Josué 12 - Mam Huehuetenango New Ortography

Aju tajlal kyi'j qe rey kub' kyi'j tu'n Moisés

1Atzun qe rey lu kub' kyi'j kyu'n aj Israel tuj tjawitz q'ij te nima Jordán, ex aju tx'otx' tzyet kyu'n tzajx qe' ttzi tq'ab' xaq Arnón ex pon b'aj max twi witz Hermón, tuk'ix tkyaqil chq'ajlaj ttzi nima Jordán tuj tjawitz q'ij.

2Kub' ti'j Sehón kyu'n, aju rey kye aj Amorreo, aju najl tuj tnam Hesbón. Aju tkawb'il atzun tzajni qe' tuj tnam Aroer ttzi tq'ab' xaq Arnón, tuj tmij chq'ajlaj, ex ponin b'aj max ttzi tq'ab' xaq Jaboc, jatum xi'yni qe' kytx'otx' aj Amón, ex qa mijku tx'otx' Galaad.

3Ax ikx in kawintoq tuj chq'ajlaj tuj tjawitz q'ij ttzi nima Jordán, tzajni qe' ttzi lagun Cineret ex ponin b'aj max ttzi mar at nim atz'an tuj tuj chq'a'jlaj Arabá, tumlal tnam Bet-jesimot, ex ponin b'aj tumlal tnayaj q'ij t-xe witz Pisga tb'i.

4Ex kub' ti'j Og kyu'n, aju rey te Basán, jun mankb'il kyiyjil aj Refait, atzun najl tuj tnam Astarot ex tuj tnam Edrei.

5Aju tkawb'il, atzun tzajni qe' twi witz Hermón ex tuj tnam Salca, ex xi'yin tuj tkyaqil tx'otx' Basán, ponin b'aj tuj tmojonil tnam Gesur ex tnam Maaca, max tuj tmij tx'otx' Galaad, aju tetoq Sehón aju rey te Hesbón.

6Tu'n Moisés ex kyu'n aj Israel kub' kyi'j qe rey lu, ex atzunte Moisés aju tmajen Dios xi q'onte tx'otx' lu kye qe tiyjil Rubén, kye qe tiyjil Gad ex kye mij tiyjil Manasés.

Aju tajlal kyi'j qe rey kub' kyi'j tu'n Josué

7Atzun qe rey lu, aqeju kub' kyi'j tu'n Josué ex kyu'n aj Israel tuj tx'otx' tuj telex q'ij te nima Jordán. Aju tx'otx' lu atzun in tzaj qe' tuj lugar Baal-gad aju at tuj chq'ajlaj Líbano, ex in pon b'aj twi witz Halac niqayin ttxlaj lugar Seir. Atzunte Josué kub' sipante kytx'otx' qe rey lu kyxol kyiyjil aj Israel ex xi tq'o'n te kyetzb'il te jumajx.

8Aju tx'otx' tiwitz tx'otx', tuk'ix tx'otx' chq'ajlaj, tuk'ix chq'ajlaj tkub' ttzi nima Jordán, tuk'ix tx'otx' tk'u'j witz, tuk'ix tzqij tx'otx' ex tuk'ix lugar Néguev tb'i, aqeju tx'otx' lu kyetoq aj Heteo, aj Amorreo, aj Canaán, aj Ferezeo, aj Heveo ex aj Jebuseo.

9Aqeju rey kub' kyi'j kyu'n, atzun qe jlu: aju rey te tnam Jericó, aju rey te tnam Hai, aju tnam lu niqayin ta' ti'j Bet-el,

10aju rey te tnam Jerusalén, aju rey te tnam Hebrón,

11aju rey te tnam Jarmut, aju rey te tnam Laquis,

12aju rey te tnam Eglón, aju rey te tnam Gezer,

13aju rey te tnam Debir, aju rey te tnam Geder,

14aju rey te tnam Horma, aju rey te tnam Arad,

15aju rey te tnam Libna, aju rey te tnam Adulam,

16aju rey te tnam Maceda, aju rey te tnam Bet-el,

17aju rey te tnam Tapúa, aju rey te tnam Hefer,

18aju rey te tnam Afec, aju rey te tnam Sarón,

19aju rey te tnam Madón, aju rey te tnam Hazor,

20aju rey te tnam Simron-merón, aju rey te tnam Acsaf,

21aju rey te tnam Taanac, aju rey te tnam Meguido,

22aju rey te tnam Cedes, aju rey te tnam Jocneam tkub' t-xe witz Carmelo,

23aju rey te tnam Dor tuj tx'otx' Dor, aju rey te tnam Goím tuj tx'otx' Gilgal,

24ex aju rey te tnam Tirsa. Tu'n tkyaqilx 31 kyb'aj rey.