Jueces 2 - Mam Huehuetenango New Ortography

Pon jun t-anjel Qman tuj lugar Boquim

1Aju t-anjel Qman etz tuj Gilgal ex o pon tuj lugar Boquim tb'i, ex xi tma'n kye aj Israel kyja': Aqine etz q'inte kyeye tuj Egipto ex ma che ul wi'ne tuj tx'otx' lu aju xi ntziyane kye kyxe'chele, ex xi nma'ne kye kyja': Mlayx b'aj nch'expu'ne aju nyole ma kyaj b'ant ti'j kyuk'ile,

2atzun kyeye mi'n moje' kyyole kyuk'il qe xjal najlqe tuj tx'otx' lu, noq o'kx kb'ajel kyxitune qe ky-altar, nchiye. Atzun kyeye minti' ma txi kynimane nyole. ¿Tiqu'n ma che ok tene b'inchal mya b'a'n?

3Tu'ntzun jlu kxel nma'ne kyeye ja'lo: Mlay che ik' nlajo'ne qe xjal kywitze, noq o'kx che okel qe xjal lu ik tza'n jun asyal tu'n t-xi jato'n kyi'je, ex qe kydios che ajb'el te jun k'ob'il te kyeye.

4Tejtzun tb'aj yolin t-anjel Qman, kykyaqil aj Israel e ok ten oq'el kyuwxix wen,

5kyja'tzun tten ok tb'i lugar lu Boquim. Ex atzun xi kyq'o'n chojb'il te Qman.

Aju tkyimlen Josué Josué 24.29-31

6Tejtzun tb'aj tq'olb'en tib' Josué kyuk'il aj Israel, teyle junjun xi' tuj ttx'otx' aju otoq tk'am te tetzb'il.

7Tej itz'xtoq Josué, kukx e ajb'en aj Israel te Qman, ax ikx tej itz'xtoq qe tij xjal aqeju ax e kyaj ten tkyimlenxi Josué ex o kyil tej kyb'ant qe b'inchb'en nim kyipumal tu'n Qman te jun b'a'n kye aj Israel.

8Kyimtzun Josué aju tky'ajal Nun ex tmajen Qman, tej otoq japun twi' jun syent tuk' laj ab'q'i,

9ex axtzun ku'x maqu'n tujx ttx'otx' tuj lugar Timnat-sera, aju ta' tuj tiwitz tx'otx' kye aj Efraín, ti'jxi witz Gaas.

10Ex tej kyb'aj kyim kykyaqil aj Israel aqeju e ten tuj tq'ijlalil Josué, aqeju e itz'j te tib'ajxi minti' ch'in kyojtzqib'l ti'j Qman, ex minti' otoq kyil tkyaqilju b'a'n otoq tb'incha Qman kye aj Israel.

El kypa'n kyib' aj Israel ti'j Qman

11E oktzun ten aj Israel b'inchal mya b'a'n twitz Qman, ex e ok ten k'ulul kywitz tilb'ilal Baal, aqeju nno'k kydiosin xjal.

12El kypa'n kyib' aj Israel ti'j Qman aju Kydios kyxe'chel, aju etz q'inte kye tuj Egipto, e ok lpe' kyi'j kydios xjal kyvesin kyib' kyuk'il, ex e k'ulun kywitz. Tu'ntzun jlu tzaj tq'oj Qman kyi'j.

13El kypa'n kyib' ti'j Qman ex e ok ten k'ulul twitz Baal, ex kywitz nimku tilb'ilal Astarté aju kydios xjal.

14Tu'ntzun jlu tzaj tq'oj Qman kyi'j aj Israel, xi tq'o'n amb'il kye eleq' tu'n tel kyelq'a'n tkyaqilju at kye, kub' kyi'j kyu'n qe aj q'oj kyi'j, aqeju ate' ti'jele kytx'otx', ex minti' o ten kyipun tu'n kywe' kywitz aj q'oj.

15Tkyaqil maj tej kyxi' aj Israel q'ojlel kyi'j aj q'oj kyi'j, ax te Qman ok ten q'ojlel kyi'j aj Israel, ex mya b'a'n e'la te kye ik tza'nx otoq tma Qman kye.

Maske tzaj nim yajb'il kyi'j aj Israel,

16ax ikx e jaw t-sk'o'n Qman qe xjal tu'n kyok te nejenel kye, tu'ntzun kyklet tuj kyq'ab' qe eleq' in che ok tzoqpaj kyi'j.

17Atzun kye aj Israel minti' xi kyniman qe nejenel kye, noq o'kx kyaj kykolin Qman ex e ok ten k'ulul kywitz junxitl dios. Qe kyxe'chel otoq txi kyniman qe tmandamyent Qman, atzun kye minti' o kyb'incha ik tza'n otoq kyb'incha qe kyxe'chel.

18Tkyaqil maj ok tjaw t-sk'o'n Qman jun nejenel kye, ax te Qman o tz'onin te, ex tuj tq'ijlalil junjun nejenel in che kolpet aj Israel tuj kyq'ab' aj q'oj kyi'j, ex tzaj q'aq'an tk'u'j Qman kyi'j tej kyjaw ayayan tu'n ta'w yajb'il nnik'x kyu'n.

19Ex oktzun tkyim ju nejenel kye, in che oktzun ten juntl maj b'inchalte mya b'a'n, ex masxix nim mya b'a'n in kyb'incha'n ik tza'n kye kyxe'chel, ex e ok lpe' kyi'j junxitl dios, e ajb'en kye ex e k'ulun kywitz. Minti' kyaj kykolin tu'n kyb'inchante mya b'a'n, ex e ok mib'an che b'in.

20Tu'ntzun jlu tzaj nimxix tq'oj Qman kyi'j aj Israel ex tma: Qe xjal lu minti' ma japun kyu'n aju yol kyaj b'ant ti'j wu'ne kyuk'il qe kyxe'chel, ex kyk'i' che niman weye;

21tu'ntzun jlu mlay che ik' nlajo'ne qe xjal kywitz, aqeju minti' e ik' tlajo'n Josué tej na'nxtoq tkyim, chi Qman.

22Tb'incha Qman ikju tu'n kyok aj Israel tuj malb'il tu'n, ex tu'n tel tnik' ti'j qa tu'n kyok lpe' ti'j ik tza'n otoq kyb'incha qe kyxe'chel.

23Kyja'tzun minti' e jik' tlajo'n naj qe xjal kyuj tnam, aqeju minti' kub' kyi'j tu'n Josué; noq o'kx ax e kyaj ten tu'n Qman tuj kylugar.