Apocalipsis 16 - Mam Huehuetenango New Ortography

Aju castiw tku'x tuj wuq laq

1Ex o nb'iye jun tq'ajq'ajel wib'aj kyuwxix etz q'ajt tuj tja Dios, ex xi tma'n kye qeju wuq anjel:

—Kyxi'ye ex kyqonxe twitz tx'otx' aju tku'x tuj wuq laq, aju castiw in tzaj tq'o'n Dios.

2Xi'tzun tnejel anjel, ex xi tqo'n twitz tx'otx' aju tku'x tuj tlaq. Ex e jawil tx'a'k plojxix ex nim ta'w kyi'j qe xjal, aqeju tok techal txkup kyi'j, ex in che k'ulun twitz ju tilb'ilal txkup.

3Atzunju tkab'in anjel xi tqo'n tib'aj mar aju tku'x tuj tlaq, ex ok mar te chik' ik tza'n tchk'el jun xjal b'yo'n in kub', ex e b'aj kyim kykyaqil qeju najl qe tuj mar.

4Atzunju toxin anjel xi tqo'n aju tku'x tuj tlaq, xi tqo'n kyib'aj qe a' ex kyib'aj twi a', ex qe a' e ok te chik'.

5Ex xi nb'i'ne tyol ju anjel tajaw a', tma:

Aya Qman, aya at ja'lo, aya at ojtxi, ex aya Xjan, tuj tumelxix ma kub' kycastiw jlu tu'na.

6Porke el kychk'el qe okslal ex kychk'el qe t-sanjela kyu'n, ax ikx kye ja'lo ma tzaj tq'o'na chik' te kyk'a'; porke tuj kyilx jlu.

7Ex o nb'iye at juntl tzaj q'ajt twitz altar, tma:

—Ax tok Qman Dios, at tipumala tu'n tb'ant tkyaqil tu'na, axix tok ex tuj tumelxix aju kysentens ma kub' tq'o'na.

8Atzunju tkyajin anjel xi tqo'n ti'j q'ij aju tku'x tuj tlaq, ex xi q'o'n amb'il te q'ij tu'n kytz'e'y qe xjal tu'n ta'w q'ij.

9Ex e b'aj tz'e'y xjal tu'nju nim kyaq; ex minti' ajtz ti'j kyanmi tu'n tjaw kynimsa'n tb'i Dios, noq o'kx e ok ten yasul ti'j Dios aju at tipumal tu'n kytzaj tq'o'n qe k'ixb'isab'l lu.

10Atzunju tjwe'yin anjel xi tqo'n aju tku'x tuj tlaq, xi tqo'n tib'aj tq'uqb'il txkup jatum in kawin, ex aju tkawb'il txkup b'i'x kyaj ten tuj qlolj, ex kub' kytx'a'n kyaq' xjal tu'n ta'w k'ixb'isab'l.

11Maske ikju, pero minti' ajtz ti'j kyanmi ti'j kyb'inchb'en mya b'a'n, noq o'kx e ok ten yasul ti'j Dios aju at tuj kya'j, tu'n tlaj k'ixk'oj kyi'j ex tu'n tlaj tx'a'k kyi'j.

12Atzunju tqaqin anjel xi tqo'n aju tku'x tuj tlaq, xi tqo'n tib'aj nintz nima Éufrates, ex b'i'x aj tzqij ju nima, tu'ntzun kyik'tz qe rey che tzajel tuj tjawitz q'ij.

13Ex o wile ox ju'ẍ ik che ke'yin ik tza'n wo', e jatz tuj ttzi' jil dragón ex tuj ttzi' txkup ex tuj ttzi' ju pakb'al nik'al yol.

14Porke aqe jlu ju'ẍ qe puro ploj qe in che b'ant qe señ kyu'n, ex in che pon kyuk'il rey tuj tkyaqil twitz tx'otx' tu'n kyok kychmo'n, tu'ntzun kyq'ojin ti'j Dios tuj jun q'ij ma' toklen, aju Dios at tipumal tu'n tb'ant tkyaqil tu'n.

15Kyb'intze, chin ule ik tza'n eleq'; at tzalajb'il teju xjal in xq'uqin ex tok t-xb'alun, tu'ntzun mi'n tb'et sqi't ti'j ex tu'n mi'n tkub' tq'o'n tch'ixwi kywitz xjal, chi Jesús.

16Ex e ok kychmo'n qe rey tuj lugar Armagedón tb'i tuj yol hebreo.

17Atzunju twuqin anjel xi tqo'n tuj kyq'iq' aju tku'x tuj tlaq; ex etz jun tq'ajq'ajel wib'aj kyuwxix tuj tja Dios, tzaj q'ajt max twitz tq'uqb'il, ex tma:

—O'kxtzun, ma b'aj.

18Ex tzaj tqan q'ankyoq tuk'ix q'ankyoq in jululun ex jun kyaqnajnab' kyuwxix, na'nx ttzaj jun kyaqnajnab' ikju atxix tej tb'ant xjal twitz tx'otx'.

19Ex aju nintz tnam b'i'x el k'ab'chaj, ox piẍ el, ex qe nintz tnam tuj junjun nasyon e kub' xitj; ex tzaj tna'n Dios aju nintz tnam Babilonia tu'n t-xi tq'o'n jun vas te nojni tu'n nimxix tq'oj Dios, tu'n t-xi kyk'a'n te jun kycastiw ma'xix.

20Ex kykyaqil qe tal tx'otx' tmijil mar e je'l oq, ex qe witz e kub' naj.

21Ex tzaj nimxix saqb'aqun twitz kya'j, kub' tz'aq kyib'aj xjal, aju kyalil junjun saqb'aqun b'alo jun quintal junjun; e oktzun ten xjal yasul ti'j Dios tu'nju saqb'aqun tzaj te k'ixb'isab'l, porke ma'xix k'ixb'isab'l tu'n saqb'aqun.