1At jun q'ij xi kyma'n qe t-sanjel Dios te Eliseo:
—B'a'n tu'na, aju ja jatum najlqo' puro tal ch'in tuj.
2Q'ontza amb'il qeye tu'n qxi'ye ttzi nima Jordán, ex teylex te junjun tu'n tknet jun viga tu'n, tu'ntzun tb'aj qb'incha'ne jun ja ma chixin tu'n qten tuj, che chi.
—B'a'n tu'n kyxi'ye, chi Eliseo xi ttzaq'we'n.
3—B'inchama xtalb'il, txi'ya quk'ile, chi jun kyxol.
—B'a'n, jaku chinxe kyuk'ile, chi Eliseo.
4Xi'tzun Eliseo kyuk'il max ttzi nima Jordán, ex atzun e ok ten tx'emil tze'.
5Ex tej in tx'emin jun ti'j jun ttze', etz jilpaj tk'uxb'il, ex xi tz'aq tuj nima. Kyja'tzun jaw sch'in:
—Ay xnaq'tzal, noq majen saj k'uxb'il wu'ne ex ma txi tz'aq tuj nima.
6—¿Jatum xku'x tz'aq? Chi Eliseo aju t-sanjel Dios.
Tzajtzun tyek'un jatum ku'x tz'aq. Jawtzun ttx'emin Eliseo jun tal tze' ex xi t-xo'n tuj a', ex jaw iqan k'uxb'il tib'aj a'.
7—Q'in jatza, chi Eliseo xi tma'n.
Xitzun tnuqpi'n tq'ab' ex jatz ti'n tk'uxb'il tuj a'.
Eliseo ex qe aj Siria8Ate rey kye aj Siria attoq q'oj kyxol kyuk'il aj Israel, ex b'ant ti'j tu'n kyuk'il qeju at kyoklen ttxlaj, alkyechaq lugar jatum tu'n kykub' ten qe t-soldad junjun maj.
9Xitzun t-sama'n Eliseo tqanil te rey kye aj Israel tu'n mi'n kyxi' tuj lugar lu, ex atzun kyja'toq kytzaj qe aj Siria.
10Kyja'tzun xi t-sama'n rey kye aj Israel qe t-soldad ke'yilte tuj lugar qa axtoq ate'qe, ik tza'nx otoq tma t-sanjel Dios, ex kyja'ylex o tenb'a tu'n, ex kyja'tzun tten e klet nimku maj.
11Aju rey kye aj Siria tzaj tq'oj tu'n jlu, e tzajtzun ttxko'n qeju at kyoklen ttxlaj, ex xi tma'n kye:
—Kymantze weye alkye jun qe ma txi tq'on tib' te rey kye aj Israel.
12Xi ttzaq'we'n jun kye:
—Mi jun, Tat Rey. Ate Eliseo aju t-sanjel Dios at kyxol aj Israel, atzunju in q'mante te rey kye aj Israel ti'j tkyaqilju yol in yolina ti'j max tuj tjaya jatum in tana.
13Xitzun tma'n kyrey aj Siria kye:
—Kyb'ime jatum ta', tu'ntzun kyxi nsama'ne junjun xinaq tzyulte te.
Tejtzun t-xi q'ma'n te qa atzun ta' tuj tnam Dotán,
14xi t-sama'n txqan soldad kyjax kyib'aj chej tu'n kyten ma chixin, kyuk'ix carwaj in che ajb'en tuj q'oj, ex kyuk'ix txqan soldad; qonik'an e pon tuj tnam Dotán, ex b'aj kytxolb'an kyib' ti'jele tnam.
15Tejtzun qsqix tuj juntl q'ij, jaw we' tmajen Eliseo, ex tej tetz, o til qe soldad kyjax kyib'aj chej, kyuk'ix qe carwaj in che ajb'en tuj q'oj otoq b'aj kytxolb'an kyib' ti'jele tnam; xi'tzun q'malte te Eliseo kyja':
—Xnaq'tzal, ¿ti k'okel qi'j ja'lo?
16Atzunte Eliseo xi tma'n te:
—Mi'n xob'a, ex mas nim qe at quk'il twitzju kye at kyuk'il.
17Oktzun ten Eliseo na'l Dios ex tma: In chin kub'sane twitza Nman, tu'n tjaqet twitz nmajene tu'na tu'ntzun tb'ant tke'yin. Jaqettzun twitz majen tu'n Qman ex o til, lu twi witz nojni kyu'n soldad kyjax kyib'aj chej, kyuk'ix qe carwaj in k'ant q'aq' kyi'j, ate' ti'jele Eliseo.
18Tej kyja'toq kyok tzoqpaj aj Siria ti'j Eliseo, ok ten na'l Dios ex tma:
—In chin kub'sane twitza Nman tu'n tkub' tmoẍsa'na kywitz qe xjal lu.
Kub'tzun moẍix kywitz xjal tu'n Qman ik tza'nx otoq txi tqanin Eliseo.
19Xitzun tma'n Eliseo kye aj Siria:
—Mya a b'e q'i'n kyu'ne, ex mya a tnam jlu aju in che jyone ti'j. Che lpetze wi'je, ex jaku che'x nẍaqlu'ne tuk'il ju xjal in che jyone ti'j.
E je'xtzun ti'n Eliseo qe soldad lu tuj tnam Samaria.
20Tejtzun kypon ma chixin, ok ten Eliseo na'l Dios ex tma: Ja'lo Nman, jaqoma kywitz tu'n tb'ant kyke'yin. Tejtzun tjaw kyke'yin kywitz, lu ate'toq tuj Samaria.
21Tejtzun kyilwaj tu'n rey kye aj Israel, xi tqanin te Eliseo:
—¿Che b'elpe nb'yo'ne qe jlu, Tat?
22Atzunte Eliseo xi ttzaq'we'n:
—Mi'n, mi'n che kub' tb'yo'na. ¿Baqa in che kub' tb'yo'na qeju in che tzyet tu'na tuj q'oj? Q'onxa kywa ex kyk'a' ex sama'n aja qe tuk'il kypatrón, chi Eliseo.
23Tb'inchatzun rey jun nintz wa'n te kye; tejtzun kyb'aj wa'n ex tej kyb'aj k'an, xi tma'n rey kye tu'n kyaj meltz'aj ex e ajtzun tuk'il kypatrón. Ex b'i'xtzun xi kykolin qe aj Siria tu'n kypon q'ojlel kyi'j aj Israel.
B'aj kytxolb'an kyib' aj Siria ti'j tnam Samaria24Te tib'ajxi jlu, ate Ben-adad aju rey te Siria ok tchmo'n kykyaqil qe t-soldad, e je'x ex b'aj kytxolb'an kyib' ti'jele tnam Samaria, tu'n kyok tzoqpaj ti'j.
25Tzajtzun jun nintz we'yaj tuj tnam Samaria tu'nju b'aj kytxolb'an kyib' aj q'oj ti'j, ex tu'ntzun jlu japun 80 saq pwaq ti'j tb'aqil twi' jun bur, ex atzun ti'j jun laq ttxa paloma, jwe' saq pwaq japun ti'j.
26At jun q'ij in b'ettoq rey kye aj Israel twi muro te tnam, ex xi sch'in jun xu'j ti'j ex tma:
—Onina wi'je, Tat Rey.
27Atzunte rey xi ttzaq'we'n:
—Qa minti' in onin Qman ti'ja, ¿tza'ntzun tten taja tu'n wonine ti'ja? ¿Jakupetzun knet triw te twaya wu'ne, ex ta'l twitz uva te tk'a'ya?
28¿Titzun ma b'aj ti'ja? Chi rey.
Atzunte xu'j xi ttzaq'we'n:
—Aju xu'j lu tzaj tma'n weye: Q'intza tala tu'n t-xi qchyo'n ja'lo, ex atzun weye wal kxel qchyo'n nchi'j, chi xu'j weye.
29B'ajtzun qtzq'ajsa'ne aju weye wal ex b'aj qchyo'ne. Tujtzun juntl q'ij, xi nma'ne te tu'n ttzaj tq'o'n te tal tu'n t-xi qchyo'ne, atzun te ma tz'el tewan tal, chi xu'j.
30Tejtzun tb'inte rey tyol xu'j, el t-sb'it'un t-xb'alun ti'j te jun techal ti'j tb'is. Ex tu'nju tjaxtoq twi muro te tnam, o kyil qe xjal qa ch'i'x twitz t-xb'alun tok te tujxi.
31Tmatzun rey kyja': Tzajxwit nim ncastiwoye tu'n Dios qa mi'n sel ntx'emine twi' Eliseo tujx ju q'ij ja'lo, aju tky'ajal Safat.
32Q'uqltoq Eliseo ma tja kyuk'il qe kytijil xjal. Otoq txi t-sama'n rey jun kyxol qe xinaq ate' tuk'il, ex tej na'nxtoq tpon t-sanjel rey, xi tma'n Eliseo kye qe tij xjal:
—Kyq'onke kwent ti'j rey b'yol xjal ma tzaj t-sama'n jun xjal tu'n tel tx'emin nwi'ye tu'n. Ex kyq'onke kwent ti'j ok tul xjal ma tzaj lajo'n, b'ix tz'ex kylamo'ne tlamel ja ex ax che ok tene tzyulte tu'n mi'n toktz tjaqo'n, ex q'ajq'aj tb'inx tqan tpatrón lepchix ttzaj ti'j.
33Matoq in yolin Eliseo kyuk'il qe tij xjal tej tpon t-sanjel rey twitz ex tma:
—Tkyaqilju mya b'a'n ma tzaj qi'j, tu'n Qman ma tzaj tq'o'n. ¿Ti tten tu'n tok qe'tl nk'u'je ti'j? Chi t-sanjel rey.
Who We AreWhat We EelieveWhat We Do
2025 by iamachristian.org,Inc All rights reserved.
