Ezequiel 12 - Mam Huehuetenango New Ortography

Aju tqanil in tma'n Ezequiel tu'n kyxi' q'i'n pres

1Tzaj yolin Qman wuk'ile ex tma kyja':

2Aya xjal najliya kyxol qe xjal mib'an che b'in. At tb'aq' kywitz tu'n kyke'yin, ex minti' in kyil, at kyẍkyin tu'n kyb'in ex minti' in kyb'i'n, porke jumajx chkyin kywi' qe xjal lu.

3Kyja'tzun b'inchama tten tiqatza, mer ik tza'n tu'n t-xi q'i'na tuj juntl tnam najchaq, b'incham ttena q'ijl ex kywitz kykyaqil xjal, texa tuj tjaya ex txi'ya tuj juntl lugar; b'alo jaku tz'el ch'in kynik' xjal ti'j, porke jumajx mib'an che b'in.

4Q'i'n etza tiqatza q'ijl ex kywitz kykyaqil xjal, mer ik tza'n tu'n t-xi q'i'na tuj juntl tnam najchaq; oktzun tok qax, texa kywitz kykyaqil xjal mer ik tza'n tu'n t-xi q'i'na tuj juntl tnam najchaq.

5Te tib'ajxi, q'o'mixa jun toy' ja kywitz xjal ex texa tuj, tuk'ix tiqatza.

6Oktzun tok yupj twitz tx'otx', q'o'n jaxa tiqatza twi t-semila, ex texa kywitz xjal. Maqsi'n ok twitza tu'ntzun mi ttila twitz tx'otx'. Porke ma tz'oka te jun techal ti'j ju mya b'a'n tzul kyib'aj aj Israel, chi Dios tzaj tma'n weye.

7B'ajtzun nb'incha'ne wiqatze ik tza'nx otoq tzaj tma'n Qman weye, ex q'ijl in exe tuk'il wiqatze, mer ik tza'n tu'n nxi q'i'ne tuj juntl tnam najchaq. Te qale ex nq'o'ne jun toy' ja, tejtzun tok yupj jax nq'o'ne wiqatze twi nsemile, in extzune kywitz xjal.

8Te prim te juntl q'ij tzaj yolin Qman wuk'ile ex tma kyja':

9Ax tok ma tzaj kyqanin aj Israel teya, aqeju mib'an che b'in, ¿ti in b'aj teya? Che chi.

10Ex q'manxa kye kyja': A jlu jun tqanil in yolin ti'j rey tuj tnam Jerusalén ex kyi'j kykyaqil aj Israel aqeju najlqe tuj, chikuya, chi Qman.

11Q'manxa kye kyja': Aqine ma chin oke te jun techal ti'j mya b'a'n ktzajel kyi'je, ex kb'antel kyu'ne ik tza'nx weye xb'ant wu'ne, ok che xel q'i'ne pres tuj juntl tnam najchaq.

12Aju kawil kyib'aj kjawix tq'o'n tiqatz twi t-semil, oktzun qok yupj k'elex tuj toy' muro aju otoq b'ant kyu'n xjal. Maqsi'n twitz ok tex tu'ntzun mi'n ttil twitz tx'otx'.

13Kb'el nq'o'ne jun k'ob'il ti'j ex ktzyetel tu'n. Kxel wi'ne tuj Babilonia, tuj kytanmi qe aj Caldeo, mlay til ju tx'otx' lu ex axtzun kymel.

14Kykyaqil qeju ate' ttxlaj tu'n kykolin ti'j kyuk'ix kykyaqil qe t-soldad, che xel nsputune tuj tkyaqil pak' twitz tx'otx', chin xel lpe'ye kyi'j tu'n kynaj wu'ne tu'n spad tokxsa'n tuj nq'ab'e.

15Oktzun kyb'aj nsputune kyuj txqantl tnam ex nasyon, k'elel kynik' ti'j, aqine Dios.

16Ex at junjun che kletel wu'ne, mi'n che kyim tuj q'oj, mi tu'n we'yaj ex mi tu'n tx'u'j yab'il, tu'ntzun t-xi kytx'olb'a'n ti'j kyb'inchb'en mya b'a'n kye qe nasyon jatum che pol, ex tu'n tel kynik' ti'j, aqine Dios.

Juntl maj tqanil ti'j castiw

17Tzaj yolin Qman juntl maj wuk'ile ex tma kyja':

18Aya xjal, ok twa'na ax ikx ok tk'ana, b'ix jaw lu'luna tu'n t-xob'ila ex tu'nju in b'aj tk'u'ja tu'n tb'isa.

19Ex q'manxa kye kykyaqil aj Israel: Atzun jlu in tma'n Qman kyi'j qe xjal najl tuj tnam Jerusalén, ex kyi'j kykyaqil aj Israel: Che wa'l tuk'il sek'pajle'n, ex kxel kyk'a'n kyk'a' tuk'il kyxob'il; che b'el xitj qe tnam tuj Israel, minti'tl xjal kyjel ten najal kyuj, tu'n tlaj nimku mya b'a'n in kyb'incha'n xjal kyi'j kyuk'il.

20Kykyaqil tnam jatum najl qe xjal kyuj, che kb'el xitj; mi jun xjal kyjel ten najal kyuj. K'eleltzun kynik' ti'j, aqine Dios.

21Tzaj yolin Qman wuk'ile ex tma kyja':

22¿Ti t-xilen ju kyyol aj Israel in kyma'n kyja': Kukx tel q'ij, ex aju yol in tma'n t-sanjel Dios minti' in japun? Che chi.

23Q'manxa kye kyja': Atzun jlu in tma'n Qman: Ok nb'incha'ye tu'n mi'n t-xi kyma'n aj Israel juntl maj ju yol lu. Ax ikx q'manxa kye, niqayin ta' q'ij tu'n tjapun tkyaqil aju o q'manjtz tu'n nsanjele.

24Ex kyxol aj Israel mlay che tentl qeju nno'k kyq'on kyib' te nsanjele, ex mi qeju b'a'n che q'ijin tu'n kysb'un.

25Porke aqine Dios ok chin yolile, ex aju kxel nma'ne, jurat naj kjapunel ex ax qeye che ke'yilte, aqeye xjal mib'an che b'ine; aqine chin yolil, ex kjapunel wu'ne aju kxel nma'ne. Aqine Dios in chin q'mante jlu.

26Tzaj yolin Qman wuk'ile ex tma kyja':

27Qe aj Israel in kyma'n kyja': Aju o tzaj yek'un te Ezequiel ik tza'n tuj witzik' kjapunel, ex yajxi wen che chi,

28kyja'tzun q'manxa kye kyja': Atzun jlu in tma'n Qman: Qe nyole mya atxku taj tu'n kyjapun; aju o txi nma'ne kjapunel naj. Aqine Dios in chin q'mante ju yol lu.