Hechos 27 - Mam Huehuetenango New Ortography

Tej t-xi sama'n Pablo tuj Roma

1Tejtzun tb'ant ti'j tu'n qxi'ye tuj barc tu'n qpone tuj tx'otx' Italia, xi q'o'n Pablo tuk'ix junjuntl pres tuj tkwent jun capitán Julio tb'i, aju capitán lu nejenel kye jun k'loj soldad in che ajb'en te presidente.

2O okxtzune tuj jun barc te tnam Adramitio, attoq tik'el tuj junjun tnam te Asia ttzi mar; o'xtzune tuj barc tuk'ix Aristarco quk'ile, aju aj Tesalónica, atzun ta' tnam lu tuj tx'otx' Macedonia.

3Tujtzun juntl q'ij o pone tuj tnam Sidón; atzunte Julio o tb'incha jun xtalb'il, xi tq'o'n amb'il te Pablo tu'n t-xi' ke'yil kye qe tamiw ex tu'n toninjtz ch'in kyu'n.

4O ik'tzune tuj barc tuj tnam Sidón, o ik'e ttzi'yile tx'otx' Chipre, porke ate kyq'iq' maqonte qeye.

5Qik'lenxitzune tuj mar ttxlaj tx'otx' Cilicia ex Panfilia, o pone tuj tnam Mira tuj tx'otx' Licia.

6Atzun knet jun barc tu'n capitán, te tnam Alejandría ju barc lu, kyja'toq t-xi' tu'n tpon tuj tx'otx' Italia; o okxtzun q'o'ne tuj barc tu'n capitán.

7Nimku q'ij cheb'a o b'ete tuj barc, peni o pone ttxlaj tnam Gnido. Tu'nju minti' o b'ete tu'n kyq'iq', kyja'tzun o ik'e ttzi'yile tx'otx' Creta ttxlaj tx'otx' Salmón.

8Ex peni o b'ete ttzi'yile tx'otx', o pone tuj jun tnam Tb'anil Tnam tb'i, tkub' ttzi mar, niqayintoq ta' ttxlaj tnam Lasea.

9Ex tb'ajlenxi nim q'ij, ex attoq xob'ajil ti'j barc tu'n tb'et, porke ch'ixtoq ttzyet jb'alil. Kyja'tzun xi tq'o'n Pablo kynab'l xjal,

10ex xi tma'n kye:

—Aqeye tat, ma kanun tuj nnab'le, qa ma tz'ex barc tu'n tb'et, at xob'ajil ti'j, nimxix knajel, mya noq o'kx te barc knajel, tuk'ix tiqatz, ax ikx qe jakulo qo naj, chi Pablo.

11Atzunte capitán xi tb'i'nxix aju tyol yukulte barc ex aju tyol tajaw barc, atzunte Pablo tyol minti' xi tb'i'n.

12Ex mya b'a'nxix ju tnam lu tu'n kyten tuj jb'alil tuj, kyja'tzun kub' kyximan qe txqantl tu'n kyik', qapelo jaku che kanun tuj tnam Fenice tu'n tb'aj jb'alil kyu'n tuj; aju tnam lu tkub' ttzi mar tuj tx'otx' Creta q'ancha'l tu'n tke'yinjtz ttxlaj kya'j tuj b'anq'ab'aj ex ttxlaj kya'j tuj nayaj.

Tej ttzaj jun nintz kyq'iq' tib'aj mar

13Tzajtzun ch'in kyq'iq' tib'aj mar te kub'ni, tuj kynab'l qa b'a'n tu'n tkub' b'e kyu'n ik tza'n otoq kub' kyximan, kub'tzun b'e kyu'n, e je'x b'et ttzi'yile tx'otx' Creta.

14Ex matoq ch'in tuj, tzaj jun nintz kyq'iq' tuj tb'anq'ab' q'ij ok ti'j barc.

15Xitzun lamo'n barc tu'n kyq'iq', minti'tl b'ant tb'et barc tu'n, kyja'tzun xi qtzoqpi'ne barc, xi qq'on qib'e tu'n qxi q'i'ne tu'n kyq'iq'.

16Xitzun q'i'n barc ttzi'yile jun tal tx'otx' Clauda tb'i, tokx tmijil mar ex peni jatz qi'ne ju tal barc ch'in, jawo'n tu'n matij barc.

17Tejtzun tjatz qi'ne, b'aj kyk'alo'n aju barc tu'n saqb'aq, ex attoq xob'ajil tu'n t-xi q'i'n barc tu'n kyq'iq' tuj jun lugar Sirte tb'i jatum in pon chmet ttxa tz'a'n, kyja'tzun ku'tz kykotpi'n ju xb'alun jatum nno'kx kyq'iq' te lamob'l te barc, xitzun kytzoqpin kyib' tu'n kyxi q'i'n.

18Ex te juntl q'ij tu'nju nimxix o k'ixb'iye tu'n nintz kyq'iq', kyja'tzun o ok tene q'il iqtz tuj barc ex xi qxo'ne tuj mar.

19Ex tuj toxin q'ijtl etz qxo'ne tkyaqil ti'xti at tuj barc.

20Nimku q'ij minti' q'ancha'lin q'ij ex qe che'w, ex kukx tten q'eqab' tuk'ix nintz kyq'iq', kyja'tzun, mlay qo klet, qo chiye.

21Tb'ajlenxi ela' q'ij minti' o wa'ne, jawtzun we' Pablo kyxol, ex tma:

—Aqeye tat, maswitlo b'a'n noqwit xi kyb'i'ne nyole, miwt o etz tuj Creta, miwtlo ma qo k'ixb'isanjtz ex miwtlo ma naj tkyaqil jlu.

22Ex kxel nma'ne kyeye ja'lo, mi'n che b'isune, ex mi jun knajel qxol, o'kx ju barc knajel.

23Porke tuj qonik'an may' ma ten jun anjel wuk'ile, saj sama'n tu'n Dios aju Dios atine tuj tkwent ex in chin ajb'ene te,

24ex saj tma'n anjel weye kyja': Mi'n xob'a Pablo, porke ilxix ti'j tu'n tpona twitz tat gobierni, ex ma tzaj xtalina tu'n Dios tu'n mi'n kynaj kykyaqil qeju ate' tuk'ila tuj barc, chi anjel weye.

25Kyja'tzun aqeye tat, mi'n che b'isune; porke q'uql nk'u'je ti'j Dios kyja'xtzun k'okel ik tza'n ma tzaj q'ma'n weye tu'n anjel.

26Ex ilxix ti'j tu'n qpon tz'aq ti'j jun tal tx'otx' tmijil mar, chi Pablo kye.

27Tujtzun tkyajlajin aq'b'il, lamo'nx qo'ye tu'n kyq'iq', axtoq ato'ye tuj mar Adriático tb'i. Tejtzun tpon tmij aq'b'il kub' kyximan qe q'il barc qa niqayintoq ate' ttzi tx'otx';

28ku'xtzun kyq'o'n ju echb'il tuj a', ok kyke'yin 40 var t-xe a'; ex xi laq'e' ch'intl barc, ku'x kyq'o'n juntl maj ju echb'il, ok kyke'yin 30 var t-xe a'.

29Ex tzaj kyxob'il tu'n kyok takl ti'j ab'j, kyja'tzun ku'x kyq'o'n kyaje tzuyb'il te barc tuj a' tjaq' tje', o kyajb'e tu'n tjawil naj q'ij.

30Atzun kye q'il barc ok tilil kyu'n tu'n kyetz oq tuj barc, ku'x kyq'o'n ju tal barc tuj mar, mer ik tza'n tu'n tku'x kyq'o'n ju tzuyb'il te barc ttxa'n twitz, ex noq tten kyu'n.

31Xitzun tma'n Pablo te capitán ex kye soldad:

—Qa mi'n ma che kyaj ten xjal lu tuj barc, kyeye mlay che klete.

32Kub'tzun kytaqk'u'n soldad taq'al tal barc, xi kytzoqpi'n tuj a'.

33Ch'ixtoq tjawil q'ij, xi tq'o'n Pablo kynab'l kykyaqil tu'n kywa'n, ex tma:

—Ma b'ant-xi kyajlaj q'ij in che itz'lene ex in kub' kyyo'ne we'yaj ex minti' ch'in kywaye in xi'.

34Kyja'tzun, chin kub'sale kywitze tu'n kywa'ne tu'n tok kyipune tu'ntzun kyklete, ex mi jun kyxole knajel jun ttzmal twi'.

35Tejtzun tmante Pablo jlu, jaw ttzyu'n ju pan ex xi tq'o'n chjonte te Dios ti'j kywitz kykyaqil xjal, kub' tpiẍk'u'n, ex ok ten wa'l.

36Ex kykyaqil o qe'xix kyk'u'j, ax ikx e ok ten wa'l.

37Attoq 276 qb'ete tuj barc.

38Tejtzun kyb'aj wa'n, etz kyxo'n ju triw tuj mar tu'n t-sasjxix tiqatz barc.

Tej tnaj barc tu'n tipumal a'

39Tejtzun qsqix, minti' el kynik' qe q'il barc ti'j alkye ju tx'otx', ex o kyil jun tq'ab' mar tokx tuj tx'otx' at ttxa tz'a'n ttzi; kub' kyximan qa at tumel tu'n tpon we' barc ttzi a' ma chixin.

40Kub'tzun kytaqk'u'n qe tzuyb'il te barc, ax e kyaj kyq'o'n tuj mar, xi kyko'pin aju k'alb'il te xqutz'b'il. Ex jaw kyq'o'n ju nintz xb'alun ttxa'n twitz barc tu'n t-xi lamo'n tu'n kyq'iq', yalx e je'x ttzi a'.

41Ex at jun lugar tuj a' jatum nno'k tchmon tib' ttxa tz'a'n, axtzun e ok takpuj ti'j, axtzun kyaj we' barc; xi tawan tib' ttxa'n twitz, ya minti' yukch, atzun ttxa'n tje' barc xi' pax tu'n tipumal a'.

42Atzun kye soldad kub' kyximan tu'n kykub' b'yet qe pres, tu'ntzun mi a'l jun kye tu'n tel oq tuj xnu't'xin.

43Atzunte capitán tajb'iltoq tu'n tklet Pablo, kyja'tzun e je'x tmayo'n qe soldad tu'n mi'n kykub' b'yo'n qe pres kyu'n. Ex xi tma'n kye qeju b'a'n che xnu't'xin tu'n tku'tz kyxo'n kyib' tuj a' tnejel tu'ntzun kypon ttzi tx'otx'.

44Atzun kye txqantl, xi tma'n kye tu'n kyik'x junjun tib'aj tz'lom ex junjuntl tib'aj ti'xti te barc. Kyja'tzun e klet kykyaqil, ex e pon ttzi tx'otx'.