1 Corinto 11 - Mam Huehuetenango New Ortography

1Kykano'mele wi'je, ik tza'n weye ma tz'el nkano'ne ti'j Crist.

Tza'n tten tu'n kyten xu'j tuj k'ulb'il

2Kxel nq'o'ne chjonte kyeye erman porke tuj tkyaqil in chin tzaj kyna'ne, ex tzyu'nx ju xnaq'tzb'il kyu'ne ik tza'n xi nq'o'ne kyeye.

3Porke waje tu'n kyb'inteye, ate Crist nejenel te tkyaqil xinaq, atzunte xinaq nejenel te xu'j, ex ate Dios nejenel te Crist.

4Qa at jun xinaq in na'n Dios ex qa in xi tchik'b'a'n aju in tma'n Dios te ex tjax tpasb'il tuj twi', jun ch'ixb'ajil jlu ti'j twi'.

5Ex qa at jun xu'j in na'n Dios ex in xi tchik'b'a'n aju in tma'n Dios te ex minti' jun xb'alun tjax tuj twi', jun ch'ixb'ajil jlu ti'j twi'; porke junx ta' mer ik tza'n otoq tz'el tk'oẍin ti'j twi'.

6Ex qa minti' in jax tq'o'n xu'j jun xb'alun tuj twi', matzo'mil ttzmal twi'; qatzun at tch'ixwi xu'j ti'j tu'n tel tmatzo'n ttzmal twi' ex qa tu'n tel tk'oẍin ti'j twi', b'a'n tu'n tjax tq'o'n jun xb'alun tuj twi'.

7Ate xinaq mi'n jax tq'o'n tpasb'il tuj twi', porke tilb'ilal Dioste ex in tyek'un tajwalil Dios ti'j, atzunte xu'j in yek'unjtz tajwalil xinaq ti'j.

8Porke ate xinaq mya ti'j xu'j ela, ate xu'j el ti'j xinaq.

9Ex mya tu'n tlaj xu'j o b'inchanjtz te xinaq, ate xu'j o b'inchanjtz tu'n tlaj xinaq.

10Kyja'tzun il ti'j tu'n tjax tq'o'n xu'j jun xb'alun tuj twi', tu'n tok te jun techal qa at toklen tchmil ti'j, tu'n kylaj qe anjel.

11Ex ik tza'n kyaj b'ant ti'j tu'n Qajaw, ate xinaq at tajb'en xu'j te, ex ate xu'j at tajb'en xinaq te.

12Porke ik tza'n te xu'j ti'j xinaq ela, ax ikxtzun kye xinaq ti'j xu'j in che el itz'j; ex tkyaqil tuk'il Dios in tzaj.

13Ax qeye che ximane ti'j jlu: ¿B'a'npe tu'n tna'n xu'j Dios mya tjax xb'alun tuj twi'?

14¿Myapetzun qu'nx nne'l qnik' ti'j, qa ma ch'iy ttzmal twi' xinaq in tzaj tch'ixwi?

15Atzunte xu'j at tzalajb'il te qa ma ch'iy ttzmal twi'; porke ma tzaj q'o'n ttzmal twi' xu'j tu'n tajb'en te txayb'il ti'j twi'.

16Qa at jun taj tu'n tq'ojl tu'n tlaj jlu, b'a'n tu'n tel tnik' ti'j, qeye minti' in qb'incha'ne juntl costumr, ikx qe txqantl okslal tuj junjun iglesi etzan qe tu'n Dios.

Mya tuj tumel in che wa'n ti'j Santa Cena

17Kxel nma'ne juntl yol kyeye, ex mlay txi nma'ne qa b'a'n in kyb'incha'ne; ex ok nno'k kychmon kyib'e tuj k'ulb'il, minti' jun b'a'n in kyk'mo'ne ti'j, noq mas mya b'a'n nne'la te kyeye.

18Tnejelxix, ok nno'k kychmon kyib'e kykyaqile okslal qeye, in nb'i'ne qa at pab'l tib' kyxole, ex tuj nnab'le ax tok junjun yol.

19Ex il ti'j tu'n tten pab'l tib' kyxole, tu'ntzun tel kynik'e kyi'j qeju axix tok okslal qe kyxole.

20Ex ok tok kychmon kyib'e minti' tumel tu'n kywa'ne ti'j ju wab'j kyaj tma'n Qajaw.

21Ex ok in che wa'ne, teyle junjun nej in wa'n ti'j ju tex twa; kyja'tzun at junjun minti' in wa'n tu'nju minti' twa, atzun junjuntl b'i'x in chyo'n kywi' tu'nju nim in xi' kyu'n.

22¿Titzun tten ikju? ¿Minti'pe kyjaye jatum tu'n kywa'ne ex tu'n kyk'ane? ¿Myapetzun tu'n jlu nne'l kyik'une qe okslal etzan qe tu'n Dios, ex in tzaj kych'ixwi qeju minti' kye? ¿Titzun kxel nma'ne? ¿Okpelo kxel nma'ne qa b'a'n in kyb'incha'ne? Ti'j jlu mlay txi nma'ne qa b'a'n in kyb'incha'ne.

Aju xnaq'tzb'il ti'j Santa Cena Mateo 26.26-29; Marcos 14.22-25; Lucas 22.14-20

23Porke aju xnaq'tzb'il tzaj tq'o'n Qajaw weye, axju xi nq'o'ne kyeye: Tzaj ttzyu'n Qajaw Jesús pan ax qonik'an tej t-xi q'o'n tuj kyq'ab' xjal;

24ex tb'ajlenxi tq'o'n chjonte, kub' t-sipan ju pan kyxol ex tma: Kytzyunxe ex kywa'nxe; atzun nximlale jlu kjawil q'o'n twitz crus tu'n kyklete, kyb'inchame jlu te nab'l weye.

25Ax ikx tzaj ttzyu'n ju vas tb'ajlenxi wa'n ex tma: Aju tku'x tuj vas lu, atzun ak'aj yolju tziyi'maj wu'ne tu'n nchk'ele; tkyaqil maj ok t-xi kyk'a'ne jlu, kyb'inchame te nab'l weye, chi Jesús kye.

26Kyja'tzun, tkyaqil maj ok t-xi kywa'ne ju pan lu ex ok t-xi kyk'a'ne aju tku'x tuj vas lu, in kyyek'une ti'j tkyimlen Qajaw; maxi kxel kykoline okxi tul.

Tza'n tten tu'n qwa'n ti'j ju Santa Cena

27Kyja'tzun, alkye jun ma wa'nte ju pan lu ex ma k'ante ju k'ab'j lu aju kyaj tma'n Qajaw, qa mya xo'n tu'n, at til tu'nju mya xo'n t-ximlal ex tchk'el Qajaw tu'n.

28Kyja'tzun, teyle junjun tu'n t-ximan ti'jx qa b'a'n tten, tu'ntzun twa'n ti'j ju pan ex tu'n tk'an ti'j ju k'ab'j.

29Ex alkye jun in xi twa'n ex in xi tk'a'n, qa mya xo'n tu'n ex minti' nne'l tnik' ti'j qa atzun t-ximlal Qajaw jlu, tu'nx in tzaj ti'n jun castiw tib'aj, tu'nju in xi twa'n ex in xi tk'a'n.

30Tu'ntzun tlaj jlu at nimku yab' kyxole ex nimku minti' kyipun, ex at junjun o che kyim.

31Noqwit in qo ximan qi'jx tza'n qten, minti'wtlo in kub' qcastiw tu'n Qajaw.

32Qatzun ma qo ok tuj xjel tu'n Qajaw, in tzaj tq'o'n Qajaw ch'in qcastiw, tu'ntzun mi'n tkub' qsentens tu'n qnaj junx kyuk'il kykyaqil xjal.

33Kyja'tzun aqeye wermaniye, ok tok kychmon kyib'e tu'n kywa'ne, che ayone kyi'j txqantl.

34Qa at jun nne'l tk'u'j, b'a'n tu'n twa'n tuj tja tu'ntzun mi'n ttzaj q'o'n kycastiwoye ok tok kychmon kyib'e. Atzun txqantl kb'antel ti'j wu'ne ok npone kyuk'ile.