1Kxel nq'o'ne chjonte te Qman tu'n tkyaqil wanmiye. Aya Nman ex Ndiose ma'xix toklena. Aju tajwalila ex ju t-spik'umala tok ti'ja mer ik tza'n jun xb'alun;
2tkyaqil ti'ja at t-spik'umala, tu'na xi tlik'una kya'j ik tza'n in xi lik'et jun xb'alun.
3Kub' tq'uqb'a'na qe tqan tjaya kyib'aj qe a' twitz kya'j. In che ok tq'o'na qe muj te tcarwaja, ex aju kyq'iq' in ajb'en te iqal teya.
4Nno'k tq'o'na qe kyq'iq' te t-sanjela, ex nno'k tq'o'na tqan q'ankyoq te tmajena.
5Kub' tq'o'na tx'otx' tib'aj tq'uqb'il tu'ntzun mi'n tyukch tuj tlugar.
6Aju twitz tx'otx' b'i'x kyaj tjaq' nintz mar ma' t-xe', ik ok mar ik tza'n jun xb'alun in xi lik'et, ex maqset tkyaqil twitz tx'otx' tu'n. Qe nmaq witz b'i'x e kyaj tjaq' a'.
7Ex tej t-xi tmayo'na a', jurat naj el oq tej tb'inte tyola ik tza'n q'ankyoq in julin.
8Ik' a' kyib'aj qe witz ex ku'pun kyib'aj qe chq'ajlaj tu'n tpon tuj lugar jatum b'animaj tu'n tkyaj ten,
9ex ax pon tuj tmojonil xi tma'na te, tu'ntzun mi tnoj juntl maj tib'aj tx'otx' tu'n.
10Tu'na in che jatz jlet qe twi a' ex in che kanun kyuj qe nima in che b'et kyxol qe witz.
11Ti'jtzun a' lu in che k'an qe jil te tjaq' k'ul; ex tu'ntzun a' lu in we' txqetle'n kyi'j qe chej te tjaq' k'ul.
12Kytzi' qe nima in b'ant kyq'u' qe chyu'j; ex atzun in che q'ajt qe kyxol tq'ab' tze'.
13Tu'na in tzaj jb'al kyib'aj qe witz ex max in tzaj tuj tjaya twitz kya'j; in tzaj tq'o'na nim a' twitz kya'j tu'n tcha'xix tx'otx'.
14Tu'na in ch'iy k'ul te kywa alumaj, ex tu'na in ch'iy tawal xjal in ku'x tawa'n tu'ntzun twa'n ti'j ju in tzaj tq'o'n tx'otx';
15in knet twa tu'n tok tipun, tuk'ix ta'l twitz uva te tk'a' tu'n ttzalaj, tuk'ix aseyt tu'n tqoptz'aj twitz.
16In che a'linjtz qe tze' wi'ten twi witz Líbano, aqeju ku'x tawa'n Qman.
17Kywi' qe tze' lu in b'ant kyq'u' qe chyu'j, atzun qe garza in che najan kywi' qe tzaj.
18Kywi' qe nmaq witz ate' qe chip te tjaq' k'ul, ex kywitz qe pik in xi kyewan kyib' qe kwatusa.
19O tb'inchaya xjaw te techal junjun tq'ijlalil, ex aju q'ij b'a'n tu'n jnik' or tu'n tex.
20Tu'na in tzaj tq'o'na qlolj ok nno'k qonik'an, ex atzun in che etz qe jil te tjaq' k'ul b'etel.
21In che tzanun qe b'alun ti'j kykanb'; ex in che qanin te Dios tu'n ttzaj q'o'n kychi'.
22Oktzun tjawil q'ij in che aj meltz'aj ex in che kub' b'une' tuj kyjul.
23Atzun kye xjal in che ex aq'nal ti'j kyaq'un ex max in xi kykolin okxi tex q'ij.
24Nimku tb'inchb'ena o b'ant Nman. Tkyaqil o b'ant tu'na tu'nju at nim tnab'la; nojni twitz tx'otx' tu'n tch'isb'ena.
25Lu mar at ma' twitz ex matij wen jatum in che chmet nimku jil; at jil ch'in ex at nmaq;
26atzun in che b'et qe barc tib'aj, ex atzun ta' aju nintz txkup Leviatán tb'i, aju tb'inchaya tu'n t-schan tuj mar.
27Kykyaqil jlu in che ayon ti'ja tu'n kyxi tk'a'chana ok tpon tajb'en kye.
28In xi tq'o'na kywa ex in xi' kyu'n; nim kywa in xi tq'o'na ex in noj kyk'u'j wen.
29Ok in che kyaj tkolina, b'i'x in che jaw xob', ex ok nne'l ti'na kyxew, b'i'x in che kyim ex in che ok juntl maj te tquqil tx'otx'.
30Ex ok ttzaj t-sama'na t-xewa in che poq'l, ex kyja'tzun ak'aj nno'k juntl maj twitz tx'otx' tu'na.
31Kukxwit tten tajwalil Qman te jumajx, ex tzalajxwit ti'j tkyaqil tb'inchb'en.
32B'i'x in tzaj lu'lun tx'otx' ok in xi tke'yin Qman ti'j; ex b'i'x nne'l b'uqin sib' kyi'j qe witz ok kyok tmako'n.
33Ok chin b'itzale te Qman aju Ndiose akux itz'x qine.
34Kuchiwt tu'n ttzalaj Qman ti'j nximb'etze, porke o'kx tuk'il in tzaj ntzalajb'ile.
35Kuchiwt tu'n kynaj qe aj il twitz tx'otx', ex kuchiwt che naj qeju b'inchal mya b'a'n.
Kxel nq'o'ne chjonte te Qman tu'n tkyaqil wanmiye. Nimanxwit tb'i Qman.
Who We AreWhat We EelieveWhat We Do
2025 by iamachristian.org,Inc All rights reserved.
