Isaías 32 - Mam Huehuetenango New Ortography

Tzul jun rey tz'aqlxix tu'n tkawin

1K'okel jun rey kkawil tuj tumelxix, ex qe nejenel che kawil tuj tumelxix.

2Teyle junjun kye che okel ik tza'n jun lugar te kykolb'il kyib' xjal ok ttzaj kyq'iq', ex ik tza'n jun kykolb'il kyib' te kyq'iq' jb'al; ik che okel ik tza'n jun tb'eyil a' in pon te a'lb'il tuj jun tzqij tx'otx' ex ik che okel ik tza'n t-xlekumal jun nintz pik tuj jun lugar tzqij tx'otx'.

3Mlay moẍxix kywitz qeju in che ke'yin, ex qeju in che b'in, kb'el kyq'o'n kywi' ti'j tu'n kyb'inte ju yol.

4Mya noq tu'n kyex twitz kb'antel jun ti'xti kyu'n, noq o'kx kb'antel kyu'n tuk'il nab'l, ex qe xjal xt'ab' che yolin, che yolil clarxix wen.

5Aju xjal minti' tnab'l, mlay kyma xjal ti'j qa mejor tmod, ex mlay kyma xjal qa ma' toklen jun xjal jawni twitz tu'n tb'inchante mya b'a'n.

6Porke aju xjal minti' tnab'l in yolin ti'j ju yol minti' tnab'l ex in kub' t-ximan jun ximb'etz mya b'a'n; tok tilil tu'n tu'n tb'inchante jun il ma'xix ex in nik'an yol ti'j Qman; minti' in xi tq'o'n ch'in twa ju xjal at we'yaj ti'j ex minti' in xi tq'o'n ch'in tk'a' aju at txqetle'n ti'j.

7Aju xjal jawni twitz tu'n tb'inchante mya b'a'n nim in sb'un, ex in b'aj t-ximan ti'j tu'n tb'inchante mya b'a'n; tok tilil tu'n tu'n tb'inchan mya b'a'n tuk'il nik'aj yol kyi'j qe meb'a xjal; ax ikx in tb'inchan kyi'j qe xjal ch'in kyoklen, aqeju in che qanin tu'n t-xi b'incha'n kyi'j.

8Atzun qe xjal b'a'n kynab'l, in b'aj kynak'u'n ti'j tu'n kyb'inchante ju b'a'n, ex wa'lxix qe tuj kynab'l b'a'n.

Jun yol kye qe xu'j minti' kyaj ti'j aju tzul

9Aqeye xu'j minti' kyaje ti'j aju tzul, kyb'intze aju kxel nma'ne kyeye: Aqeye xu'j q'uql kyk'u'je, kyb'intze qe nyole:

10Ja'lo q'uql kyk'u'je, ex te tib'ajxi ch'intl jun ab'q'i, ktzajel tchiylal kyi'je, ex kb'ajel tq'ijlalil twitz awal ex mlay che chmone mastl ti'j twitz uva.

11Aqeye xu'j minti' kyaje ti'j aju tzul ex minti' ch'in kyb'ise, che lu'lune; aqeye q'uql kyk'u'je, tzajx tchi kyi'je, kyi'n ele tb'anil xb'alun tok kyi'je ex kyq'on oke xb'alun ch'i'x twitz te jun techal kyb'ise.

12Kyq'ajtza'n oke ttzi kyxu'ke tu'n ta'w k'ixk'oj, tu'nju che najel qe kojb'il tb'anilxix ex qe tqan uva in kyq'o'n nim kywitz.

13Ktzajel ch'iy tqan ch'i'x ex chk'ul tuj tnam etzan wu'ne ex kyuj kykyaqil qe ja ate' tuj tnam jatum at nim tzalajb'il ex achb'il.

14Kyjel tkolin tja rey, ex ju nintz tnam jatum ate' nim xjal, minti' xjal kyjel ten tuj, qe ja ma' kywa'l te kykolb'il kyib' xjal che kyjel kolin te jumajx, ex atzun che tel qe bur te tjaq' k'ul tuj ex k'okel te kywab'l alumaj.

15Ex ktzajel tq'o'n Qman T-xew tu'n tten juntl maj quk'il; aju tzqij tx'otx' k'okel juntl maj te kojb'il ex aju kojb'il k'okel ik tza'n jun nmaq chk'ul tb'anilxix.

16Tuj tkyaqil lugar kb'inchetel aju tz'aqlxix ex aju tuj tumelxix.

17Oktzun tb'inchet aju tz'aqlxix, b'i'x kweb'el q'oj, che tel xjal tuj tzalajb'il ex b'i'x kqeb'il kyk'u'j te jumajx.

18Qe xjal etzan tu'n Dios che tel tuj txub'txaj, ex che najal kyuj qe ja segurxix te ojlab'l.

19Maske b'i'x ma che b'aj naj qe tze' tuj chk'ul tu'n saqb'aqun ex maske b'i'x ma naj tnam,

20atzun kyeye che tele tuj tzalajb'il, ktel nim a' te a'lb'il kyawale ex che tzoqpetel kyburre ex qe kywakẍe tu'n kyxi' wa'l.