malb'il ik tza'n o kyb'inchaye tuj Masah.

17Tz'ok tililx kyu'ne tu'n kyjapun qe tmandamyent Qman Dios, kyuk'ix qe ley ex qe xnaq'tzb'il o che tzaj tq'o'n kyeye.

18Kyb'inchame aju tz'aqlxix ex aju b'a'n twitz Qman, tu'ntzun tel b'a'n kyeye tuj tkyaqil, tu'n kyoke tajwil tb'anil tx'otx' tzaj ttziyan Qman kye qxe'chel,

19ex tu'n kyex tlajo'n Qman qe aj q'oj kyi'je, ik tza'n o tzaj ttziyan.

20Noq alkye jun q'ij qa ma tzaj kyqanin kyk'wa'le: ¿Ti kyxilen qe mandamyent, qe ley ex qe kawb'il e tzaj tma'n Qman Dios tu'n qb'inchante?, qa che chi,

21atzun kyeye kxel kytzaq'we'ne: Ojtxi, tmajentoq Faraón qo'ye tuj Egipto, ex o qo etz q'i'ne tu'n Qman tuk'il nimxix tipumal.

22O qile qe señ ex qe b'inchb'en nim kyipumal ex xob'ajilxix o tb'incha Qman tuj Egipto, ti'j Faraón ex kyi'j kykyaqil qeju ate' tuj tja;

23ex ate etz q'inte qeye tuj tx'otx' Egipto, ex o qo ul q'i'ne tu'n tuj tx'otx' lu, aju tzaj ttziyan kye qxe'chel ex tzaj tq'o'n qe.

24O tzaj tma'n Qman tu'n kyjapun kykyaqil qe mandamyent lu qu'n ex tu'n tten tchiylal tuj qwitz, tu'ntzun tel b'a'n te qe kykyaqil q'ij ex tu'n kukx qanq'in, ik tza'n qten ja'lo.

25Kyja'tzun qo tel tz'aqlxix twitz Qman Dios qa ma che japun kykyaqil qe tmandamyent qu'n, ik tza'nx o tzaj tma'n qe.