1 Reyes 14 - Mam Huehuetenango New Ortography

Xi tma'n Ahías qa tu'n tkub' t-sentens Jeroboam

1Tuj tq'ijlalil lu o yab't Abías aju tky'ajal Jeroboam,

2ex xi tma'n Jeroboam te t-xu'jil:

—Ch'expumel t-xb'aluna tu'ntzun mi'n tel nik'b'aj ti'ja qa aya nxu'jile, ex txi'ya tuj Silo tuk'il Ahías aju t-sanjel Dios tzaj q'mante weye tu'n woke te rey te nasyon lu.

3Q'inxa laj pan, tuk'ix wab'j tx'ilsa'maj, tuk'ix jun xar ta'l kab', ex q'onxa te tu'ntzun ttzaj tma'n teya ti kb'ajel ti'j k'wa'l lu.

4Tb'inchatzun t-xu'jil Jeroboam ikju. B'anttzun tten, xi' tuj Silo ex pon tja Ahías. Atzunte Ahías mib'antoq ke'yin tu'nju otoq tz'ok yupj kyi'j tb'aq' twitz tu'n tijin,

5ex otoq tzaj tma'n Qman te kyja': Tzul t-xu'jil Jeroboam qanil jun t-xjel teya ti'j ju tal ma yab't. Atzun yol lu kxel tma'na te, ex ok tul xu'j lu ch'expu'n t-xb'alun tu'n mi'n tel tnik'a ti'j, chi Dios.

6Tejtzun tb'inte Ahías tq'ajq'ajel tqan ju xu'j tej topin b'et ttzi ja, xi tma'n te:

—Toktza, aya t-xu'jil Jeroboam. ¿Tiqu'n nno'k tq'on tib'a te juntl xu'j? Ma nk'ame jun tqanil mya b'a'n te teya,

7kyja'tzun, taj meltz'aja ex q'manxa te Jeroboam: Ate Qman aju Kydios aj Israel ma tma kyja': Aqine in etz q'inte teya kyxol tnam xjal, ex ok nq'o'ne te nejenel kye aj Israel aju tnam etzan wu'ne.

8El wi'ne ju kawb'il kye tiyjil David ex xi nq'o'ne teya. Ex minti' ma tz'oka ik tza'n te David aju nmajene, e japun qe nmandamyente tu'n ex ok lpe' wi'je tu'n tkyaqil tanmi, ex tz'aqlxix e ela qe tb'inchb'en tuj nwitze;

9nimxix mya b'a'n ma tb'inchaya kywitz qe kawil e ten ojtxi; ma tb'inchaya txqantl tdiosa ex qe tilb'ilal in che b'ant ti'j k'uxb'il in kub' ulj tu'n q'aq', ex ma chin el tik'una. Tu'n tkyaqil jlu ma tzaj nq'oje ti'ja.

10Kyja'tzun, ktzajel wi'ne mya b'a'n kyib'aj tiyjila: Che najel wu'ne kykyaqil qe tiyjila xinaq ate' kyxol aj Israel; mi jun kyjel anq'in; te jumajx che najel wu'ne ik tza'n in b'aj tz'iset tz'is.

11Aqeju tiyjil Jeroboam che kymel tuj tnam, che xel chyo'n kyu'n tx'yan; ex aqeju che kymel tuj kojb'il, che xe'l chyo'n kyu'n k'utz, porke aqine ma chin q'mante jlu, chi Qman.

12Atzun teya xu'j, taja tjaya. Noq o'kx ok tokxa tuj tnam, kymel aju tala,

13ex kykyaqil aj Israel che oq'el ti'j, ex kb'elex kymaqu'n; o'kxku jun tiyjil Jeroboam lu kb'elex maqu'n, ex kyxol kykyaqil tiyjil Jeroboam, o'kxku ju q'a lu ma tzalaj Qman ti'j, aju Kydios aj Israel.

14Te tib'ajxi jlu k'okel tq'o'n Qman juntl rey kyxol aj Israel ex che kymel tiyjil Jeroboam tu'n tuj q'ij lu, ex b'i'x kb'antel tu'n ja'lo.

15Che kb'ajel tchito'n Qman qe aj Israel ik tza'n jun nima in b'aj tyukun qe tqan ajlaj. Che jawitz tb'aqo'n tuj tb'anil tx'otx' aju xi tq'o'n kye kyxe'chel, ex che elex tlajo'n max ti'jxi nima Éufrates, porke ma tzaj nim tq'oj Qman kyi'j tu'nju ma kub' kyb'incha'n tilb'ilal xu'j dios Asera.

16Che kyjel kolin qe aj Israel tu'n Qman tu'n kylaj qe il ma tb'incha Jeroboam ex ma che b'inchan aj Israel il tu'n, chi Ahías, xi tma'n.

17Jawtzun we' t-xu'jil Jeroboam ex aj tja tuj Tirsa; ex matoq nno'kx ttzi tja tej tkyim tal.

18Kykyaqil aj Israel e je'x maqulte ex e oq' ti'j, ik tza'nx otoq tma Qman te Ahías aju t-sanjel.

19Aju ch'intl tx'olb'ab'en ti'j Jeroboam, tuk'ix kyi'j qe q'oj e ok tu'n ex ti'j aju b'aj tuj tkawb'il, atzun tz'ib'an tuj u'j jatum ta' tkyaqil tx'olb'ab'en ti'j kyaq'unb'en qe rey kye aj Israel.

20O kawin Jeroboam 22 ab'q'i, ex tkyimlenxi, atzun Nadab aju tky'ajal o kawin te t-xel.

Tej ttzyet tkawin Roboam tuj Judá 2 Crónicas 12.1-16

21O kawin Roboam aju tky'ajal Salomón tuj Judá. Otoq japun twi' 41 ab'q'i tej ttzyet tkawin, ex o kawin wuqlaj ab'q'i tuj Jerusalén aju tnam jaw t-sk'o'n Qman kyxol kykyaqil k'loj kyiyjil aj Israel tu'ntzun tten tb'i tuj. Aju ttxu' Roboam Naama tb'i ex aj Amón.

22Ex qe kyb'inchb'en tiyjil Judá mya b'a'n ela tuj twitz Qman, ex mas nim tq'oj tzaj kyu'n twitzju tq'oj otoq tzaj nej tu'n tkyaqilju il otoq kyb'incha kyxe'chel;

23ax ikx kye jaw kyb'incha'n qe ja te kyk'ulb'il xjal mya nimal Dios qe, ex jaw kywalb'a'n qe ab'j ex qe tronc xjansamaj kyu'n, kywi' kykyaqil tal witz ex kyjaq' kykyaqil tze' pin kyxaq.

24Ax ikx tuj ju tx'otx' lu at qe xinaq in che yaẍin ax tuk'il juntl xinaq, ex a jlu in kyb'incha'n te jun k'ulb'il kywitz tilb'ilal, ex in kyb'incha'n tkyaqil mya b'a'n aju in kyb'incha'ntoq qe nasyon mya nimal Dios qe, aqeju otoq che ex tlajo'n Qman kywitz aj Israel.

25Tuj tjwe'yin ab'q'i ttzyetlen tkawin Roboam, ok tzoqpaj Sisac aju rey te Egipto ti'j tnam Jerusalén,

26ex xi ti'n qe q'inumab'l ate' tuj tja Qman ex tuj tja rey. Tkyaqil ex ti'n, kyuk'ix kykyaqil maqb'il q'an pwaq kytx'otx'il, aqeju e kub' tb'incha'n Salomón.

27Te kyxel qe jlu kub' tb'incha'n rey Roboam qe maqb'il q'an k'uxb'il kytx'otx'il, ex e kyaj tq'o'n tuj kykwent qe nejenel kye qe xq'uqil tja jatum in kawin.

28Ex tkyaqil maj ok t-xi' rey tuj tja Qman, aqeju xq'uqil in xi kyi'n qe maqb'il, ex nna'jtz kyi'n juntl maj tu'n kypon tuj ja jatum k'u'n qe.

29Aju ch'intl tx'olb'ab'en ti'j Roboam, tuk'ix tkyaqil aju tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

30Kukx o ten q'oj kyxol Roboam tuk'il Jeroboam.

31Tejtzun tkyim Roboam ku'x maqu'n kyxol qe qtzan t-xe'chel tuj tnam Ttanmi David tb'i. Naama tb'i ttxu' ex aj Amón. Te tib'ajxi, aju o kawin te t-xel atzun Abiam aju tky'ajal.