1Ate Joab aju tal Sarvia el tnik' ti'j rey, qa otoq tzaj nim tgan tu'n tke'yin twitz Absalón,
2kyja'tzun xi t-sama'n Joab jun xjal tu'n t-xi q'ib'aj jun xu'j at tnab'l, najl tuj tnam Tecoa, ex xi tma'n te:
—Q'o'n ok tib'a ik tza'n tuj b'is ta'ya, ex q'o'n ok t-xb'aluna aju nno'k kyq'o'n xjal tu'n kyb'is ti'j jun kyimni, ex mi'n tz'ok tq'o'na perjum ti'ja, porke k'okel tq'on tib'a te jun xu'j mer ik tza'n ela'xi tyemp ta'ya tuj b'is ti'j jun kyimni.
3K'okextzuna twitz rey ex kxel tma'na te aju yol kxel nma'ne teya.
Xitzun tma'n Joab aju yol tu'n t-xi tma'n xu'j te rey.
4Atzunte xu'j aj Tecoa xi' twitz rey, kub' ẍmeje' tejxi tpon takl tib'aj twitz max twitz tx'otx' te jun techal te nimb'il, ex xi tma'n:
—Aya Tat Rey, chin tonintza.
5—¿Ti in b'aj ti'ja? Chi rey xi tqanin te.
Atzunte xu'j xi ttzaq'we'n:
—Meb'a xu'j qine, o kyim nchmile,
6ex aqine ajb'el teya at kab'e wale q'a qe. E ok ten q'ojlel tuj kojb'il, ex tu'nju mi a'l jun el pa'nte kye, o k'ixb'i jun tu'n juntl ex b'i'x kyim.
7Atzun ja'lo kykyaqil xjal at nxilene kyuk'il in che q'ojin wi'je, ex kyajb'il tu'n t-xi nq'o'ne tuj kyq'ab' aju kub' b'yonte terman, tu'ntzun t-xelin ti'j tu'nju tkub'len tb'yo'n terman, ex b'i'x tu'n tnaj aju etzal. Kyja'tzun kb'el kyb'yo'n o'kxku jun wale ik tza'n tu'n tku'x kyyupun jun xq'a'l, ex ok kyjel kyq'o'n qtzan nchmile misikyer jun tiyjil tu'n tten tb'i twitz tx'otx'.
8Xitzun ttzaq'we'n rey te xu'j:
—Txi'ya tjaya, jaku wile tu'n tb'ant ti'ja.
9Xi ttzaq'we'n xu'j:
—Aya Tat Rey, aju mya b'a'n awt kub' tz'aq wib'aje ex kyib'aj qeju ate' tuj tja nmane, ex mya tib'aja ex ju tkawb'ila.
10Ex xi ttzaq'we'n rey:
—Qa at jun ma yolin mya b'a'n ti'ja, q'intza wuk'ile tu'n mi'n tlab'tl ti'ja.
11Ex xi tma'ntl xu'j:
—In chin kub'sane twitza Tat Rey, tu'n ttzaj tma'na jun yol axix tok twitz Qman Dios, qa mi'n taq'a amb'il teju xjal at nxilene tuk'il tu'n t-xelin tu'n aju tkyimlen qtzan wale, tu'ntzun mi'n tkub' tb'yo'n juntl wale.
Atzunte rey xi tkyuwsa'n:
—Kxel nma'ne jun yol axix tok twitz Qman, mi jun ttzmal twi tala knajel.
12Ex ate xu'j kukx o yolin ex tma:
—Tat Rey, q'ontza amb'il tu'n nyoline, aqine tmajena, noq juntl yol kxel nma'ne teya.
—Chux yolina, chi rey xi tma'n.
13Xitzun tqanin xu'j te rey:
—¿Tiqu'ntzun ma kub' t-ximana Tat Rey tu'n tb'inchanteya ik tza'n jlu ti'j ju tnam etzan tu'n Dios? Ik tza'nx ju yol ma tmaya, aya at tila tu'nju tk'i'ya tu'n tajtz meltz'aj tky'ajala aju o tz'ex oq.
14Ex ax tok qkyaqil qo kymel; ik qten ik tza'n a' in kub' qojl twitz tx'otx', mlay b'ant tu'n tjaw q'i'n. Maske ikju, ate Dios minti' nne'l ti'n tchwinqlal jun xjal, noq o'kx in knet jun tumel tu'n tu'n tpon laq'e' jun xjal ttxlaj, aju otoq tz'el oq nej.
15Ja'lo ma chin tzaje q'malte jlu teya Tat Rey, porke ma chin ok xob'tza'ne kyu'n xjal. Kyja'tzun xkub' nximane tu'n nyoline tuk'ila, qa ma kub' tuj twitza tu'n tb'inchanteya aju ma txi nqanine teya.
16Qa ma chin tzaj tb'i'na Tat Rey, chin kletele tu'na tuj kyq'ab' qeju kyaj tu'n qnaje kyu'n tzalu twitz ju tx'otx' tzaj tq'o'n Dios te qetzb'ile, aqine tuk'ix wale.
17Chin ayole ti'j tzaq'web'l tu'na Tat Rey tu'ntzun tqe' nk'u'je, porke aya nne'l tnik'a ti'j ju b'a'n ex ti'j ju mya b'a'n ik tza'n jun t-anjel Dios. Awt Qman Dios kyaj ten tuk'ila, chi xu'j.
18Atzunte rey xi ttzaq'we'n:
—Chin kub'sale twitza tu'n mi'n tkub' tewana jun yol ti'j ju kxel nqanine teya.
—Chux yolina Tat rey, chi xu'j xi ttzaq'we'n.
19Xitzun tqanin rey te:
—¿Myape a Joab ma q'mante teya tu'n tb'inchanteya jlu?
Ex xi ttzaq'we'n ju xu'j:
—Kxel nma'ne jun yol axix tok teya Tat Rey, ax tok aju ma tmaya. Ate Joab aju at toklen ttxlaja tzaj q'mante weye tu'n ntzaje, ex ax tzaj q'mante weye tkyaqilju yol tu'n t-xi nma'ne teya.
20O tb'incha jlu noq tu'n tch'expet t-ximb'etza ti'j tky'ajala Absalón. Maske ikju, pero aya Tat Rey at nim tnab'la, ojtzqi'n tu'na tkyaqil aju in b'aj tuj tx'otx' lu, ik ttena ik tza'n jun t-anjel Dios, chi xu'j.
21Xitzun tma'n rey te Joab:
—B'intza, ma b'ant ti'j jlu wu'ne, txi'ya ex q'manxa te ku'xun Absalón tu'n tul meltz'aj.
22Atzunte Joab kub' ẍmeje' ex pon takl tib'aj twitz max twitz tx'otx' te jun techal te nimb'il, xi tq'o'n chjonte te rey, ex tma:
—Tat Rey, ja'lo ma tz'el nnik'e ti'j qa ma nk'ame xtalb'il teya, tu'nju ma tb'inchaya aju xi nqanine teya, aqine tmajena.
23Kub'tzun b'e tu'n Joab, ex xi' tuj tnam Gesur q'ilte te Absalón tu'n tul tuj Jerusalén.
24Atzunte rey xi tma'n b'i'x tu'n t-xi' Absalón tja ex tu'n mi'n tpon yek'ul twitz tuk'il; kyja'tzun tqanx xi' Absalón tja ex minti' ik' aj tuk'il rey.
25Kyxol kykyaqil xjal aj Israel minti' juntl xinaq o pon ke'yin ik tza'n te Absalón, kyja'tzun kykyaqil xjal in che yolin ti'j qa puro mejor ke'yin. Tkyaqil t-ximlal minti' ch'in tpaltil at.
26Ok nne'l tmatzo'n ttzmal twi', aju talil ttzmal twi' ok nne'l, ch'ixmi jwe' libr ik tza'nx ju malb'il at tuj tja rey, ex jun maj nne'l tu'n tuj jun ab'q'i, tu'nju puro alxix in tna'n.
27Attoq ox tky'ajal Absalón ex jun tme'jel, Tamar tb'i, ex ate txin lu tb'anilxix ke'yin.
28Tuj kab' ab'q'i o ten Absalón tuj tnam Jerusalén, ex minti' pon tyek'un tib' twitz rey,
29kyja'tzun tzaj txko'n Joab tu'n Absalón, tu'n t-xi' te t-xel yolil tuk'il rey; atzunte Joab minti' kub' tuj twitz tu'n tpon tja Absalón. Ex o txokl Joab tkab'in maj tu'n Absalón tu'n tpon tja, ax ikx minti' pon.
30Xitzun tma'n Absalón kye qe tmajen:
—Kyb'intze, aju tkojb'il Joab tkub' ttxlaj weye ex awa'n sebad tuj; chux kyxi'ye ex kyqoptz'in oke q'aq' tuj.
E je'xtzun qe tmajen Absalón ex ok kyqoptz'i'n q'aq' tuj tkojb'il Joab.
31Xi'tzun naj Joab max tja Absalón ex xi tqanin te:
—¿Tiqu'n ma tz'ok kyqoptz'i'n qe tmajena q'aq' tuj nkojb'ile?
32Atzunte Absalón xi ttzaq'we'n:
—Xi txokb'aja wu'ne tu'n tula tzalu, tu'ntzun t-xi nsama'ne tu'n t-xi'ya tuk'il rey te nxele, ex tu'n t-xi tma'na te qa noqx gan ma chin ajtze tuj tnam Gesur; mas b'a'nwtlo noqwit max ẍin kyaj tene ma chixin. Wajb'ile tu'n twile twitz rey; qatzun at jun il ma nb'inchaye twitz, b'a'n tu'n nkub' b'yo'ne tu'n, chi Absalón.
33Xi'tzun Joab tuk'il rey ex xi tma'n te aju yol otoq tma Absalón; xitzun txokb'aj Absalón tu'n rey. Tejtzun tpon twitz rey, kub' ẍmeje' ex pon takl tib'aj twitz max twitz tx'otx'. Atzunte rey el ttz'ub'an twitz.
Who We AreWhat We EelieveWhat We Do
2025 by iamachristian.org,Inc All rights reserved.
