1B'a'nte Dios kyuk'il aj Israel, kyuk'il qeju saq tuj kyanmi.
2Ch'ixmi ẍin jaw tolje, ex ch'ixmi ẍex jilj qe nqane,
3porke ma tzaj tlo'ch nk'u'je tej ẍe ok nke'yine puro tuj txub'txaj ate' qeju in jaw kyniman kyib' ex qeju mya nimal Dios.
4Minti' in che k'ixb'isanjtz, b'a'n ta' kyximlal;
5minti' in tzaj yajb'il kyi'j, ex minti' in tzaj jun k'ixk'oj kyi'j, ik tza'n kye txqantl xjal.
6Aju kynimb'il kyib' tok kyu'n ik tza'n jun kyu', ex aju k'ixb'isab'l kyu'n kyi'j xjal tok kyu'n ik tza'n kyxb'alun;
7nim mya b'a'n in tzaj jlet tuj kyanmi ex nim kyximb'etz mya b'a'n.
8In che xmayin ex in che yolin mya b'a'n, in jaw kyniman kyib' ex in b'aj kyyolin ti'j tu'n kyk'ixb'iset xjal kyu'n;
9in che yolin mya b'a'n ti'j Dios at tuj kya'j, ex kyaj tu'n kymandarin kyi'j kykyaqil xjal twitz tx'otx'.
10Kyja'tzun in che ok lpe' xjal kyi'j ex jurat in xi kyniman xjal aju yol in tzaj kyma'n.
11In kyma'n: ¿Baqa jaku tb'i Dios? ¿Baqa jaku tz'el tnik' Dios ti'j, aju Dios at tuj kya'j?
12Kyja'tzun kyten qeju b'inchal mya b'a'n. Minti' in kyk'ulb'a'n jun mya b'a'n ex kukx in chmet kyq'inumab'l.
13Noqx gan nno'k tilil wu'ne tu'n tten wanmiye saq ex minti' in tzaj ntzyu'ne jun ti'xti mya b'a'n.
14Tuj enter q'ij in chin k'ixb'isanjtze tu'na, ex tkyaqil prim in kub' tq'o'na ncastiwoye.
15Noqwit ma kub' nximane ik tza'n kye xjal lu, mawtlo che kub' nsb'u'ne qe tk'wa'la.
16Ok tilil wu'ne tu'n tel nnik'e ti'j jlu, ex kyuw ela te weye.
17Max el nnik'e ti'j alkye kb'ajel kyi'j tejxi wokxe tuj tja Dios.
18Ma che kub' tq'o'na tuj jun b'e puro jilin ex in che'x tlamo'na tu'n kynaj.
19Jurat naj in che naj tu'na, ex tu'nx kyxob'il in che kyim ex in che naj.
20Ik kyten xjal lu ik tza'n jun witzik' ok tel qwatl, kyja'tzun Nman, ok tjaw we'ya, che elel tik'una ex mer ik tza'n noq jun tilb'ilal qe.
21Tzaj nim tlo'ch nk'u'je ex tzaj jun ta'w tuj wanmiye
22tu'nju minti' nnab'le ex minti' el nnik'e ti'j; mer ik qine twitza ik tza'n jun txkup.
23Maske ikju, pero kukx ma chin tene tuk'ila ex tzyu'n qine tu'n tb'anq'ab'a.
24Ẍaqlu'n qine tu'na ex tzaj tq'o'na nnab'le, te b'ajsb'il ok chin k'metela tu'na tuj tajwalila.
25¿Alkye ẍaqlul weye at tuj kya'j? O'kx aya. Ex ok ntene tuk'ila minti'tl waje ti'j ju at twitz tx'otx'.
26In b'aj tipun nximlale ex wanmiye, ex a Dios q'olte tipumal wanmiye ex ate wetzb'ile te jumajx.
27Qeju nne'l kypa'n kyib' ti'ja che kymel; ex qeju in kyaj kykolin kyokslab'l ti'ja, che najel tu'na.
28Atzun weye chin xel laq'e'ye ttxlaj Dios, ex atzun mas b'a'n te weye. Nman Dios, aya kolol weye ex kxel nchik'b'a'ne tkyaqil tb'inchb'ena.
Who We AreWhat We EelieveWhat We Do
2025 by iamachristian.org,Inc All rights reserved.
