Éxodo 2 - Mam Huehuetenango New Ortography

Ul itz'j Moisés

1At jun xinaq kyxol tiyjil Leví o moje' tuk'il jun xu'j ax aj Leví.

2Ok ten tal xu'j lu, ex q'a tal ul itz'j. Tej ttil tb'aniltoq ke'yin, xi tewan ox xjaw.

3Tej minti'tl b'ant tu'n t-xi tewan, tzaj ti'n jun chi'l b'inchamaj ti'j ajlaj, b'aj tlo'tzin ti'j tu'n ta'l ula ex q'ol, ku'x tq'o'n tal ne' tuj ex okx tewan kyxol tqan ajlaj ttzi nima Nilo.

4Najchaq xi we' jun tanb' ne' ke'yilte te, tu'n tlonte ti at tb'ajel ti'j.

5Ku'xtzun tme'jel Faraón chil ttzi nima ex tej in che b'ettoq qe q'apoj ttzi nima, aqeju uk'intoq tu'n, o til tme'jel Faraón aju chi'l tokx kyxol tqan ajlaj, ex xi t-sama'n jun tmajen q'ilte te.

6Tej tjaw tjaqo'n, o til tal ne' ex lu in oq'toq. Tzajtzun q'aq'an tk'u'j tme'jel Faraón ti'j ex tma: Tk'wa'l jun aj Hebreo te jlu, chi tme'jel Faraón.

7Xitzun tma'n tanb' tal ne' te tme'jel Faraón kyja':

—Qa taja, jaku chinxe txkolte jun xu'j aj Hebreo tu'n t-xi q'ot tch'u' ne', chi txin.

8Xi ttzaq'we'n tme'jel Faraón:

—Txi'ya.

Xi'tzun te txin ex tzaj ttxko'n aju ttxu ne'.

9Xitzun tma'n tme'jel Faraón te kyja': Q'inxa tal ne' lu, ch'iysama ex kchjetela wu'ne. Xitzun ti'n txub'aj tal ne' ex o ch'iy tu'n.

10Tejtzun tch'iy ne', xi ti'n twitz tme'jel Faraón, oktzun tq'o'n tme'jel Faraón mer ik tza'n te tal, Moisés tb'i ok tq'o'n ex tma: Atzun tb'i k'okel tu'nju tuj a' jatz wi'ne, chi tme'jel Faraón.

Etz oq Moisés tuj Egipto

11At jun q'ij, tej otoq ch'iy Moisés, etz ke'yilte kye t-xjalil ex o til kyuw aq'untl tkub' kyib'aj. Ax ikx o til lu jun aj Egipto in k'ixb'isantoq ti'j jun aj Hebreo aju t-xjalil.

12Xitzun tke'yin Moisés ti'jele, ex tej ttil mi a'ltoq jun in ke'yin ti'j, kub' tb'yo'n aju aj Egipto ex ku'x tmaqu'n tjaq' poqlaj.

13Tuj juntl q'ij, etztl Moisés ex o til kab'e aj Hebreo in che q'ojintoq kyxolx. Xi tma'n teju otoq tb'incha mya b'a'n ti'j tuk'il:

—¿Tiqu'n nno'k tb'yo'na t-xjalila? Chi Moisés.

14Xitzun ttzaq'we'n aj Hebreo te:

—¿Alkye ma tz'ok q'onte teya te nejenel ex te jwes qib'aje? ¿Qape taja tu'n nkub' tb'yo'na ik tza'n kub' tb'yo'na aju aj Egipto? Chi xjal.

Tzajtzun t-xob'il Moisés, ex tma tuj tanmi: Malo chin b'injtze ti'j xjal o kub' wu'ne, chi Moisés.

15Tej tb'inte Faraón aju otoq b'inchanjtz, ok tq'o'n tilil tu'n tkub' b'yo'n Moisés tu'n, atzunte Moisés etz oq twitz, ex xi' najal tuj tx'otx' Madián.

16Tej q'uqltoq ttzi jun xoch, e ul wuq tme'jel pal te Madián, ex jatz kyi'n a' tu'n kynoj qe chok tu'n kyk'an t-ẍne'l kyman.

17E ultzun txqantl pastor ex e je'l kylajo'n qe txin. Atzunte Moisés ok ten kolol kyi'j txin ex xi tq'o'n kyk'a qe kyẍne'l.

18Tej kypon meltz'aj qe txin tja Reuel aju kyman, tzaj tqanin kye kyja':

—¿Tza'n tten ma che ul naje ja'lo? Chi Reuel.

19Xitzun kytzaq'we'n txin:

—At jun xinaq aj Egipto ma kolon qi'je tuj kyq'ab' txqantl pastor. Ax ikx ma jatz ti'n a' ex ma txi tq'o'n kyk'a ẍne'l, che chi txin.

20Xitzun tma'n Reuel kye tme'jel:

—¿Jatum ta' xinaq lu? ¿Tiqu'n mi'n saj kyuk'ine tzalu? Kytxka'tze tu'n twa'n quk'il, chi Reuel.

21B'a'n e'la tuj twitz Moisés tu'n tkyaj ten tuk'il xinaq lu, ex xi tq'o'n xinaq jun tme'jel aju Séfora tb'i te t-xu'jil Moisés.

22Ul itz'j jun tal xu'j lu. Gersón tb'i ok tq'o'n Moisés ex tma: Atzun tb'i k'okel tu'nju stranjer xjal qine tuj tx'otx' lu.

23Tb'ajlenxi nim q'ij kyim rey te Egipto. Atzun kye aj Israel kukx e ayayan tu'nju nim aq'untl kub' q'o'n kyib'aj, ex jaw tq'ajq'ajel kywi'. O japun tq'ajq'ajel kywi' tuk'il Dios, tu'n tlaj aq'untl tkub'toq kyib'aj.

24O tb'i Dios tq'ajq'ajel kywi' in che ayayantoq, ex ultzun ti'j tk'u'j aju yol otoq tzaj ttziyan te Abraham, te Isaac ex te Jacob.

25O til Dios qe aj Israel ex el tnik' ti'j ju in b'ajtoq kyi'j.