Nehemías 3 - Mam Huehuetenango New Ortography

Xi q'ma'n alkye aq'untl tu'n tb'ant kyu'n junjun k'loj xjal

1Atzunte Eliasib aju tnejel pal, kyuk'ix txqantl pal, jaw kyb'incha'ntl tlamel tnam tok tb'i Tlamel ja kye Ẍne'l. Kub' kyik'sa'n tq'ijlalil tu'n tajb'en, ok kyq'o'n tlamel ex jaw kyb'incha'n juntl maj jun piẍ muro, xi'x qe' kyu'n jatum ta' ja ma' twa'l Hamea tb'i ex pon b'aj jatum ta' juntl ja ma' twa'l Hananeel tb'i.

2Atzun juntl piẍ muro jaw kyb'incha'n qe xinaq aj Jericó, ex atzun juntl piẍ jaw tb'incha'n Zacur aju tky'ajal Imri.

3Qe tiyjil Senaa jaw kyb'incha'n Tlamel ja kye Kyiẍ tb'i; jax kyq'o'n tmarkil ex ok kyq'o'n tlamel kyuk'ix qe matij pasador ti'j, tuk'il kab'e t-ẍkyin tu'n kyku'x ten qe pasador kyuj.

4Atzun juntl piẍ muro jaw tb'incha'n Meremot aju tky'ajal Urías ex tal tchman Cos; atzun juntl piẍ jaw tb'incha'n Mesulam aju tky'ajal Berequías ex tal tchman Mesezabeel; atzun juntl piẍ jaw tb'incha'n Sadoc aju tky'ajal Baana.

5Atzun juntl piẍ muro jaw kyb'incha'n qe xjal aj Tecoa, maske minti' o kyajb'e qe xinaq ma' kyoklen tu'n kyonin kyi'j qe nejenel ti'j aq'untl.

6Atzunte Joiada aju tky'ajal Paseah, tuk'ix Mesulam aju tky'ajal Besodías, jaw kyb'incha'n aju tlamel ja tok tb'i Jesana. Jax kyq'o'n tmarkil ex ok kyq'o'n tlamel kyuk'ix qe pasador ti'j, tuk'il kab'e t-ẍkyin tu'n kyku'x ten qe pasador kyuj.

7Atzun juntl piẍ muro jaw tb'incha'n Melatías aju aj Gabaón tuk'ix Jadón aju aj Merenot ex qe xjal aj Gabaón ex aj Mizpa. Qe lugar lu ate'toq tjaq' tkawb'il gobernador tuj tumlal tjawitz q'ij te nima Éufrates.

8Atzun juntl piẍ muro jaw tb'incha'n Uziel aju tky'ajal Harhaía aju tx'inol saq pwaq, atzun juntl piẍ jaw tb'incha'n Hananías aju b'inchal perjum; tu'n kykab'il jaw kyb'incha'n jun piẍ muro ti'j Jerusalén max pon b'aj jatum ta' ju muro ma' twitz.

9Atzun juntl piẍ muro jaw tb'incha'n Refaías aju tky'ajal Hur, aju tok te ajkal tuj mij tx'otx' Jerusalén.

10Atzun juntl piẍ jaw tb'incha'n Jedaías aju tky'ajal Harumaf, aju muro lu tkub'sa'n tumlal twitz tja Jedaías, atzun juntl piẍ jaw tb'incha'n Hatús aju tky'ajal Hasabnías.

11Ate Malquías aju tky'ajal Harim, tuk'ix Hasub aju tky'ajal Pahat-moab, jaw kyb'incha'n juntl piẍ muro tuk'ix ju ja ma' twa'l, Ja kye Jorni tb'i.

12Atzun juntl piẍ muro jaw tb'incha'n Salum kyuk'ix qe tme'jel; ate Salum tky'ajal Halohes, aju tok te ajkal te mijtl tx'otx' Jerusalén.

13Ate Hanún ex qe xjal najlqe tuj Zanoa jaw kyb'incha'n aju tlamel ja tok tb'i Chq'ajlaj; ex ok kyq'o'n tlamel kyuk'ix qe pasador matij, kyuk'ix kab'e t-ẍkyin tu'n kyku'x ten qe pasador kyuj; winqin ech tnuqb'il muro jaw kyb'incha'n, ex pon b'aj kyu'n max ttzi tlamel tnam jatum nne'x chitet tz'is.

14Ate Malquías aju tky'ajal Recab, aju toktoq te gobernador tuj tx'otx' Bet-haquerem, jaw tb'incha'n ju tlamel ja jatum nne'x chitet tz'is, ok tq'o'n tlamel kyuk'ix qe pasador matij, tuk'il kab'e t-ẍkyin tu'n kyku'x ten pasador kyuj.

15Ate Salum aju tky'ajal Colhoze, aju toktoq te gobernador tuj tx'otx' Mizpa, jaw tb'incha'n aju tlamel ja tok tb'i Tlamel Twi A', jax tq'o'n twi' ex ok tq'o'n tlamel kyuk'ix qe pasador ti'j, tuk'il kab'e t-ẍkyin tu'n kyku'x ten qe pasador kyuj, ex jaw tb'incha'n jun piẍ muro, tzaj qe' tu'n jatum tkub'sa'n nintz pil Siloé tb'i, aju tkub' junx tuk'il tqan tawal rey, ex pon b'aj jatum in che kub'il qe grad te tnam tok tb'i Ttanmi David.

16Ate Nehemías aju tky'ajal Azbuc, aju toktoq te gobernador te mij tx'otx' Bet-sur, jaw tb'incha'n juntl piẍ muro, pon b'aj tu'n tumlal twitz tpantyón rey David jatum tkub'sa'n pil te chemb'il a' ex max jatum tkub'sa'n kyja soldad.

17Atzun juntl piẍ muro jaw kyb'incha'n aj Leví; ate Rehum aju tky'ajal Bani nejenel kyxol; atzun juntl piẍ muro jaw tb'incha'n Hasabías aju toktoq te gobernador tuj mij tx'otx' Keila, kyuk'ix qe xjal ate'toq tjaq' tkawb'il.

18Atzun juntl piẍ muro jaw kyb'incha'n qe tuk'il: Ate Bavai tky'ajal Henadad nejenel kyxol, ex toktoq te gobernador tuj mijtl tx'otx' Keila.

19Ate Ezer aju tky'ajal Jesúa aju toktoq te gobernador tuj Mizpa, jaw tb'incha'n juntl piẍ muro tumlal twitz ja te k'ub'l qe ub'l, ex pon b'aj jatum in pon b'aj t-skin muro.

20Atzun juntl piẍ muro jaw tb'incha'n Baruc aju tky'ajal Zabai tuk'il tkyaqil tanmi, xi qe' tu'n t-skinil muro ex pon b'aj tumlal twitz tja Eliasib aju tnejel pal.

21Ex ate Meremot aju tky'ajal Urías ex tal tchman Cos, jaw tb'incha'n juntl piẍ muro, xi'x qe' tu'n tumlal ttzi tja Eliasib ex pon b'aj jatum ponin b'aj tja Eliasib.

22Atzun juntl piẍ muro jaw kyb'incha'n qe pal najlqe tuj chq'ajlaj.

23Atzunte Benjamín tuk'ix Hasub jaw kyb'incha'n juntl piẍ muro tkub'sa'n tumlal twitz kyja. Ax ikx te Azarías aju tky'ajal Maasías ex tal tchman Ananías, jaw tb'incha'n ju muro tkub'sa'n tumlal twitz tja.

24Atzun juntl piẍ muro jaw tb'incha'n Binúi aju tky'ajal Henadad, xi'x qe' tu'n jatum ta' tja Azarías ex pon b'aj max tuj t-skinil muro.

25Atzun juntl piẍ muro jaw tb'incha'n Palal aju tky'ajal Uzai, xi'x qe' tu'n max tuj t-skyinil muro jatum tkub'sa'n ja ma' twa'l, aju tkub'sa'n mas niqayin txlaj tja rey ttxa'n pe'n te pres. Atzun juntl piẍ muro jaw tb'incha'n Pedaías aju tky'ajal Faros.

26Atzun qe ajb'el tuj tja Dios, aqeju najlqe tuj Ofel, jaw kyb'incha'n juntl piẍ muro tumlal Ttzi ja tok tb'i Tlamel te A' tuj tjawitz q'ij, ex pon b'aj twitz ja ma' twa'l ex ma' twitz.

27Qe aj Tecoa jaw kyb'incha'n juntl piẍ muro, xi'x qe' kyu'n tumlal ja ma' twa'l ex ma' twitz ex pon b'aj kyu'n max jatum ta' muro Ofel tb'i.

28Teyle junjun pal jaw tb'incha'n muro tkub'sa'n tumlal twitz tja, xi'x qe' kyu'n ttzi ja tok tb'i ttzi ja kye Cabay.

29Ate Sadoc aju tky'ajal Imer jaw tb'incha'n juntl piẍ muro tkub'sa'n tumlal twitz tja; atzun juntl piẍ jaw tb'incha'n Semaías aju tkyajal Secanías, aju xq'uqil ttzi tlamel tnam tkub'sa'n tuj tumlal tjawitz q'ij.

30Atzun juntl piẍ muro jaw tb'incha'n Hananías aju tky'ajal Selamías tuk'ix Hanún aju tqaqin tky'ajal Salaf. Atzunte Mesulam aju tky'ajal Berequías jaw tb'incha'n juntl piẍ muro tkub'sa'n tumlal twitz tja.

31Ate Malquías aju tx'inol saq pwaq jaw tb'incha'n juntl piẍ muro jatum ta' kyja qe ajb'el tuj tja Dios ex jatum najl qe comersyant, aju tkub'sa'n tumlal tlamel tnam jatum in pon kychmon kyib' xjal tu'n kyex tuj q'oj, ex pon b'aj tu'n max jatum tkub'sa'n ja te xq'uqb'il tuj t-skyinil muro.

32Qe tx'inol saq pwaq ex qe comersyant jaw kyb'incha'n juntl piẍ muro, xi'x qe' kyu'n max jatum tkub'sa'n ja ma' twa'l tuj t-skinil muro ex pon b'aj kyu'n max jatum ta' ttzi ja aju tok tb'i Ttzi ja kye Ẍne'l.